ഇന്ന് ലോകമെമ്പാടുമുള്ള ആളുകള്ക്കിടയില് ‘സൂപ്പര്ഫുഡ്’ തരംഗമാണ് അലയടിക്കുന്നത്. ആരോഗ്യകരമായ ജീവിതശൈലി പിന്തുടരാനായി നമ്മള് പലപ്പോഴും വിലയേറിയതും ഇറക്കുമതി ചെയ്തതുമായ ഭക്ഷണങ്ങള് തേടിപ്പോകാറുണ്ട്. ഇന്സ്റ്റാഗ്രാമിലും മറ്റും താരമായി തിളങ്ങിനില്ക്കുന്ന അവാക്കാഡോ അത്തരത്തിലൊരു ഉദാഹരണമാണ്.
ഇന്ത്യയില് തിളങ്ങി നില്ക്കുന്ന താരമാണ് നെല്ലിക്ക. അവാക്കാഡോയും നെല്ലിക്കയും അവരുടേതായ പ്രത്യേകതകള് കൊണ്ട് സമ്പന്നമാണ്. പാരമ്പര്യ വൈദ്യത്തില് സഹസ്രാബ്ദങ്ങളുടെ പ്രതാപമുള്ള നെല്ലിക്ക ഒരുവശത്ത്, ആരോഗ്യകരമായ കൊഴുപ്പിന്റെ പേരില് ആധുനിക ഡയറ്റീഷ്യന്മാരുടെ പ്രിയങ്കരനായ അവാക്കാഡോ മറുവശത്ത്.
കാഴ്ചയിലും രുചിയിലും തീര്ത്തും വ്യത്യസ്തരായ ഈ രണ്ട് പഴങ്ങള് ആരോഗ്യ ഗുണങ്ങളുടെ കാര്യത്തില് ആര്ക്കാണ് മുന്തൂക്കം നല്കുന്നത്? ഇവയുടെ പോഷകമൂല്യങ്ങള് താരതമ്യം ചെയ്യുമ്പോള് ലഭിക്കുന്ന വിവരങ്ങള് നമ്മളെ അത്ഭുതപ്പെടുത്തും എന്നതില് സംശയമില്ല.
പോഷകങ്ങളുടെ സമൃദ്ധി:
നെല്ലിക്കയെ ഒരു ‘പോഷക പവര്ഹൗസ്’ എന്ന് വിളിക്കുന്നതില് അതിശയോക്തിയില്ല. അതില് ഏറ്റവും പ്രധാനം അതിശയിപ്പിക്കുന്ന വൈറ്റമിന് സി യുടെ അളവാണ്. ഒരു സാധാരണ നെല്ലിക്കയില് ഒരു ദിവസം ആവശ്യമുള്ളതിന്റെ 600% മുതല് 800% വരെ വൈറ്റമിന് സി അടങ്ങിയിരിക്കുന്നു. ഇത് ശരീരത്തിന്റെ പ്രതിരോധശേഷി വര്ദ്ധിപ്പിക്കുന്നതില് നിര്ണായക പങ്ക് വഹിക്കുന്നു.
ഒപ്പം തന്നെ നെല്ലിക്കയില് ധാരാളമായി കാണപ്പെടുന്ന പോളിഫെനോളുകള്, ആന്റിഓക്സിഡന്റുകള് എന്നിവ ശരീരത്തിലെ ഓക്സീകരണ സമ്മര്ദ്ദം കുറയ്ക്കുന്നതിനും, കോശങ്ങള്ക്ക് കേടുപാടുകള് സംഭവിക്കുന്നത് തടയുന്നതിനും സഹായിക്കുന്നു. എന്നാല് അവാക്കാഡോയുടെ കാര്യത്തില് വൈറ്റമിന് സി യുടെ അളവ് വളരെ കുറവാണ്, ഏകദേശം 10-22 മില്ലിഗ്രാം മാത്രം. അതുകൊണ്ട്, പ്രതിരോധശേഷി വര്ദ്ധിപ്പിക്കുന്നതിനും അകാല വാര്ദ്ധക്യം തടയുന്നതിനും നെല്ലിക്ക തന്നെയാണ് മുന്നിട്ട് നില്ക്കുന്നത്.
അവാക്കാഡോയുടെ ‘നല്ല കൊഴുപ്പ്’
അവാക്കാഡോയുടെ പ്രധാന ശക്തി അതില് അടങ്ങിയിട്ടുള്ള ആരോഗ്യകരമായ കൊഴുപ്പാണ്, പ്രത്യേകിച്ചും മോണോഅണ്സാച്ചുറേറ്റഡ് ഫാറ്റി ആസിഡുകള്. ഹൃദയാരോഗ്യം മെച്ചപ്പെടുത്തുന്നതില് ഈ കൊഴുപ്പുകള്ക്ക് സുപ്രധാന പങ്കുണ്ട്. ഇവ ചീത്ത കൊളസ്ട്രോളായ എല് ഡി എല് കുറയ്ക്കാനും നല്ല കൊളസ്ട്രോളായ എച്ച് ഡി എല് കൂട്ടാനും സഹായിക്കുന്നു.
കൂടാതെ, അവാക്കാഡോയില് വൈറ്റമിന് ഇ, വൈറ്റമിന് കെ, പൊട്ടാസ്യം, ഫോളേറ്റ് തുടങ്ങിയ അവശ്യ പോഷകങ്ങളും ധാരാളമായി അടങ്ങിയിരിക്കുന്നു. പേശികളുടെ പ്രവര്ത്തനം, നാഡീവ്യൂഹം, കോശങ്ങളുടെ കേടുപാടുകള് തീര്ക്കല് തുടങ്ങിയ പ്രക്രിയകള്ക്ക് ഈ പോഷകങ്ങള് അത്യന്താപേക്ഷിതമാണ്.
കൊഴുപ്പിന്റെ അളവ് താരതമ്യം ചെയ്യുമ്പോള് നെല്ലിക്കയില് ഇത് വളരെ കുറവാണ്. അതിനാല്, കൊഴുപ്പ് അംശം കൂടുതലുള്ളതോ കലോറി ആവശ്യമുള്ളതോ ആയ ഭക്ഷണക്രമം പിന്തുടരുന്നവര്ക്ക് അവാക്കാഡോ ഒരു മികച്ച തിരഞ്ഞെടുപ്പാണ്.
മറ്റു ആരോഗ്യഗുണങ്ങള്
നെല്ലിക്കക്ക് പ്രമേഹത്തെ നിയന്ത്രിക്കാനും ഉപാപചയ പ്രവര്ത്തനങ്ങള് മെച്ചപ്പെടുത്താനുമുള്ള കഴിവുണ്ടെന്ന് പഠനങ്ങള് പറയുന്നു. ഇതിലെ ആന്റിഓക്സിഡന്റുകള് രക്തത്തിലെ പഞ്ചസാരയുടെ അളവ് സ്ഥിരപ്പെടുത്താന് സഹായിക്കുന്നു. ദഹന പ്രക്രിയയെ സഹായിക്കുന്ന നാരുകളും നെല്ലിക്കയില് ഉണ്ട്.
അതേസമയം, അവാക്കാഡോയിലെ നാരുകളുടെ അളവും വളരെ കൂടുതലാണ്. ഇത് ദഹനവ്യവസ്ഥയുടെ സുഗമമായ പ്രവര്ത്തനത്തിനും മലബന്ധം തടയുന്നതിനും സഹായിക്കുന്നു. കൂടാതെ, അവാക്കാഡോ കഴിക്കുന്നത് വയറ് നിറഞ്ഞിരിക്കുന്ന തോന്നല് നല്കുന്നതിനാല് ഇത് ഭാരം നിയന്ത്രിക്കുന്നതിനും സഹായകമായേക്കാം.
സാമ്പത്തികവും പാരിസ്ഥിതികവുമായ ഘടകങ്ങള്
പോഷകഗുണങ്ങള്ക്കപ്പുറം, ഈ താരതമ്യത്തില് പരിഗണിക്കേണ്ട മറ്റൊരു സുപ്രധാന ഘടകമാണ് ഇവയുടെ ലഭ്യതയും വിലയും. നെല്ലിക്ക ഇന്ത്യയില് പ്രാദേശികമായി വളരുന്നതും വര്ഷം മുഴുവനും എളുപ്പത്തില് ലഭ്യമാകുന്നതുമാണ്, മാത്രമല്ല ഇതിന് വില തീരെ കുറവുമാണ്. ഒരു അവാക്കാഡോ വാങ്ങാന് ചെലവഴിക്കുന്ന തുകയ്ക്ക് ഏകദേശം ഒരു കിലോയോളം നെല്ലിക്ക വാങ്ങാന് സാധിക്കും!
മറുവശത്ത്, അവാക്കാഡോ പലപ്പോഴും ഇറക്കുമതി ചെയ്യുന്നതിനാല് വില വളരെ കൂടുതലാണ്. മാത്രമല്ല, അവാക്കാഡോ കൃഷിക്ക് അമിതമായ ജലം ആവശ്യമാണ്, ഇത് പാരിസ്ഥിതികപരമായ ചില പ്രശ്നങ്ങളിലേക്ക് വിരല്ചൂണ്ടുന്നു. അതുകൊണ്ട്, സാമ്പത്തികമായും പാരിസ്ഥിതികമായും നെല്ലിക്കയാണ് നമ്മുടെ നാട്ടിലെ ഉപഭോക്താവിന് കൂടുതല് അനുയോജ്യമായത്.
സൂപ്പര്ഫുഡ് കിരീടം ആര്ക്ക്?
നെല്ലിക്കയും അവാക്കാഡോയും അവരുടേതായ രീതിയില് സൂപ്പര്ഫുഡുകളാണ്. ഹൃദയാരോഗ്യത്തിനും ആരോഗ്യകരമായ കൊഴുപ്പിനും ഊര്ജ്ജത്തിനും പ്രാധാന്യം നല്കുന്നവര്ക്ക് അവാക്കാഡോ ഒരു മികച്ച ഓപ്ഷനാണ്.
എന്നാല്, പ്രതിരോധശേഷി, വൈറ്റമിന് സി, ആന്റിഓക്സിഡന്റ് എന്നിവയുടെ കാര്യത്തില് നെല്ലിക്കയാണ് കേമന്. താരതമ്യേന കുറഞ്ഞ കലോറിയും, മികച്ച രോഗപ്രതിരോധ ശേഷി നല്കാനുള്ള കഴിവും, പ്രാദേശികമായി ലഭ്യതയും, കുറഞ്ഞ വിലയും കാരണം ഇന്ത്യന് സാഹചര്യത്തില് നെല്ലിക്കയാണ് ഒരുപടി മുന്നില് നില്ക്കുന്നത് എന്ന് നിസ്സംശയം പറയാം.
ആരോഗ്യകരമായ കൊഴുപ്പിന്റെ കുറവ് ഒഴിച്ചു നിര്ത്തിയാല്, മിക്ക പോഷകങ്ങളുടെയും കാര്യത്തില് ഈ ‘ദേശി സൂപ്പര്ഫുഡ്’ വിദേശ താരത്തെ പിന്നിലാക്കുന്നു. ഇവ രണ്ടും ഭക്ഷണത്തില് ഉള്പ്പെടുത്തുന്നത് നല്ലതാണ്, പക്ഷെ ഇവയില് ഏതെങ്കിലും ഒന്നിനെ തിരഞ്ഞെടുക്കേണ്ടി വന്നാല്, നെല്ലിക്കയാണ് കൂടുതല് പേര്ക്ക് ആശ്രയിക്കാവുന്നതും പോക്കറ്റിന് ഇണങ്ങിയതുമായ യഥാര്ത്ഥ സൂപ്പര്ഫുഡ്.
