ദില്ലി: ചാറ്റ്ജിപിടി, പെര്പ്ലെക്സിറ്റി തുടങ്ങിയ ആഗോള ഭീമന്മാരുമായി മത്സരിക്കാന് ലക്ഷ്യമിടുന്ന എഐ അസിസ്റ്റന്റ് കൈവെക്സ് (Kyvex) പുറത്തിറക്കി ഇന്ത്യന് കോടീശ്വരന് പേള് കപൂര്. ഈ പ്ലാറ്റ്ഫോം നിലവില് വെബ് പ്ലാറ്റ്ഫോമില് മാത്രമാണ് ലഭ്യം. ഉടന് തന്നെ കൈവെക്സിനെ ആന്ഡ്രോയ്ഡ്, ഐഒഎസ്, സംയോജിത ബ്രൗസര് ആപ്ലിക്കേഷനുകള് എന്നിവയിലേക്ക് ഇത് വികസിപ്പിക്കും. ഇത് പൂര്ണ്ണമായും ഇന്ത്യയില് വികസിപ്പിച്ചെടുത്തതും കമ്പനി സ്വന്തം നിലയില് വികസിപ്പിച്ചെടുത്ത ലാര്ജ് ലാംഗ്വേജ് മോഡലിനെ (LLM) അടിസ്ഥാനമാക്കിയുള്ളതുമാണ് എന്നതാണ് കൈവെക്സിന്റെ ഏറ്റവും പ്രധാനപ്പെട്ട സവിശേഷത.
എന്താണ് കൈവെക്സ് എഐ അസിസ്റ്റന്റ്?
ഉപയോക്താക്കള്ക്ക് വേഗതയേറിയതും, കൂടുതല് കൃത്യവും, സന്ദര്ഭോചിതവും, ആഴത്തിലുള്ളതുമായ വിവരങ്ങള് നല്കുക എന്നതാണ് കൈവെക്സിന്റെ ലക്ഷ്യം.കൈവെക്സിന്റെ അടിത്തറ കൂടുതല് ശക്തിപ്പെടുത്തുന്നതിനായി, ഈ സംരംഭത്തിന് പ്രമുഖ ഐഐടി അക്കാദമിക് വിദഗ്ധരില് നിന്ന് പിന്തുണ ലഭിച്ചു. ഐഐടി ഡല്ഹി മുന് ഡയറക്ടര് പ്രൊഫസര് രാംഗോപാല് റാവു, ഐഐടി ഖരഗ്പൂര് മുന് ഡയറക്ടര് പ്രൊഫസര് പി.പി. ചക്രവര്ത്തി തുടങ്ങിയ പ്രമുഖ അക്കാദമിക് വിദഗ്ധര് ഈ സംരംഭത്തെ പിന്തുണയ്ക്കുന്നു. ഇത്, കൈവെക്സ് വെറുമൊരു എഐ ടൂള് മാത്രമല്ല, ആഗോള എഐ നേതൃത്വത്തിലേക്ക് ഇന്ത്യയെ മുന്നോട്ട് നയിക്കാനുള്ള ശ്രമമാണെന്ന് വ്യക്തമാക്കുന്നു.
കൈവെക്സ് നിലവില് ഒരു വെബ് അധിഷ്ഠിത പ്ലാറ്റ്ഫോമാണ്. എന്നാല് കമ്പനി ഉടന് തന്നെ ഇത് ആന്ഡ്രോയ്ഡ്, ഐഒഎസ്, ബ്രൗസര് ഇന്റഗ്രേഷന് എന്നിവയില് കൈവെക്സ് ലഭ്യമാക്കാന് ഒരുങ്ങുകയാണ്. വരും ദിവസങ്ങളില് കൈവെക്സ് ലോകമെമ്പാടുമുള്ള ഉപയോക്താക്കള്ക്ക് കൂടുതല് വ്യാപകമായി ലഭ്യമാക്കും. വിവരങ്ങള് കണ്ടെത്തുന്നതിലും ഗവേഷണം ചെയ്യുന്നതിലും പൂര്ണ്ണമായും പരിവര്ത്തനം വരുത്താന് കഴിയുന്ന ഒരു ചുവടുവയ്പ്പാണ് കൈവെക്സ് എന്ന് ലോഞ്ചിംഗ് വേളയില് പേള് കപൂര് പറഞ്ഞു. എല്ലാവര്ക്കും സൗജന്യവും തുറന്നതുമായ ആക്സസ് നല്കിക്കൊണ്ട് എഐ നവീകരണത്തെ ജനാധിപത്യവല്ക്കരിക്കുന്നതിനായി കമ്പനി പ്രവര്ത്തിക്കുന്നുണ്ടെന്നും അദേഹം വിശദീകരിച്ചു.
ഇന്ത്യയില് വികസിപ്പിച്ച എഐ അസിസ്റ്റന്റ്
കൈവെക്സ് പൂര്ണ്ണമായും ഇന്ത്യയില് വികസിപ്പിച്ചെടുത്തത് ഇന്ത്യന് എഐ എഞ്ചിനീയര്മാരും ഗവേഷകരുമാണെന്ന് കമ്പനി പറയുന്നു. ലോകത്തിനായി ഇന്ത്യയില് നിര്മ്മിച്ചത് എന്ന തത്വശാസ്ത്രത്തെ അടിസ്ഥാനമാക്കി, വിദ്യാഭ്യാസം, ഗവേഷണം, വ്യവസായം എന്നീ മേഖലകളിലെ എല്ലാവര്ക്കും എഐ ആക്സസ് ചെയ്യാവുന്നതാക്കുക എന്നതാണ് ഈ പ്ലാറ്റ്ഫോമിന്റെ ലക്ഷ്യം.
