സൈബര് ആക്രമണങ്ങളില് നിന്ന് ഉപയോക്താക്കളെ സംരക്ഷിക്കാന് വാട്സ്ആപ്പില് ഉടന് തന്നെ ‘സ്ട്രിക്റ്റ് അക്കൗണ്ട് സെറ്റിംഗ്സ്’ (Strict Account Settings) എന്ന പുത്തന് ഫീച്ചര് പ്രത്യക്ഷപ്പെടും. സൈബര് ആക്രമണങ്ങള്ക്കുള്ള സാധ്യത കുറയ്ക്കുകയാണ് ഇതിന്റെ ലക്ഷ്യം. പരിചയമില്ലാത്ത നമ്പറുകളില് നിന്നുള്ള മീഡിയ ഫയലുകളും അറ്റാച്ച്മെന്റുകളും ബ്ലോക്ക് ചെയ്യുന്നത് അടക്കമുള്ള സൗകര്യം സ്ട്രിക്റ്റ് അക്കൗണ്ട് സെറ്റിംഗ്സ് നല്കും. പുതിയ വാട്സ്ആപ്പ് സവിശേഷതകള് ട്രാക്ക് ചെയ്യുന്ന വെബ്സൈറ്റായ വാബീറ്റഇന്ഫോ വാട്സ്ആപ്പിന്റെ ഏറ്റവും പുതിയ ബീറ്റ പതിപ്പില് സ്ട്രിക്റ്റ് അക്കൗണ്ട് സെറ്റിംഗ്സ് ഫീച്ചര് കണ്ടെത്തി.
സ്ട്രിക്റ്റ് അക്കൗണ്ട് സെറ്റിംഗ്സ്
വാട്സ്ആപ്പില് വരാനിരിക്കുന്ന സ്ട്രിക്റ്റ് അക്കൗണ്ട് സെറ്റിംഗ്സ് മോഡ് ഉപയോക്താക്കള്ക്ക് കര്ശനമായ സുരക്ഷാ ക്രമീകരണങ്ങള് നല്കുമെന്ന് വാബീറ്റഇന്ഫോ റിപ്പോര്ട്ട് പറയുന്നു. സ്ട്രിക്റ്റ് അക്കൗണ്ട് സെറ്റിംഗ്സ് ഫീച്ചര് ചില പരിരക്ഷകള് സ്വയമേവ പ്രാപ്തമാക്കുന്നതിലൂടെ ഒരു നൂതന സുരക്ഷാ സുരക്ഷാ സംവിധാനമായി പ്രവര്ത്തിക്കും. കോളുകള്ക്കിടയില് വാട്സ്ആപ്പിന്റെ സെര്വറുകള് വഴി ആശയവിനിമയങ്ങള് റൂട്ട് ചെയ്യുന്നതിലൂടെയും ലൊക്കേഷന് ഡാറ്റയെ അടിസ്ഥാനമാക്കിയുള്ള സാധ്യതയുള്ള ട്രാക്കിംഗ് തടയുന്നതിലൂടെയും ഐപി അഡ്രസ് സംരക്ഷണവും ഇതില് ഉള്പ്പെടും.
കൂടാതെ അജ്ഞാതരായ കോണ്ടാക്റ്റുകളില് നിന്നുള്ള മീഡിയ, ഫയല് അറ്റാച്ചുമെന്റുകള് തടയാനുള്ള കഴിവും ഇതില് ഉള്പ്പെടും. മാല്വെയര് അല്ലെങ്കില് ഫിഷിംഗ് ലിങ്കുകള് അടങ്ങിയ ഫോട്ടോകള്, വീഡിയോകള് അല്ലെങ്കില് ഡോക്യുമെന്റുകള് ഓട്ടോമാറ്റിക്കായി ഡൗണ്ലോഡ് ചെയ്യുന്നത് തടയാനും കഴിയും. അത്തരം അക്കൗണ്ടുകളുമായുള്ള സംഭാഷണങ്ങള് ടെക്സ്റ്റ് സന്ദേശങ്ങളില് മാത്രമായി ഈ പുതിയ ഫീച്ചര് പരിമിതപ്പെടുത്തും. ഇത് അപകടസാധ്യത കുറയ്ക്കും.
മറ്റൊരു ഫീച്ചറും അണിയറയില്
ചാറ്റുകളിലെ ലിങ്ക് പ്രിവ്യൂകള് പ്രവര്ത്തനരഹിതമാക്കുന്നതിനുള്ള ഒരു ഓപ്ഷന് ചേര്ക്കാനും വാട്സ്ആപ്പ് പദ്ധതിയിടുന്നതായി റിപ്പോര്ട്ടുകള് ഉണ്ട്. ലിങ്ക് ചെയ്ത വെബ്സൈറ്റുകളിലേക്ക് കണക്റ്റ് ചെയ്താണ് ആപ്പ് സാധാരണയായി പ്രിവ്യൂകള് സൃഷ്ടിക്കുന്നത്. ഇത് ഉപയോക്താക്കളുടെ ഐപി വിലാസങ്ങള് വെളിപ്പെടുത്തും. എന്നാല് ഈ പുതിയ സെറ്റിംഗ്സ് ലഭിക്കുന്നതോടെ ലിങ്ക് പ്രിവ്യൂകള് ദൃശ്യമാകില്ല. ഇത് ഡാറ്റ ചോര്ച്ചയുടെയോ ട്രാക്കിംഗ് ശ്രമങ്ങളുടെയോ അപകടസാധ്യത കുറയ്ക്കുന്നു. വാട്സ്ആപ്പിന്റെ പ്രൈവസി സെറ്റിംഗ്സില് ഈ ഓപ്ഷന് ഇതിനകം ലഭ്യമാണെങ്കിലും, ഉയര്ന്ന അപകടസാധ്യതയുള്ള വ്യക്തികള്ക്ക് തുടര്ച്ചയായ സംരക്ഷണം ഉറപ്പാക്കുന്നതിന് ഭാവിയില് ഇത് കര്ശനമായ സുരക്ഷാ മോഡിന്റെ ഭാഗമാകും. വാട്സ്ആപ്പിലെ പുത്തന് സുരക്ഷാ ഫീച്ചര് ഇപ്പോള് വികസനഘട്ടത്തിലാണ്. അതിന്റെ ലോഞ്ച് തീയതിയെക്കുറിച്ച് ഔദ്യോഗിക സ്ഥിരീകരണം ഒന്നുമില്ല. പക്ഷേ ഭാവിയിലെ ആന്ഡ്രോയ്ഡ് അപ്ഡേറ്റില് ഇത് ഉള്പ്പെടുത്താന് വാട്സ്ആപ്പ് പദ്ധതിയിടുന്നു എന്നാണ് അതിന്റെ പരീക്ഷണം സൂചിപ്പിക്കുന്നത്.
