മഞ്ചേശ്വരം: മംഗല്പാടി ഗ്രാമപഞ്ചായത്തിലെ മണിമുണ്ട 24-ാം വാര്ഡില് മുസ്ലിം ലീഗ് സ്ഥാനാര്ത്ഥിയായ ഷമീന ടീച്ചര് എതിരില്ലാതെ തിരഞ്ഞെടുക്കപ്പെട്ടു. നാമനിര്ദ്ദേശ പത്രികകളുടെ സൂക്ഷ്മപരിശോധനയ്ക്ക് മുമ്പുതന്നെ മറ്റു രാഷ്ട്രീയകക്ഷികളില് നിന്നും സ്ഥാനാര്ത്ഥികള് ആരും പത്രിക സമര്പ്പിക്കാത്തതിനാലാണ് ഷമീന ടീച്ചറുടെ വിജയം ഉറപ്പായത്.
ബിജെപിയും ഇടതുമുന്നണിയും ഈ വാര്ഡില് സ്ഥാനാര്ത്ഥികളെ നിര്ത്താത്തത് രാഷ്ട്രീയവര്ത്തമാനങ്ങളില് ചര്ച്ചാവിഷയമായിരിക്കുകയാണ്. വാര്ഡില് ബിജെപിക്ക് ഏകദേശം 160 വോട്ടുകളും ഇടതുമുന്നണിക്ക് 200-ഓളം വോട്ടുകളും ഉണ്ടെന്നതും ഈ പശ്ചാത്തലത്തില് ശ്രദ്ധേയമാണ്.
മുസ്ലിം ലീഗിന്റെ ശക്തികേന്ദ്രമായി കണക്കാക്കപ്പെടുന്ന ഈ വാര്ഡില് കഴിഞ്ഞ തവണ ലീഗിന് പരാജയം നേരിട്ടിരുന്നു. അന്നത്തെ ഇടതുമുന്നണിയും ബിജെപിയും സ്വതന്ത്ര സ്ഥാനാര്ത്ഥിയെ പിന്തുണച്ചതോടെ ലീഗിനെതിരെ വിജയിച്ച സ്വതന്ത്രന് പിന്നീട് ലീഗ് അനുകൂല നിലപാട് സ്വീകരിച്ചിരുന്നു.
നാമനിര്ദ്ദേശ പത്രിക സമര്പ്പിക്കാനുള്ള അവസാന ദിവസമായ വെള്ളിയാഴ്ച മത്സരാര്ത്ഥിയായി ഷമീന ടീച്ചര് മാത്രം രംഗത്തുണ്ടായതോടെ മണിമുണ്ടയില് വീണ്ടും ലീഗിന്റെ പിടിമുറുക്കം ഉറപ്പിച്ചു.
