സ്ത്രീകള് താമിസിക്കുന്ന വീടുകള്ക്ക് അഭിമുഖമായി ജനലുകള് പോലും പാടില്ലെന്നും സ്ത്രീകള് പൊതു അടുക്കളകളില് ഭക്ഷണം ഉണ്ടാക്കുകയോ, പൊതു കിണറുകളില് നിന്ന് വെള്ളം കോരാനോ പാടില്ലെന്നും താലിബാന്റെ മുന്നറിയിപ്പ്.
സ്ത്രീകളുടെ അവകാശങ്ങള് സംരക്ഷിക്കുമെന്ന് പറയാതെ പറഞ്ഞായിരുന്നു രണ്ടാം താലിബാന് അഫ്ഗാനിസ്ഥാനില് അധികാരമേറിയത്. എന്നാല്, 2021 ഓഗസ്റ്റ് 15 -ന് അധികാരം കൈയാളിയതിന് പിന്നാലെ സ്ത്രീകളെ പൌരന്മാരായി പോലും പരിഗണിക്കാന് തങ്ങള് തയ്യാറെല്ലെന്ന തരത്തിലാണ് താലിബാന് പെരുമാറിയത്. സര്ക്കാര് – പൊതുമേഖലകളില് നിന്നും സ്ത്രീകളെ പുറത്താക്കിയ താലിബാന് പെണ്കുട്ടികളുടെ വിദ്യാഭ്യാസം ആറാം ക്ലാസ് വരെയാക്കി നിലനിര്ത്തി. വിദ്യാഭ്യാസം നിഷേധിക്കുന്നതിനെതിരെ അഫ്ഗാനിലെ സ്ത്രീകള് പ്രതിഷേധിച്ചെങ്കിലും എല്ലാ പ്രതിഷേധവും താലിബാന് അടിച്ചമര്ത്തി. ഏറ്റവും ഒടുവിലായി രാജ്യത്ത് പ്രവര്ത്തിക്കുന്ന വിദേശ എന്ജിയോകളോട് സ്ത്രീകളെ ജോലിക്ക് നിയോഗിക്കരുതെന്ന മുന്നറിയിപ്പ് നല്കിയിരിക്കുകയാണ് താലിബാന്.
സ്ത്രീകള്ക്ക് തൊഴില് നല്കുന്ന രാജ്യത്തെ എല്ലാ ദേശീയ, വിദേശ സര്ക്കാരിതര ഗ്രൂപ്പുകളും അടച്ചുപൂട്ടുമെന്നാണ് താലിബാന്റെ മുന്നറിയിപ്പ്. തങ്ങളുടെ പുതിയ ഉത്തരവ് ലംഘിച്ചാല് എന്ജിഒകള്ക്ക് രാജ്യത്ത് പ്രവര്ത്തിക്കാനുള്ള ലൈസന്സ് നഷ്ടപ്പെടുമെന്ന് അഫ്ഗാനിസ്ഥാന് സാമ്പത്തിക മന്ത്രാലയം കഴിഞ്ഞ ഞായറാഴ്ച രാത്രി എക്സ് സാമൂഹിക മാധ്യമത്തില് പ്രസിദ്ധീകരിച്ച കുറിപ്പില് മുന്നറിയിപ്പ് നല്കി. എമിറാത്തി ഇതര സ്ഥാപനങ്ങള് രജിസ്റ്റര് ചെയ്യുന്നതിനുള്ള അധികാരിയെന്ന നിലയില്, ആഭ്യന്തര, വിദേശ എന്ജിഒകളുടെ എല്ലാ പ്രവര്ത്തനങ്ങളും ഏകോപിപ്പിക്കുന്നതിനും നയിക്കുന്നതിനും മേല്നോട്ടം വഹിക്കുന്നതിനും സാമ്പത്തിക മന്ത്രാലയം ഉത്തരവാദിയാണെന്ന് പേര്ഷ്യന് ഭാഷയിലുള്ള കുറിപ്പില് പറയുന്നതായി എന്ഡിടിവി റിപ്പോര്ട്ട് ചെയ്തു.
