തിരുവനന്തപുരം: ദുരന്ത നിവാരണ നിധിയില് ആളുകള് പണം നല്കുന്നത് പാവങ്ങളെ സഹായിക്കാന്, ആ ഫണ്ട് മുഖ്യമന്ത്രിക്ക് വിമാനത്തില് പോകാനല്ലെന്ന് മുഖ്യമന്ത്രി വി ഡി സതീശന്. ദുരന്ത നിവാരണ ഫണ്ട് ഉപയോഗിക്കാത്തത് സര്ക്കാരിന്റെ ഫണ്ട് ആവശ്യമില്ലാതെ കളയുന്നതില് താത്പര്യമില്ല. അതില് നിന്നൊന്നും എടുക്കേണ്ട കാര്യവുമില്ല. ഒരു മഴക്കാറു പോലുമില്ലാതെയാണ് മലപ്പുറത്ത് കെടുതി ഉണ്ടായത്. അവിടെയൊന്നു നേരില് പോയി കാണാന് സര്ക്കാരിന്റെ ഫണ്ട് കളയേണ്ട കാര്യമില്ല.
പ്രളയ ദുരിതാശ്വാസഫണ്ട് കൃത്യമായി ആലപ്പുഴ പത്തനംതിട്ട ജില്ലകള്ക്ക് കൈമാറിയിട്ടുണ്ട്. അവിടെയെല്ലാം അനര്ഹരായ ആളുകള് അപേക്ഷ നല്കി. അവിടെ സൂക്ഷ്മമായ പരിശോധന നടന്നു വരികയാണ്. അര്ഹരായ ആളുകള്ക്ക് തുക നല്കും. ധാരാളം അനര്ഹരായ ആളുകള് തുക വാങ്ങിച്ചെടുക്കാന് ശ്രമം നടത്തുന്നു. വീട്ടില് വെള്ളം കയറിയ എല്ലാവര്ക്കും തുക നല്കും.
പൊലീസിന്റെ ഹെലികോപ്റ്ററിന് വലിയ തുകയാണ് നല്കേണ്ടി വരുന്നത്. 25 മണിക്കൂറിനു 80 ലക്ഷം. ആ തുക കുറച്ചു എടുക്കാന് കഴിയുമോ എന്ന് ആലോചിക്കുന്നു. ഖജനാവ് ചോര്ച്ച തടയാനാണ് ശ്രമിക്കുന്നത്. അത് കൊണ്ടാണ് എഗ്രിമെന്റ് തുടരാതിരുന്നത്. തുടരുന്ന കാര്യം ചര്ച്ച ചെയ്യുന്നുണ്ടെന്നും അദ്ദേഹം വ്യക്തമാക്കി.
ശബരിമല വിഷയത്തിലും മുഖ്യമന്ത്രി പ്രതികരിച്ചു. ദേവസ്വം ബോര്ഡും സര്ക്കാരും തമ്മില് തര്ക്കങ്ങള് ഇല്ല. മുഖ്യമന്ത്രിയുടെ അധ്യക്ഷതയില് യോഗം ചേര്ന്നിരുന്നു. ചില കാര്യങ്ങളില് ഡിലെ ഉണ്ടായി. അത് ബോര്ഡുമായി സംസാരിച്ചു ചെയ്ത് വരികയാണ്. റോഡ് നിര്മ്മാണത്തിനുള്ള പണം അടിയന്തിരമായി അനുവദിച്ചു.
ദേവസ്വം ബോര്ഡ് ആവശ്യപ്പെടുന്ന കാര്യങ്ങളില് സര്ക്കാര് അടിയന്തരമായി ഇടപെടും. പമ്പയില് വീണ്ടും യോഗം ചേരും. ശബരിമല സീസണ് തയ്യാറെടുപ്പ് നടക്കുന്ന സമയത്ത് ബോര്ഡിനെ മാറ്റാന് ഒരു ശ്രമവും സര്ക്കാര് നടത്തില്ല. നടത്തിപ്പിന്റെ പ്രധാന ചുമതല ദേവസ്വം ബോര്ഡിനാണ്. സര്ക്കാരിന്റെ ഭാഗത്തു നിന്നും ചെയ്യേണ്ട കാര്യങ്ങള് ഒക്കെ കൃത്യമായി സര്ക്കാര് ചെയ്യുന്നുണ്ട്.
വൈദ്യുതി പ്രതിസന്ധിയില് താല്കാലിക സംവിധാനവും ദീര്ഘകാല സംവിധാനവും നടപ്പിലാക്കി വരുന്നു. ദീര്ഘകാല കരാര് റദാക്കിയതിന് പകരം എഗ്രിമെന്റ് വെച്ചില്ല. കേരളം പോലൊരു സംസ്ഥാനത്തു ദീര്ഘ കാല കരാര് ആവശ്യമാണ്. 980 മെഗാ വാട്ട് ഉപഭോഗം കൂടിയെന്നതും സത്യമാണ്. ഒക്ടോബര് 1 മുതല് അടുത്ത മന്സൂണ് വരെ ദീര്ഘകാല എഗ്രിമെന്റ് വെക്കും.നാളെ നിര്ണ്ണായക യോഗം ചേരും.
മൃഗശാല മാറ്റം താന് ഒരു ആഗ്രഹമായി പറഞ്ഞതാണ്. മൃഗങ്ങളെ അവിടെ ഇടുന്നത് അവരോടു ചെയ്യുന്ന ക്രൂരതയാണ്. മ്യൂസിയം ഇരുന്ന സ്ഥലം കണ്ണ് വെച്ചിട്ടുണ്ട്. തിരുവനന്തപുരത്തിന്റെ അഭിമാനകരമായ സ്ഥലമായി മാറ്റാനാണ്. അതല്ലാതെ ആര്ക്കും വില്ക്കാനല്ല.
മന്ത്രിമാരുടെ വിദേശ യാത്രയ്ക്ക് അവര്ക്ക് അനുമതി നല്കിയത് ഞാനാണ്. അവര് പോകട്ടെ പോയി ലോകത്തു നടക്കുന്ന കാര്യങ്ങള് പഠിക്കട്ടെ. സംഘടനകളോ സുഹൃത്തുക്കളോ സ്പോണ്സര് ചെയ്യുന്നതില് ഒരു കുഴപ്പവും ഇല്ല. ഇനിയും അവര്ക്ക് പോകാന് അനുമതി നല്കും.
സ്പോണ്സേര്ഡ് സര്ക്കാരെന്നു സിപിഐഎം നേതാക്കള് ആരോപണം ഉന്നയിക്കുമ്പോള്
പിണറായി വിജയനോട് കൂടി ചോദിക്കണം. കാരണം പിണറായി വിജയന് ഇങ്ങനെയൊക്കെ യാത്ര ചെയ്തിട്ടുണ്ടെന്നും മുഖ്യമന്ത്രി കൂട്ടിച്ചേര്ത്തു.
