മഞ്ചേശ്വരം: അധികാരത്തിലെത്തിയാല്‍ മാലിന്യനിര്‍മാര്‍ജനം നടത്തി മഞ്ചേശ്വരത്തെ ദുര്‍ഗന്ധമുക്തമാക്കുമെന്ന പ്രതീക്ഷയില്‍ അധികാരത്തിലെത്തിയ ജനപ്രതിനിധികളുടെ കാലാവധി അവസാനിക്കാന്‍ മാസങ്ങള്‍ മാത്രം ബാക്കിനില്‍ക്കെ മഞ്ചേശ്വരം ഇനീയും മാലിന്യം നിറഞ്ഞു സംസ്‌കരിക്കാന്‍ നടപടിയില്ല.
മഞ്ചേശ്വരം ഗ്രാമപഞ്ചായത്തിലെ പഞ്ചായത്ത് അധികൃതര്‍ മാലിന്യ നിര്‍മാര്‍ജനത്തില്‍ അനാസ്ഥ കാണിക്കുന്നതായി നാട്ടുകാര്‍ തുടര്‍ച്ചയായി ആക്ഷേപിക്കുന്നു. എന്നിട്ടും ഇപ്പോഴും പ്രശ്നത്തിന് പരിഹാരമായില്ലെന്നത് വിരോധാഭാസമാണ്. നേരത്തെ കര്‍ണാടകയില്‍ നിന്ന് വരികയായിരുന്ന ലോറിയില്‍ മഞ്ചേശ്വരത്ത് നിന്ന് കരാര്‍ അടിസ്ഥാനത്തില്‍ മാലിന്യ ഇവിടെനിന്ന് കൊണ്ട് പോവുകയായിരുന്നു എന്നാല്‍ ഇത്തവണ അങ്ങനെയൊന്നുമില്ലെന്നാണ് ഗ്രാമവാസികള്‍ പറയുന്നത്.
കുഞ്ചത്തൂര്‍ – പദവ് റോഡ്, ഹൈഗ്ലോദി – പാവൂര്‍ റോഡ്, മാലിങ്കേശ്വരം – കുഞ്ചത്തൂര്‍ റോഡ്, മഞ്ചേശ്വരത്തെ നിരവധി പൊതുസ്ഥലങ്ങള്‍ എന്നിവിടങ്ങളില്‍ ദേശീയ പാതയുടെ വശങ്ങളില്‍ മാലിന്യം കുന്നുകൂടി പ്രദേശം ദുര്‍ഗന്ധം വമിക്കുന്നു.
മഞ്ചേശ്വരം ഗ്രാമപഞ്ചായത്തിലെ അക്രി കടകളിലും മറ്റ് ചില കടകള്‍ക്ക് മുന്നിലുള്ള പൊതുസ്ഥലങ്ങളിലും പ്ലാസ്റ്റിക് മാലിന്യം കത്തിക്കുന്നത് കാണാം എന്നതാണ് മറ്റൊരു ഗുരുതരമായ വിഷയം. ഇത് അന്തരീക്ഷ മലിനീകരണത്തിന് കാരണമാവുകയും ആളുകള്‍ക്ക് ശ്വസിക്കാന്‍ പ്രയാസമുണ്ടാക്കുകയും ചെയ്യുന്നു. ഇത് ആസ്ത്മ, ശ്വാസകോശ പ്രശ്നം, കണ്ണിന്റെ വീക്കം, തൊണ്ട പ്രശ്നം തുടങ്ങി നിരവധി ആരോഗ്യ പ്രശ്നങ്ങള്‍ക്ക് കാരണമാകുന്നു. ഇത് ക്യാന്‍സറിനും കാരണമാകുന്നു. ഇക്കാര്യത്തില്‍ പഞ്ചായത്ത് അധികൃതര്‍ മൗനം പാലിക്കുന്നതും നാട്ടുകാരുടെ കടുത്ത അമര്‍ഷത്തിന് ഇടയാക്കിയിട്ടുണ്ട്.
അടുത്തിടെ മഞ്ചേശ്വരത്തെ ഒരു സ്‌കൂളില്‍ മഞ്ചേശ്വരം ഗ്രാമപഞ്ചായത്ത് അധികൃതരും ജനപ്രതിനിധികളും ശുചീകരണ മിഷന്‍ ഉദ്യോഗസ്ഥരും മറ്റ് ഉന്നത ഉദ്യോഗസ്ഥരും ജില്ലയില്‍ നിന്ന് എത്തി മഞ്ചേശ്വരത്തെ മാലിന്യമുക്തമാക്കാന്‍ യോഗം ചേര്‍ന്നു നടത്തിയെങ്കിലും ഇവരും പരാജയപ്പെട്ടതായി നാട്ടുകാര്‍ പറഞ്ഞു.
മഴക്കാലം തുടങ്ങിയാല്‍ സ്‌കൂള്‍ വിദ്യാര്‍ഥികളടക്കം നൂറുകണക്കിനാളുകള്‍ ഇതേ ചുറ്റുപാടിലൂടെ സഞ്ചരിക്കേണ്ടിവരും. ബന്ധപ്പെട്ടവര്‍ അടിയന്തരമായി ഈ ഭാഗത്ത് ശ്രദ്ധിക്കണമെന്നാണ് നാട്ടുകാരുടെ ആവശ്യം.
