ലക്ഷ്യം ഇന്ത്യയുടെ ന്യൂസിലന്‍ഡ് പര്യടനം, മുഹമ്മദ് ഷമി രഞ്ജി ട്രോഫിക്കുള്ള ബംഗാള്‍ ടീമില്‍, അഭിഷേക് പോറെലിനും ഇടം
കൊല്‍ക്കത്ത: രഞ്ജി ട്രോഫി സീസണിലെ ആദ്യ പോരാട്ടത്തിനുള്ള 17 അംഗ ബംഗാള്‍ ടീമിനെ ക്രിക്കറ്റ് അസോസിയേഷന്‍ ഓഫ് ബംഗാള്‍ പ്രഖ്യാപിച്ചു. ഒക്ടോബര്‍ 11-ന് ഡല്‍ഹിക്കെതിരെ നടക്കുന്ന ഉദ്ഘാടന മത്സരത്തില്‍ അഭിമന്യു ഈശ്വരനാണ് ബംഗാളിനെ നയിക്കുന്നത്. സീനിയര്‍ പേസര്‍ മുഹമ്മദ് ഷമിയും യുവ വിക്കറ്റ് കീപ്പര്‍ ബാറ്റര്‍ അഭിഷേക് പോറെലും ടീമില്‍ ഇടംനേടി. ലൈംഗിക പീഡനകേസില്‍ അറസ്റ്റിലായി ജാമ്യത്തിലിറങ്ങിയതിന് പിന്നാലെയാണ് അഭിഷേക് പോറെല്‍ ടീമിലേക്ക് തിരിച്ചെത്തുന്നത്. സെപ്റ്റംബറില്‍ ജാമ്യം ലഭിച്ച താരം അസമിനെതിരായ പരിശീലന മത്സരത്തിലും ബംഗാളിനായി കളിച്ചിരുന്നു. അഭിഷേകിന് പുറമെ ഷാക്കിര്‍ ഹബീബ് ഗാന്ധിയാണ് ടീമിലെ മറ്റൊരു വിക്കറ്റ് കീപ്പര്‍.
ന്യൂസിലന്‍ഡ് പര്യടനത്തിനുള്ള ഇന്ത്യന്‍ ടെസ്റ്റ് ടീമിലേക്ക് തിരിച്ചുവരവിന് ശ്രമിക്കുന്ന മുഹമ്മദ് ഷമിയാണ് ബംഗാള്‍ പേസ് ആക്രമണം നയിക്കുന്നത്. ഷമിക്ക് പുറമെ മികച്ച ഫോമിലുള്ള മുകേഷ് കുമാര്‍, അടുത്തിടെ ഫിറ്റ്നസ് വീണ്ടെടുത്ത ആകാശ് ദീപ് എന്നിവര്‍ ഉള്‍പ്പെടുന്ന മികച്ച പേസ് നിരയാണ് ബംഗാളിന്റേത്. ഇറാനി കപ്പില്‍ ഇരുവരും മികച്ച പ്രകടനമാണ് പുറത്തെടുത്തത്. ക്യാപ്റ്റന്‍ അഭിമന്യു ഈശ്വരനും വൈസ് ക്യാപ്റ്റന്‍ സുദീപ് കുമാര്‍ ഘരാമിയുമാണ് ബാറ്റിംഗ് നിരയുടെ പ്രധാന കരുത്ത്. ദുലീപ് ട്രോഫിയില്‍ ഈസ്റ്റ് സോണിനെ വിജയത്തിലേക്ക് നയിച്ചതില്‍ ഇരുവരും നിര്‍ണായക പങ്കുവഹിച്ചിരുന്നു. കഴിഞ്ഞ സീസണോടെ അനുസ്തുപ് മജുംദാര്‍ വിരമിച്ചതിനാല്‍ ബാറ്റിംഗില്‍ വലിയ ഉത്തരവാദിത്തമാണ് ഇവര്‍ക്കുള്ളത്.
കഴിഞ്ഞ സീസണ്‍ രഞ്ജി ട്രോഫിയില്‍ സെമിഫൈനലില്‍ വരെ എത്തിയെങ്കിലും ജമ്മു കശ്മീരിനോട് തോറ്റ് ബംഗാള്‍ പുറത്താകുകയായിരുന്നു. ഇത്തവണ ഗ്രൂപ്പ് സിയിലാണ് ബംഗാള്‍ ഉള്‍പ്പെട്ടിരിക്കുന്നത്. ഡല്‍ഹി, ഗുജറാത്ത്, ജാര്‍ഖണ്ഡ്, കേരളം, മഹാരാഷ്ട്ര, ഒഡീഷ, സര്‍വീസസ് എന്നിവരാണ് ഗ്രൂപ്പിലെ മറ്റ് ടീമുകള്‍.
രഞ്ജി ട്രോഫിക്കുള്ള ബംഗാള്‍ ടീം: അഭിമന്യു ഈശ്വരന്‍ (ക്യാപ്റ്റന്‍), സുദീപ് ഘരാമി (വൈസ് ക്യാപ്റ്റന്‍), സുദീപ് ചാറ്റര്‍ജി, അങ്കുര്‍ പോള്‍, അങ്കിത് ശുക്ല, അഭിഷേക് പോറെല്‍, ഷാക്കിര്‍ ഗാന്ധി, ശുഭം ചാറ്റര്‍ജി, സുമന്ത ഗുപ്ത, മുഹമ്മദ് ഷമി, ആകാശ് ദീപ്, മുകേഷ് കുമാര്‍, പ്രദീപ്ത പ്രമാണിക്, ആമിര്‍ ഗാനി, മുഹമ്മദ് കൈഫ്, സൂരജ് സിന്ധു ജയ്സ്വാള്‍, സൗമ്യദീപ് മൊണ്ടാല്‍.
Related Posts
പൂജാരയുടെ ലോക ഏകദിന ഇലവനെ രോഹിത് നയിക്കും, ഗില്‍ ഓപ്പണര്‍; ന്യൂസിലന്‍ഡ് ടെസ്റ്റിനുള്ള ടീമിലും സര്‍പ്രൈസുകള്‍
KCN CHANNEL
വനിതാ പ്രീമിയര്‍ ലീഗ് താരലേലം ബുധനാഴ്ച്ച കൊച്ചിയില്‍; കേരളത്തില്‍ നിന്ന് മൂന്ന് താരങ്ങള്‍ പട്ടികയില്‍
KCN CHANNEL
ബ്ലാസ്റ്റേഴ്‌സിന്റെ ഹോം മാച്ച് പ്രതിസന്ധി ഒഴിഞ്ഞു; മത്സരം കൊച്ചിയില്‍ തന്നെ
KCN CHANNEL