ബെംഗളൂരു: ഗംഗാവലി നദിയില് പുതഞ്ഞ അര്ജുന്റെ ലോറി കണ്ടെടുക്കാനുള്ള ദൗത്യം നിര്ണായക ഘട്ടത്തില്. ഐബോഡ് പരിശോധന തുടങ്ങി. നദിയോട് ചേര്ന്ന് ഡ്രോണ് പറത്തിയാണ് നിരീക്ഷണം നടത്തുന്നത്. പുഴയ്ക്കടിയിലെ ട്രക്കിന്റെ കിടപ്പും സ്ഥാനവും ഐബോഡ് ഡ്രോണ് പരിശോധനയില് വ്യക്തമാകും. എന്നാല്, മനുഷ്യസാന്നിധ്യം കണ്ടെത്താന് ഡ്രോണ് പരിശോധനയില് കഴിഞ്ഞേക്കില്ലെന്നാണ് നാവികസേന അറിയിക്കുന്നത്. മനുഷ്യസാന്നിധ്യം കണ്ടെത്താന് കഴിഞ്ഞില്ലെങ്കില് ദൗത്യം വീണ്ടും നീളും.
അര്ജുന്റെ ട്രക്ക് കണ്ടെത്താന് പുഴയില് രാവിലെ പരിശോധന നടത്തിയെങ്കിലും ശക്തമായ അടിയൊഴുക്ക് കാരണം നാവിക സേനയുടെ മുങ്ങല് വിദഗ്ധര് വെള്ളത്തിലേയ്ക്ക് ഇറങ്ങിയില്ല. മൂന്ന് ബോട്ടുകളിലായി 15 അംഗ നാവിക സേന ഡൈവര്മാരമാണ് ആദ്യഘട്ട പരിശോധന നടത്തിയത്. ഗംഗാവലി പുഴയിലെ അടിയൊഴുക്ക് ദൗത്യത്തിന് തടസമാണെന്ന് നാവികസേന അറിയിച്ചു. സ്റ്റീല് ഹുക്ക് താഴേക്ക് ഇട്ട് ലോറിയില് കൊളുത്താന് കഴിയാത്ത വിധത്തിലുള്ള അടിയൊഴുക്കാണ് പുഴയിലുള്ളത്. നദിയുടെ അടിത്തട്ടിലേക്ക് സ്റ്റീല് ഹുക്കുകള് എത്തിക്കാന് പോലും ശക്തമായ അടിയൊഴുക്ക് കാരണം പറ്റിയില്ല. അതേസമയം, ട്രക്കിന്റെ കൃത്യമായ പൊസിഷന് നിര്ണയിക്കാന് വേണ്ടിയുള്ള ഐബോഡ് പരിശോധന പുരോഗമിക്കുകയാണ്. ഡ്രോണ് പരിശോധനയിലൂടെ ട്രക്കിന്റെ കൃത്യമായ പൊസിഷന് ലഭിക്കാന് രണ്ട് മണിക്കൂറോളം വേണ്ടി വരും. എന്നാല് ട്രക്കില് മനുഷ്യസാന്നിധ്യമുണ്ടോ എന്ന് ഐബോഡിന് കണ്ടെത്താന് കഴിഞ്ഞേക്കില്ല. ഇനി എന്ത് എന്നതില് തീരുമാനമെടുക്കാന് ദൗത്യസംഘം യോഗം ചേരുകയാണ്.