അഞ്ച് റൗണ്ട് അവസാനിച്ചതോടെ മൂസാ ഷരീഫ്- കര്‍ണാ കദൂര്‍ സഖ്യത്തിന് വ്യക്തമായ ആധിപത്യം.
കാസറഗോഡ് : ഫെഡറേഷന്‍ ഓഫ് മോട്ടോര്‍ സ്‌പോര്‍ട്‌സ് ക്ലബ് ഓഫ് ഇന്ത്യ കൊടഗില്‍ സംഘടിപ്പിച്ച ദേശീയ കാര്‍ റാലി ചാമ്പ്യന്‍ഷിപ്പ് -2024 ന്റെ അഞ്ചാം റൗണ്ടായ ബ്ലൂ-ബാന്‍ഡ് സ്‌പോര്‍ട്‌സ് റോബസ്റ്റാ റാലിയില്‍ ഓവറോള്‍ റണ്ണറപ്പായി ഫിനിഷ് ചെയ്തതോടെ മൂസാ ഷരീഫ്- കര്‍ണ കദൂര്‍ സഖ്യം വ്യക്തമായ ആധിപത്യം നേടി.
ആകെ ആറ് റൗണ്ടുകളുള്ള ദേശീയ കാര്‍ റാലി ചാമ്പ്യന്‍ഷിപ്പില്‍ 25 പോയിന്റിന്റെ വ്യക്തമായ ലീഡ് ഈസഖ്യം ഇതിനകം നേടിയിരിക്കുകയാണ്. ആറാമത്തെയും അവസാനത്തെയും റൗണ്ട് പൂര്‍ത്തിയാക്കിയാല്‍ തന്നെ ദേശീയ കാര്‍ റാലി ചാമ്പ്യന്‍ഷിപ്പില്‍ മുത്തമിടാന്‍ മൂസാ ഷരീഫ് -കര്‍ണ കദൂര്‍ സഖ്യത്തിന് സാധിക്കും. ഏഴുതവണ ദേശീയ കാര്‍ റാലി ചാമ്പ്യന്‍ പട്ടം കരസ്ഥമാക്കിയ മുസാ ഷരീഫ് എട്ടാം കിരീടത്തിന്റെ പടിവാതില്‍ക്കലാണ്. ഈ കിരീടം നേടാനായാല്‍ പുതിയൊരു റെക്കോര്‍ഡ് കൂടി മൂസാ ഷരീഫിന് സ്വന്തമാകും.
280 കിലോമീറ്റര്‍ ദൈര്‍ഘ്യമുള്ള 12 സ്‌പെഷ്യല്‍ സ്റ്റേജുകള്‍ അടങ്ങിയതായിരുന്നു അഞ്ചാം റൗണ്ട്. ഒരു മണിക്കൂര്‍ 41 മിനുറ്റ് 57 സെക്കന്റ് സമയമാണ് മൂസാ ഷരീഫ് സഖ്യം ഫിനിഷ് ചെയ്യാന്‍ എടുത്തത്.
ഗൗരവ് ഗില്‍ – അനിരുദ്ധ് സഖ്യമാണ് അഞ്ചാം റൗണ്ടില്‍ ഒന്നാം സ്ഥാനത്ത് ഫിനിഷ് ചെയ്തത്.
ദേശീയ കാര്‍ റാലി ചാമ്പ്യന്‍ഷിപ്പിന്റെ ആറാമത്തേതും അവസാനത്തേതുമായ റൗണ്ടായ K-1000 റാലി ഡിസംബര്‍ 13,14,15 തീയതികളില്‍ ബാംഗ്ലൂരില്‍ വെച്ചാണ് നടക്കുന്നത്.
ഏഴ് തവണ ദേശീയ കാര്‍റാലി ചാമ്പ്യന്‍ പട്ടം കരസ്ഥമാക്കിയ ഇന്ത്യയിലെ തന്നെ നമ്പര്‍ വണ്‍ കോ ഡ്രൈവറായ മൂസാ ഷരീഫ് എട്ടാം കിരീടത്തില്‍ കുറഞ്ഞൊന്നും താന്‍ പ്രതീക്ഷിക്കുന്നില്ലെന്ന് ഉറപ്പിച്ചു പറയുന്നു.
ഫോട്ടോ അടിക്കുറിപ്പ്: കൊടഗില്‍ നടന്ന ദേശീയ കാര്‍റാലി ചാമ്പ്യന്‍ഷിപ്പിന്റെ അഞ്ചാം റൗണ്ടില്‍ ഓവറോള്‍ റണ്ണര്‍ അപ്പായി ഫിനിഷ് ചെയ്ത മൂസാ ഷരീഫ് കര്‍ണ കദൂര്‍ സഖ്യംട്രോഫിയുമായി.
