സിസിടിവി സൗകര്യമില്ലാത്ത ഒരു സ്‌കൂളിനെയും പരീക്ഷാ കേന്ദ്രമായി പരിഗണിക്കില്ലെന്ന് സിബിഎസ്ഇ
ദില്ലി: സിബിഎസ്ഇ (സെന്‍ട്രല്‍ ബോര്‍ഡ് ഓഫ് സെക്കന്‍ഡറി എജ്യുക്കേഷന്‍) 10, 12 പരീക്ഷ നടക്കുന്ന കേന്ദ്രങ്ങളില്‍ സിസിടിവി നിര്‍ബന്ധമാക്കി. സിസിടിവി സൗകര്യമില്ലാത്ത ഒരു സ്‌കൂളിനെയും പരീക്ഷാ കേന്ദ്രമായി പരിഗണിക്കില്ലെന്ന് സിബിഎസ്ഇ വ്യക്തമാക്കി. നിരീക്ഷണം കര്‍ശനമാക്കി പരീക്ഷകളുടെ സുഗമവും നീതിയുക്തവുമായ നടത്തിപ്പ് ഉറപ്പാക്കുകയാണ് ലക്ഷ്യമെന്ന് സിബിഎസ്ഇ അറിയിച്ചു.
2024 – 25 വര്‍ഷത്തില്‍ രാജ്യത്താകെ 44 ലക്ഷം വിദ്യാര്‍ത്ഥികള്‍ സിബിഎസ്ഇ 10, 12 ബോര്‍ഡ് പരീക്ഷ എഴുതും. 8,000ത്തോളം സ്‌കൂളുകളിലായാണ് പരീക്ഷ നടക്കുക. പരീക്ഷാ കാലയളവിലുടനീളം കേന്ദ്രങ്ങളില്‍ ഉയര്‍ന്ന റെസല്യൂഷനുള്ള ദൃശ്യം തുടര്‍ച്ചയായി റെക്കോര്‍ഡ് ചെയ്യപ്പെടുന്നുണ്ടെന്ന് ഉറപ്പാക്കണം. പരീക്ഷ നടക്കുന്ന ക്ലാസ് മുറികളുടെ പൂര്‍ണമായ ദൃശ്യം ലഭിക്കുന്ന വിധത്തില്‍ ക്യാമറകള്‍ സ്ഥാപിക്കണം.
സിസിടിവി സ്ഥാപിക്കുന്നതിനെ കുറിച്ച് എല്ലാ വിദ്യാര്‍ത്ഥികളെയും അധ്യാപകരെയും അറിയിക്കണമെന്ന് സിബിഎസ്ഇ നിര്‍ദേശം നല്‍കി. റെക്കോര്‍ഡ് ചെയ്യുന്ന ദൃശ്യങ്ങളുടെ രഹസ്യ സ്വഭാവം സംരക്ഷിക്കണം. ദൃശ്യങ്ങള്‍ അംഗീകൃത ഉദ്യോഗസ്ഥര്‍ക്ക് മാത്രമേ കാണാനാവൂ. ഫലപ്രഖ്യാപനത്തിന് ശേഷം രണ്ട് മാസം വരെ ഈ ദൃശ്യങ്ങള്‍ സൂക്ഷിക്കുമെന്നും സിബിഎസ്ഇ അറിയിച്ചു. പരീക്ഷാ നടത്തിപ്പ് നീതിയുക്തവും സുതാര്യവുമാണെന്ന് ഉറപ്പാക്കാന്‍ ഓരോ 10 പരീക്ഷാ മുറികള്‍ക്കും അല്ലെങ്കില്‍ 240 വിദ്യാര്‍ത്ഥികള്‍ക്കായി ഒരു വ്യക്തിയെ നിയോഗിക്കുമെന്നും സിബിഎസ്ഇ വ്യക്തമാക്കി.
ദേശീയ വിദ്യാഭ്യാസ നയം 2020ന്റെ ലക്ഷ്യങ്ങളെ പ്രതിഫലിപ്പിച്ചു കൊണ്ടാണ് സുഗമമായ പരീക്ഷാ നടത്തിപ്പിനായി ഈ മാറ്റം കൊണ്ടുവരുന്നതെന്ന് സിബിഎസ്ഇ അറിയിച്ചു. ഫെബ്രുവരി പകുതിയോടെയാവും ഈ അധ്യയന വര്‍ഷത്തിലെ പരീക്ഷ നടത്തുക. ഔദ്യോഗികമായി പരീക്ഷാ തിയ്യതി സിബിഎസ്ഇ അറിയിച്ചിട്ടില്ല.
