കോഴിക്കോട് വടകര MDMA കേസില് അറസ്റ്റിലായ മൂന്ന് അധ്യാപകര് ലഹരി പാര്ട്ടികള് നടത്തിയെന്ന് അന്വേഷണസംഘത്തിന്റെ കണ്ടെത്തല്. പിടിയിലായ കീര്ത്തനയുടെയും കാവ്യയുടെയും അക്കൗണ്ടില് 6 മാസത്തിനിടയില് എത്തിയത് ലക്ഷങ്ങളാണ്. ചോദ്യം ചെയ്യലില് ലഹരിയുടെ മൊത്തവിതരണക്കാരുടെ വിവരങ്ങള് പറയാന് പ്രതികള് തയ്യാറായില്ല. ലഹരി വ്യാപാര ശൃംഖലയില് മിഡില് ഏജന്റ്മാരാണ് ഇവര്.
എല്ലാം നിഷ്മയ്ക്ക് അറിയാമെന്ന് കീര്ത്തന മൊഴി നല്കി. റേഞ്ച് DIG കെ കാര്ത്തിക് ഇന്ന് വടകരയില് അന്വേഷണ സംഘത്തിന്റെ യോഗത്തില് പങ്കെടുക്കും. 10 ലക്ഷത്തിലേറെ പണം കഴിഞ്ഞ 6 മാസത്തിനകം മൂന്ന് പ്രതികളുടെയും അക്കൗണ്ടില് നേരിട്ട് എത്തിയതായി പൊലീസ് കണ്ടെത്തി.
ലഹരി മാഫിയയിലെ കണ്ണികളുമായി ബന്ധപ്പെട്ടത് ഇന്സ്റ്റഗ്രാം വഴിയെന്നാണ് പൊലീസിന്റെ കണ്ടെത്തല്. ലഹരിമാഫിയയിലെ ആളുകളാണെന്ന് അറിഞ്ഞുതന്നെയാണ് ഇവര് ബന്ധം സ്ഥാപിച്ചതെന്നാണ് വിവരം. തുടക്കത്തില് രണ്ടുപേര്ക്കും ഇവര് വഴി എം.ഡി.എം.എ. ലഭിച്ചു. പിന്നീട് വില്പ്പനയിലെ കണ്ണികളായിമാറി. വന് മാഫിയുമായി ഇവര്ക്ക് ബന്ധമുണ്ടെന്നാണ് പൊലീസ് കണ്ടെത്തല്. മംഗളൂരുവിലുള്ള ഒരു സുഹൃത്ത് വഴിയാണ് ഇവര് ആദ്യം എംഡിഎംഎ ഉപയോഗിച്ചത്. പിന്നീടാണ് വില്പ്പനക്കാരെ തേടുന്നതും ഇന്സ്റ്റഗ്രാം വഴി ബന്ധം സ്ഥാപിക്കുന്നതും. രണ്ടുപേരും അധ്യാപികമാരായതിനാല് മയക്കുമരുന്ന് മാഫിയ ഇത് പരമാവധി ഉപയോഗപ്പെടുത്തി. ഒരാള്കൂടി ഇവരുടെ സംഘത്തിലുള്ളതായി സൂചനയുണ്ട്.
