ഇടവേളയ്ക്ക് ശേഷം സംസ്ഥാനത്ത് വീണ്ടും മഴ ശക്തിപ്രാപിക്കുന്നു. തിരുവനന്തപുരം, കൊല്ലം, ആലപ്പുഴ ഒഴികെയുള്ള ജില്ലകളില് മഴ മുന്നറിയിപ്പ്. തൃശൂരില് ഓറഞ്ച് അലേര്ട്ട്. വടക്കന് കേരളത്തില് ഈ മാസം 19 വരെ ശക്തമായ മഴയ്ക്ക് സാധ്യതയുണ്ട്.
ബംഗാള് ഉള്ക്കടലിന്റെ തെക്കുപടിഞ്ഞാറന് ഭാഗം മുതല് വടക്കന് ലക്ഷദ്വീപ് പ്രദേശം വരെ വടക്കന് തമിഴ്നാട്, തെക്കന് ഉള്നാടന് കര്ണാടക, വടക്കന് കേരളം വഴി സമുദ്രനിരപ്പില് നിന്ന് 7.6 കിലോമീറ്റര് ഉയരത്തില് ന്യൂനമര്ദപാത്തി (Trough) സ്ഥിതിചെയ്യുന്നു. പശ്ചിമ ബംഗാളിലെ ഗംഗാ സമതലങ്ങള്ക്കും അതിനോട് ചേര്ന്നുള്ള ജാര്ഖണ്ഡ്, വടക്കന് ഒഡീഷ പ്രദേശങ്ങള്ക്കും മുകളിലായി ന്യൂനമര്ദം (Low Pressure Area) സ്ഥിതി ചെയ്യുന്നു. അടുത്ത 24 മണിക്കൂറിനുള്ളില് ഇത് ക്രമേണ ദുര്ബലമാകാന് സാധ്യതയും പ്രവചിക്കപ്പെടുന്നു.
കേരളത്തില് ഇന്ന് മുതല് 21 വരെയുള്ള ദിവസങ്ങളില് നേരിയതോ മിതമായതോ ആയ മഴയ്ക്ക് സാധ്യതയുണ്ട്. ഇന്ന് തൃശൂര് ജില്ലയില് ഒറ്റപ്പെട്ട സ്ഥലങ്ങളില് അതിശക്തമായതോ ആയ മഴയ്ക്കും ഇന്ന് മുതല് 19 വരെയുള്ള ദിവസങ്ങളില് കേരളത്തില് ഒറ്റപ്പെട്ട സ്ഥലങ്ങളില് ശക്തമായ മഴയ്ക്കും സാധ്യതയുണ്ട്.
