വെസ്റ്റ് ഇന്‍ഡീസിനെതിരെ ഓസീസിന് ഒന്നാം ഇന്നിംഗ്സ് ലീഡ്

ഗ്രനഡ: വെസ്റ്റ് ഇന്‍ഡീസിനെതിരെ രണ്ടാം ടെസ്റ്റില്‍ ഓസ്‌ട്രേലിയക്ക് 33 റണ്‍സിന്റെ ഒന്നാം ഇന്നിംഗ്സ് ലീഡ്. ഓസീസിന്റെ ഒന്നാം ഇന്നിംഗ്‌സ് സ്‌കോറായ 286നെതിരെ വിന്‍ഡീസ് 253ന് എല്ലാവരും പുറത്താവുകയായിരുന്നു. മൂന്ന് വിക്കറ്റ് നേടിയ നതാന്‍ ലിയോണ്‍, രണ്ട് വിക്കറ്റ് വീതം വീഴ്ത്തിയ പാറ്റ് കമ്മിന്‍സ്, ജോഷ് ഹേസല്‍വുഡ് എന്നിവരാണ് ഓസീസിന് ലീഡ് സമ്മാനിച്ചത്. 75 റണ്‍സ് നേടിയ ബ്രന്‍ഡന്‍ കിംഗാണ് വിന്‍ഡീസിന്റെ ടോപ് സ്‌കോറര്‍. പിന്നാലെ രണ്ടാം ഇന്നിംഗ്സ് ആരംഭിച്ച ഓസീസിന് രണ്ട് വിക്കറ്റുകള്‍ നഷ്ടമായി. മൂന്നാം ദിനം കളി നിര്‍ത്തുമ്പോള്‍ രണ്ടിന് 12 എന്ന നിലയിലാണ് ഓസീസ്. ഒന്നാകെ 45 റണ്‍സിന്റെ ലീഡായി അവര്‍ക്ക്. കാമറൂണ്‍ ഗ്രീന്‍ (6), നതാന്‍ ലിയോണ്‍ (2) എന്നിവര്‍ ക്രീസിലുണ്ട്.