മഴ പെയ്താല്‍ ചോര്‍ന്നൊലിക്കുന്ന ഓടിട്ട കെട്ടിടത്തില്‍ അഞ്ച് ക്ലാസ് മുറികളാണ് പ്രവര്‍ത്തിക്കുന്നത്.
തിരുവനന്തപുരം: പാലോട് പേരക്കുഴി ഗവ. എല്‍പി സ്‌കൂളിന്റെ ക്ലാസ് മുറികളുടെ സീലിം?ഗ് ഇളകി വീണു. 80 വര്‍ഷം പഴക്കമുള്ള ഓടിട്ട കെട്ടിടത്തിന്റെ സീലിം?ഗാണ് പൊളിഞ്ഞു വീണത്. അഞ്ച് ക്ലാസുകള്‍ പ്രവര്‍ത്തിക്കുന്ന കെട്ടിടത്തില്‍ കുട്ടികളില്ലാതിരുന്നതിനാല്‍ വലിയ ദുരന്തം ഒഴിവായി. രാവിലെ എട്ടരയോയാണ് സീലിം?ഗ് ഇളകി വീണത്. ഒമ്പത് മണിക്കാണ് കുട്ടികള്‍ എത്തിയത്. മഴ പെയ്താല്‍ ചോര്‍ന്നൊലിക്കുന്ന ഓടിട്ട ഈ കെട്ടിടത്തിലാണ് അഞ്ച് ക്ലാസ് മുറികള്‍ പ്രവര്‍ത്തിക്കുന്നത്. മേല്‍ക്കൂര മുഴുവന്‍ ദ്രവിച്ച നിലയിലാണെന്നത് വ്യക്തമാണ്.
പാഠ്യ, പാഠ്യേതര പ്രവര്‍ത്തനങ്ങളില്‍ ഏറെ മുന്നില്‍ നില്‍ക്കുന്ന പാലോട് ഉപജില്ലയിലെ മികച്ച സ്‌കൂളുകളില്‍ ഒന്നാണ് പാലോട് പേരക്കുഴി എല്‍പിഎസ്. സ്‌കൂളിന്റെ മികവുകൊണ്ട് തന്നെ ഓരോ വര്‍ഷവും ഇവിടെ പഠിക്കാനെത്തുന്ന കുട്ടികളുടെ എണ്ണവും വര്‍ധിക്കുന്നതായി വാര്‍ഡ് മെമ്പറായ രാജ്കുമാര്‍ പറഞ്ഞു. പഞ്ചായത്ത്, എംഎല്‍എ, എംപി എന്നിവര്‍ക്കടക്കം നിവേദനം നല്‍കിയിട്ടും ഇതുവരെ ആരും നടപടിയെടുത്തിരുന്നില്ലെന്നും അദ്ദേഹം പറഞ്ഞു. രണ്ട് വര്‍ഷം മുമ്പ് എംഎല്‍എയ്ക്ക് നല്‍കിയ നിവേദനത്തിന്റെ അടിസ്ഥാനത്തില്‍ പൊതുമരാമത്ത് വകുപ്പ് എസ്റ്റിമേറ്റ് തയാറാക്കിയെങ്കിലും നടപടിയൊന്നുമായില്ല.
നിലവില്‍ 250ലേറെ കുട്ടികള്‍ ഇവിടെ പഠിക്കുന്നുണ്ട്. ക്ലാസ് മുറികള്‍ ഇല്ലാത്തത് മൂലം സമീപത്തെ ബിആര്‍സിയുടെ ട്രെയിനിം?ഗ് ഹാള്‍, ലൈബ്രറി കെട്ടിടം, ബിആര്‍സിയുടെ തന്നെ തെറാപ്പി സെന്റര്‍ എന്നിവിടങ്ങളിലാണ് ക്ലാസുകള്‍ നടക്കുന്നത്. പുതിയൊരു കെട്ടിടം ലഭിച്ചാല്‍ പേടിയില്ലാതെ കുട്ടികള്‍ക്ക് ക്ലാസിലിരിക്കാമെന്നും മികച്ച സ്‌കൂളിനെ നിലനിര്‍ത്താന്‍ സര്‍ക്കാര്‍ നടപടി വേണമെന്നും വാര്‍ഡ് മെമ്പര്‍ ചൂണ്ടിക്കാട്ടി. പുതിയ കെട്ടിടം അത്യാവശ്യമാണെന്ന് സ്‌കൂള്‍ അധികാരികളും പറയുന്നു.
