കാസര്‍കോട്: ഡിജിറ്റല്‍ സര്‍വേ പ്രവര്‍ത്തനങ്ങള്‍ക്കുള്ള മികച്ച ജില്ലാ കലക്ടര്‍ക്കുള്ള സംസ്ഥാന പുരസ്‌കാരത്തിന് കാസര്‍കോട് ജില്ലാ കലക്ടര്‍ കെ ഇമ്പശേഖര്‍ അര്‍ഹനായി. ജില്ലയില്‍ ഡിജിറ്റല്‍ സര്‍വേ പ്രവര്‍ത്തനങ്ങള്‍ ഏകോപിക്കുകയും മികച്ച രീതിയില്‍ സംഘടിപ്പിക്കുകയും ചെയ്തതിനാണ് അവാര്‍ഡെന്ന് റവന്യൂ സര്‍വേയും ഭൂരേഖയും വകുപ്പ് മന്ത്രി കെ രാജന്‍ അറിയിച്ചു. ഡിജിറ്റല്‍ സര്‍വ്വേ പ്രവര്‍ത്തനങ്ങള്‍ മികച്ച രീതിയില്‍ സംഘടിപ്പിക്കുന്നതിന് പ്രത്യേക അദാലത്തുകള്‍ വില്ലേജ് തലത്തില്‍ ജില്ലാ കളക്ടര്‍ സംഘടിപ്പിച്ചിരുന്നു. സംസ്ഥാനത്ത് ആദ്യമായി ഡിജിറ്റല്‍ സര്‍വ്വേ സമ്പൂര്‍ണ്ണമായി പൂര്‍ത്തിയാക്കിയ ഉജാര്‍ ഉള്‍വാര്‍ വില്ലേജ്, തളങ്കര ഉള്‍പ്പെടെയുള്ള വില്ലേജുകള്‍ ജില്ലാ കലക്ടര്‍ നേരിട്ട് സന്ദര്‍ശിച്ച് അദാലത്തുകള്‍ നടത്തി. കെ ഇമ്പ ശേഖര്‍ കഴിഞ്ഞ ലോകസഭ തിരഞ്ഞെടുപ്പില്‍ നൂതനാശയങ്ങള്‍ ആവിഷ്‌കരിച്ച മികച്ച ജില്ലാ കലക്ടര്‍ക്കുള്ള മുഖ്യ തെരഞ്ഞെടുപ്പ് ഓഫീസറുടെ പുരസ്‌കാരത്തിനും അര്‍ഹനായിരുന്നു. ജില്ലാ കലക്ടര്‍ നേതൃത്വം നല്‍കിയ ഐലീഡ് പദ്ധതിക്കാണ് ഈ വര്‍ഷത്തെ സാമൂഹിക നീതി വകുപ്പിന്റെ പുരസ്‌കാരം ലഭിച്ചത്.
ഡിജിറ്റല്‍ സര്‍വെ: കാസര്‍കോട് ജില്ലാ കലക്ടര്‍ കെ. ഇമ്പശേഖരനു വീണ്ടും സംസ്ഥാന പുരസ്‌കാരം
99
