വാജിവാഹനം ഉള്പ്പെടെ തന്ത്രിക്ക് അവകാശപ്പെട്ടതല്ലെന്നാണ് ദേവസ്വം ഉത്തരവ്.
പത്തനംതിട്ട: ശബരിമല സ്വര്ണ്ണക്കൊള്ളക്കേസില് അറസ്റ്റിലായ തന്ത്രി കണ്ഠര് രാജീവര്ക്ക് കുരുക്ക് മുറുക്കി ദേവസ്വം ബോര്ഡിന്റെ ഉത്തരവ്. വാജിവാഹനം ഉള്പ്പെടെ തന്ത്രിക്ക് അവകാശപ്പെട്ടതല്ലെന്നാണ് ദേവസ്വം ഉത്തരവ്. 2012ലാണ് ബോര്ഡ് കമ്മീഷണര് ഈ ഉത്തരവിറക്കിയത്. പുതിയവ സ്ഥാപിക്കുമ്പോള് പഴയ വസ്തുക്കള് പൊതുസ്വത്തായി സൂക്ഷിക്കണമെന്നാണ് ബോര്ഡ് തീരുമാനം. ഈ ഉത്തരവ് നിലനില്ക്കെയാണ് പ്രയാര് ഗോപാലകൃഷ്ണന്റെ ബോര്ഡ് വാജിവാഹനം തന്ത്രിക്ക് നല്കിയത്. ഉത്തരവ് ഭരണസമതിക്ക് കുരുക്കായി മാറും. 2017ലാണ് വാജിവാഹനം തന്ത്രിക്ക് നല്കിയത്.
പൂജയുടെ ഭാ?ഗമായി ഏതെങ്കിലും സാധനങ്ങള് മാറ്റേണ്ട സാഹചര്യം വരികയാണെങ്കില് അത് ദേവസ്വത്തിന്റെ സ്വത്ത് തന്നെയാണെന്നും അത് ആര്ക്കും കൊണ്ടുപോവാന് അവകാശമില്ലെന്നുമാണ് ഉത്തരവില് പറയുന്നത്. ഈ ഉത്തരവ് പ്രകാരം പ്രയാര് ?ഗോപാലകൃഷ്ണന്റെ നേതൃത്വത്തിലുള്ള ബോര്ഡ് അന്വേഷണത്തിന്റെ പരിധിയില് വരും. 2012ല് ഇത് ഉത്തരവ് ആയി മാത്രമല്ല, ഇതിന്റെ സര്ക്കുലര് എല്ലാ ഓഫീസുകളിലേക്കും എത്തിയിട്ടുണ്ട്. ഇത് ശബരിമലയില് മാത്രമല്ല, തിരുവിതാംകൂര് ബോര്ഡുകളിലെ എല്ലാ ക്ഷേത്രങ്ങളേയും ബാധിക്കുന്ന കാര്യമാണ്. ക്ഷേത്രങ്ങളില് നിന്നും എന്തെങ്കിലും തരത്തിലുള്ള വസ്തുക്കള് മാറ്റി വെക്കുമ്പോള് അത് പുറത്തേക്ക് കൊണ്ടുപോവാനാവില്ലെന്നും പൊതു സ്വത്തായി കാണണമെന്നുമാണ് ഉത്തരവിലുള്ളത്.
