പുതിയതായി വെളിപ്പെടുത്തിയ 3 ജോഡി ആനക്കൊമ്പുകളുടെ വിവരം ഹാജരാക്കാന് നിര്ദേശം നല്കിയതായി മലയാറ്റൂര് ഡിഎഫ്ഒ കാര്ത്തിക് ഏഷ്യാനെറ്റ് ന്യൂസിനോട് പറഞ്ഞു.
കൊച്ചി: തന്റെ കൈവശം 5 ജോഡി ആനക്കൊമ്പുകളുണ്ടെന്ന് വെളിപ്പെടുത്തി നടന് മോഹന്ലാല്. പുതിയതായി വെളിപ്പെടുത്തിയ 3 ജോഡി ആനക്കൊമ്പുകളുടെ വിവരം ഹാജരാക്കാന് നിര്ദേശം നല്കിയതായി മലയാറ്റൂര് ഡിഎഫ്ഒ കാര്ത്തിക് ഏഷ്യാനെറ്റ് ന്യൂസിനോട് പറഞ്ഞു. ആനക്കൊമ്പുകള് തനിക്ക് സമ്മാനം കിട്ടിയതാണെന്ന് മോഹന്ലാല് അറിയിച്ചു.
നേരത്തെ മോഹന്ലാലിന്റെ കൈവശമുണ്ടായിരുന്ന ആനക്കൊമ്പുകളുടെ ഉടമസ്ഥാവകാശ സര്ട്ടിഫിക്കറ്റ് ഹൈക്കോടതി ഇടപെട്ട് റദ്ദാക്കിയിരുന്നു. സംസ്ഥാന സര്ക്കാര് 2015ലും 2016ലും ഇത് മോഹന്ലാലിന് കൈവശം സൂക്ഷിക്കാനായി അധികാരപ്പെടുത്തി ഉത്തരവിറക്കുകയും പിന്നീട് വനംവകുപ്പ് സര്ട്ടിഫിക്കറ്റ് നല്കുകയുമായിരുന്നു. ഇതാണ് കോടതി നിയമപ്രശ്നങ്ങള് ചൂണ്ടിക്കാട്ടി റദ്ദാക്കിയത്. ആ നിയമനടപടികള് ഹൈക്കോടതിയില് മുന്നോട്ട് പോകുന്നതിനിടെയാണ് വനംവകുപ്പിന്റെ പദ്ധതിയില് കൂടുതല് ആനക്കൊമ്പുകള് തന്റെ കൈവശമുണ്ടെന്ന് മോഹന്ലാല് വെളിപ്പെടുത്തിയത്. ഇതോടെ 5 ജോഡി ആനക്കൊമ്പുകളാണ് ഇദ്ദേഹത്തിന്റെ കൈവശമുള്ളത്.
കൂടാതെ ആനക്കൊമ്പില് തീര്ത്ത 13 ശില്പങ്ങളും ഇദ്ദേഹത്തിന്റെ പക്കലുണ്ട്. ഇവയെല്ലാം തനിക്ക് സമ്മാനമായി ലഭിച്ചതെന്നാണ് നടന്റെ വിശദീകരണം. എന്നാല് ഇതില് ചില നിയമപ്രശ്നങ്ങളുണ്ട്. ആനക്കൊമ്പുകള് പാരമ്പര്യമായി, കൃത്യമായ രേഖകളുടെ അടിസ്ഥാനത്തില് കൈമാറി സൂക്ഷിക്കുകയല്ലാതെ അത് സമ്മാനമായി സ്വീകരിക്കരുത് എന്നാണ് വനംനിയമത്തില് പറയുന്നത്. ഈ ആനക്കൊമ്പുകളെല്ലാം വനംവകുപ്പ് കൃത്യമായി പരിശോധിക്കണം. ഇപ്പോള് പ്രാഥമിക പരിശോധന മാത്രമാണ് നടന്നത്. ഡിഎന്എ ടെസ്റ്റ് നടത്തി ഇവ ആറും, ആറ് ആനകളുടേതാണ് എന്ന് തെളിഞ്ഞാല് കാര്യങ്ങള് കൂടുതല് സങ്കീര്ണമായേക്കാം. എത്രയും പെട്ടെന്ന് ഇവയുടെ വിശദാംശങ്ങള് ഹാജരാക്കാന് നിര്ദേശിച്ചതായി വനംവകുപ്പ് വ്യക്തമാക്കി.
