മോദിയെയും പാർലമെന്റിനെയും ലക്ഷ്യമിട്ട് ലഷ്കറെ ഭീകരർ; രാജ്യത്ത് സുരക്ഷ ശക്തം

ന്യൂഡൽഹി: പ്രധാനമന്ത്രി നരേന്ദ്ര മോദി, പാർലമെന്റ് മന്ദിരം, സൈനിക ആസ്ഥാനങ്ങൾ, ആണവനിലയങ്ങൾ എന്നിവയെ ലക്ഷ്യമിട്ട് ലഷ്കറെ തയിബ ആക്രമണത്തിന് പദ്ധതിയിട്ടതായി രഹസ്യാന്വേഷണ വിഭാഗത്തിന്റെ മുന്നറിയിപ്പ്. പുതുവർഷ ആഘോഷത്തിനിടെ രാജ്യത്ത് ആക്രമണം നടത്താനും ശ്രമമുണ്ടെന്നാണ് റിപ്പോർട്ട്.പരിശീലനം ലഭിച്ച ഭീകരർ അതിർത്തി വഴി നുഴഞ്ഞു കയറിയിട്ടുണ്ടെന്നാണ് രഹസ്യാന്വേഷണ ഏജൻസിക്ക് ലഭിച്ചിട്ടുള്ള വിവരം. ആക്രമണ സാധ്യതകൾ മുൻനിർത്തി സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും ജാഗ്രത നിർദേശം നൽകിയിട്ടുണ്ട്.തിരക്കുള്ള പ്രദേശങ്ങൾ റയിൽവേ സ്റ്റേഷൻ, ബസ് ടെർമിനലുകൾ, ആരാധനാലയങ്ങൾ തുടങ്ങിയ സ്ഥലങ്ങളിൽ സുരക്ഷ ശക്തമാക്കാൻ നേരത്തെ നിർദേശം നൽകിയിരുന്നു. പുതുവർഷ ആഘോഷങ്ങളോടനുബന്ധിച്ച് ഡൽഹി, മുംബൈ, കൊൽക്കത്ത, ചെന്നൈ, ബെംഗളൂരു, ഹൈദരാബാദ് തുടങ്ങിയ പ്രധാന നഗരങ്ങളിലെ സുരക്ഷ കർശനമാക്കി.