കാഞ്ഞങ്ങാട് :സ്കൂള് ഗ്രൗണ്ടില് കളിക്കുന്നതിനിടെ വീണ വിദ്യാര്ഥിയുടെ കൈയില് പലക സഹിതം ആണി തുളഞ്ഞുകയറി. ഉടന് തന്നെ കുട്ടിയെ ജില്ലാ ആശുപത്രിയിലെത്തിച്ചെങ്കിലും ആണിയും പലകയും നീക്കാനായില്ല. ആശുപത്രി അധികൃതര് അറിയിച്ചതിനെ തുടര്ന്ന് കാഞ്ഞങ്ങാട്ട് നിന്ന് ഫയര്ഫോഴ്സെത്തി കുട്ടിയെ രക്ഷപ്പെടുത്തി. ചൊവ്വാഴ്ച ഉച്ചയോടെ ബല്ല ഗവ. ഹയര് സെക്കണ്ടറി സ്കൂള് ഗ്രൗണ്ടിലാണ് സംഭവം. ഈ സ്കൂളില് പഠിക്കുന്ന വിഘ്നേഷ് എന്ന 11 വയസുള്ള കുട്ടിയുടെ കൈയിലാണ് ആണി തുളച്ചുകയറിയത്. കളിക്കിടെ കുട്ടി ഓടുമ്പോള് കാല് വഴുതി ആണി തറച്ച പലകക്ക് മുകളില് വീഴുകയായിരുന്നു.ആണി പലക സഹിതം കൈയില് തുളഞ്ഞുകയറിയതോടെ കുട്ടി വേദന കൊണ്ട് നിലവിളിച്ചു. ആണി ഊരിയെടുക്കാനുള്ള ശ്രമം സ്കൂള് അധികൃതര് നടത്തിയെങ്കിലും കഴിഞ്ഞില്ല. തുടര്ന്ന് ജില്ലാ ആശുപത്രിയിലെത്തിച്ചെങ്കിലും ഡോക്ടര്മാര്ക്കും ആണിയും പലകയും വേര്പെടുത്താനായില്ല. ഇതോടെയാണ് ഫയര് ഫോഴ്സിന്റെ സഹായം തേടിയത്. സീനിയര് ഫയര് ആന്ഡ് റെസ്ക്യു ഓഫീസര് കെ വി പ്രകാശന്, റെസ്ക്യു ഓഫീസര് ലിനേഷ്, മറ്റ് ഉദ്യോഗസ്ഥരായ അജിത്, മിഥുന് മോഹന്, രാമചന്ദ്രന് എന്നിവര് ചേര്ന്നാണ് കുട്ടിയുടെ കൈയില് നിന്ന് ആണിയും പലകയും നീക്കം ചെയ്തത്.
സ്കൂള് ഗ്രൗണ്ടില് കളിക്കുന്നതിനിടെ വീണ വിദ്യാര്ത്ഥിയുടെ കൈയില് പലക സഹിതം ആണി തുളഞ്ഞുകയറി; ഫയര്ഫോഴ്സ് രക്ഷകരായി
