സംസ്ഥാനത്ത് മഴക്കെടുതി രൂക്ഷമായ സാഹചര്യത്തില് മുഖ്യമന്ത്രി അടിയന്തര നിര്ദ്ദേശം നല്കി. ഇടുക്കി, പത്തനംതിട്ട, കോട്ടയം ജില്ലകളില് ഏത് സാഹചര്യവും നേരിടാന് സജ്ജരാകാനാണ് നിര്ദ്ദേശം. മന്ത്രിമാര് ജില്ലകളില് ക്യാമ്പ് ചെയ്ത് ദുരിതാശ്വാസ പ്രവര്ത്തനങ്ങള് ഏകോപിപ്പിക്കണം
തിരുവനന്തപുരം: സംസ്ഥാനത്ത് മഴക്കെടുതി രൂക്ഷമായ സാഹചര്യത്തില് അടിയന്തര നിര്ദ്ദേശം നല്കി മുഖ്യമന്ത്രി വി ഡി സതീശന്. ഏത് അടിയന്തര സാഹചര്യവും നേരിടാന് തയാറാകണമെന്നാണ് മുഖ്യമന്ത്രിയുടെ നിര്ദ്ദേശം. പ്രത്യേകിച്ചും ഇടുക്കി, പത്തനംതിട്ട, കോട്ടയം ജില്ലകളില് ഏത് അടിയന്തര സാഹചര്യവും നേരിടാന് സജ്ജരായിരിക്കാന് കളക്ടര്മാരോട് മുഖ്യമന്ത്രി നിര്ദ്ദേശിച്ചിട്ടുണ്ട്. മന്ത്രിമാരുമായും ജില്ലാ കളക്ടര്മാരുമായും ചര്ച്ച നടത്തിയ മുഖ്യമന്ത്രി വി ഡി സതീശന് സ്ഥിതിഗതികള് വിലയിരുത്തിയ ശേഷമാണ് അടിയന്തര നിര്ദ്ദേശം നല്കിയിരിക്കുന്നത്. അതത് ജില്ലകളുടെ ചുമതലയുള്ള മന്ത്രിമാര് നേരിട്ടെത്തി ക്യാമ്പ് ചെയ്ത് ദുരിതാശ്വാസ പ്രവര്ത്തനങ്ങള്ക്ക് നേതൃത്വം നല്കാനും സതീശന് നിര്ദ്ദേശിച്ചു. തിരുവനന്തപുരത്ത് സി പി ജോണും പത്തനംതിട്ടയില് പി സി വിഷ്ണുനാഥും കോട്ടയത്ത് മോന്സ് ജോസഫും ഇടുക്കിയില് അനൂപ് ജേക്കബും ക്യാമ്പ് ചെയ്ത് പ്രവര്ത്തനങ്ങള് ഏകോപിപ്പിക്കുമെന്നും മുഖ്യമന്ത്രി വ്യക്തമാക്കി. റവന്യൂ മന്ത്രി സംസ്ഥാനതല ഏകോപനം നിര്വഹിക്കുമെന്നും അദ്ദേഹം അറിയിച്ചു., ഏത് അടിയന്തര സാഹചര്യവും നേരിടാന് സജ്ജരായിരിക്കാന് ഇടുക്കി, പത്തനംതിട്ട, കോട്ടയം കളക്ടര്മാര്ക്കും മുഖ്യമന്ത്രി കര്ശന നിര്ദ്ദേശം നല്കി.
മുഖ്യമന്ത്രിയുടെ അറിയിപ്പ്
മന്ത്രിമാരുമായും ജില്ലാ കളക്ടര്ടര്മാരുമായും ബന്ധപ്പെട്ട് സംസ്ഥാനത്തെ മഴക്കെടുതി സാഹചര്യം മുഖ്യമന്ത്രി വിലയിരുത്തി. ജില്ലകളുടെ ചുമതലയുള്ള മന്ത്രിമാരോട് അതത് ജില്ലകളില് ക്യാമ്പ് ചെയ്ത് ദുരിതാശ്വാസ പ്രവര്ത്തനങ്ങള് ഏകോപിപ്പിക്കാന് നിര്ദ്ദേശിച്ചു. തിരുവനന്തപുരത്ത് സി പി ജോണും പത്തനംതിട്ടയില് പി സി വിഷ്ണുനാഥും കോട്ടയത്ത് മോന്സ് ജോസഫും ഇടുക്കിയില് അനൂപ് ജേക്കബും ക്യാമ്പ് ചെയ്യും. ദുരിതാശ്വാസ പ്രവര്ത്തനങ്ങളുടെ സംസ്ഥാനതല ഏകോപനം റവന്യൂ മന്ത്രി നിര്വഹിക്കും. മഴക്കെടുതി രൂക്ഷമായ മേഖലകളിലെ എം എല് എമാരുമായും മുഖ്യമന്ത്രി ഫോണില് സംസാരിച്ചു. ഇടുക്കി, പത്തനംതിട്ട, കോട്ടയം കളക്ടര്മാര്ക്ക് ഏത് അടിയന്തര സാഹചര്യവും നേരിടാന് സജ്ജമായിരിക്കാനുള്ള നിര്ദേശവും നല്കി. രണ്ടു പേരെ കാണാതായ തിരുവനന്തപുരം മുതലപ്പൊഴിയില് കോസ്റ്റ് ഗാര്ഡിന്റെ വെസല് ഉള്ക്കടലില് തിരച്ചില് നടത്തുന്നുണ്ട്. മറൈന് എന്ഫോഴ്സ്മെന്റ് സംഘവും സ്ഥലത്തുണ്ടെന്നും മുഖ്യമന്ത്രി അറിയിച്ചു.
