മലപ്പുറം: അതിശക്തമായ മഴ മുന്നറിയിപ്പിന്റെ പശ്ചാത്തലത്തില് സംസ്ഥാനത്ത് നാല് ജില്ലകളില് കേന്ദ്ര കാലാവസ്ഥാ വകുപ്പ് റെഡ് അലര്ട്ട് പ്രഖ്യാപിച്ചിരുന്നു. മലപ്പുറം, കോഴിക്കോട്, വയനാട്, കണ്ണൂര് എന്നീ ജില്ലകളിലാണ് റെഡ് അലര്ട്ട്. ജില്ലകളില് അതീവ ജാഗ്രതവേണമെന്ന നിര്ദ്ദേശത്തിന്റെ പശ്ചാത്തലത്തില് മലപ്പുറം ജില്ലയിലെ ക്വാറികളുടെ പ്രവര്ത്തനങ്ങള് നിരോധിച്ച് കളക്ടര് ഉത്തരവിറക്കി. ഇനി ഒരു അറിയപ്പുണ്ടാകുന്നത് വരെ ക്വാറികള് പ്രവര്ത്തിപ്പിക്കരുതെന്ന് ജില്ലാ കളക്ടര് വി ആര് വിനോദ് നിര്ദ്ദേശം നല്കി.
മണ്ണിടിച്ചില് സാധ്യതയുള്ള പ്രദേശങ്ങളിലും മറ്റും വിനോദസഞ്ചാരം ഒഴിവാക്കണമെന്നും നദീതീരത്ത് താമസിക്കുന്ന എല്ലാവരും പ്രത്യേക ജാഗ്രത പാലിക്കണമെന്നും കളക്ടര് അറിയിച്ചു. വലിയ മഴ പെയ്യുകയാണെങ്കില് ബാക്കിക്കയം ഷട്ടര് തുറക്കുന്നതിനാല് കടലുണ്ടിപ്പുഴ തീരത്ത് താമസിക്കുന്നവര് ജാഗ്രത പാലിക്കണം. സര്ക്കാര് വകുപ്പുകളും പൊലീസും നല്കുന്ന നിര്ദ്ദേശങ്ങള് എല്ലാവരും പാലിക്കണം. വൈദ്യുതി ബോര്ഡും പൊതുമരാമത്ത് വകുപ്പും പഞ്ചായത്ത് തല ദുരന്ത പ്രതികരണ സംഘങ്ങളും ഏത് അടിയന്തരാവസ്ഥയ്ക്കും തയ്യാറായിരിക്കണമെന്നും കളക്ടര് അഭ്യര്ഥിച്ചു.
ശക്തമായ മഴയക്ക് സാധ്യതയുള്ളതിനാല് എറണാകുളം, ഇടുക്കി, തൃശ്ശൂര്, പാലക്കാട്, കാസര്കോട് ജില്ലകളില് ഓറഞ്ച് അലര്ട്ടും പ്രഖ്യാപിച്ചിട്ടുണ്ട്. പത്തനംതിട്ട, ആലപ്പുഴ, കോട്ടയം ജില്ലയില് യെല്ലോ അലര്ട്ടാണ്. മലയോരമേഖകളില് പ്രത്യേക ശ്രദ്ധ വേണമെന്നാണ് മുന്നറിയിപ്പ്. കേരളാ തീരത്ത് പ്രഖ്യാപിച്ച മല്സ്യബന്ധന വിലക്ക് തുടരുകയാണ്. സംസ്ഥാനത്ത് എല്ലാ ജില്ലകളിലും 24 മണിക്കൂര് പ്രവര്ത്തിക്കുന്ന താലൂക്ക്, ജില്ലാ കണ്ട്രോള് റൂമുകള് പ്രവര്ത്തനം തുടങ്ങിയിട്ടുണ്ട്. അപകടസാധ്യത മുന്നില് കാണുന്ന ഘട്ടത്തിലും സഹായങ്ങള്ക്കുമായി 1077, 1070 എന്നീ ടോള് ഫ്രീ നമ്പറുകളില് ബന്ധപ്പെടാം.
കുറഞ്ഞ സമയം കൊണ്ട് വലിയ മഴയുണ്ടാകുന്നതിനാല് മലവെള്ളപ്പാച്ചിലും മിന്നല് പ്രളയവും പോലുള്ള സാഹചര്യമുണ്ടാകാനും സാധ്യതയുണ്ട്. നഗരപ്രദേശങ്ങളിലും പൊതുവെ താഴ്ന്ന പ്രദേശങ്ങളിലും വെള്ളക്കെട്ട് രൂപെപ്പെടാം. മലയോര മേഖലയില് മണ്ണിടിച്ചില്, ഉരുള്പൊട്ടല്, മലവെള്ളപ്പാച്ചില് സാധ്യതയുള്ള പ്രദേശങ്ങളിലുള്ളവര് സുരക്ഷിതമായ സ്ഥലത്തേക്ക് പകല് സമയത്ത് തന്നെ മാറി താമസിക്കാന് തയ്യാറാവണമെന്ന് മുഖ്യമന്ത്രി പിണറായി വിജയന് അഭ്യര്ത്ഥിച്ചു.
