മുണ്ടക്കൈ- ചൂരല്‍മല പുനരധിവാസ പട്ടികയിലെ ഇരട്ടിപ്പ് കൃത്യമായി പരിശോധിക്കുമെന്ന് റവന്യൂ മന്ത്രി കെ രാജന്‍. ഇരട്ടിപ്പ് വന്ന ഒരു പേരുകളും പട്ടികയില്‍ ഇനി ഉണ്ടാകില്ല, തയ്യാറാക്കിയ ലിസ്റ്റില്‍ ഉണ്ടായിരിക്കുന്ന പാകപ്പിഴകളെക്കുറിച്ച് അന്വേഷിച്ച് റിപ്പോര്‍ട്ട് സമര്‍പ്പിക്കാന്‍ ജില്ലാ കളക്ടര്‍ക്ക് നിര്‍ദ്ദേശം നല്‍കിയിട്ടുണ്ട്. ഉദ്യോഗസ്ഥരുടെ ഭാഗത്തുനിന്നുണ്ടായ വീഴ്ച ഒരു ചെറിയ കാര്യമായി കാണുന്നില്ലെന്ന് മന്ത്രിപറഞ്ഞു.
പുറത്തു വന്ന ലിസ്റ്റ് ഉദ്യോഗസ്ഥ തലത്തില്‍ മാത്രമല്ല ജില്ലാ കളക്ടര്‍ ചെയര്‍മാനും ജില്ലാ പഞ്ചായത്ത് പ്രസിഡന്റ വൈസ് ചെയര്‍മാനും എല്ലാ വകുപ്പുകളുടെയും മേധാവികളും ഉള്‍പ്പെടുന്ന DDMA പരിശോധിച്ച ശേഷമാണ് ഈ റിപ്പോര്‍ട്ട് പുറത്തുവന്നിട്ടുള്ളത്.ജില്ലാ ഭരണകൂടം തയ്യാറാക്കിയ കണക്കും മേപ്പാടി ഗ്രാമ പഞ്ചായത്ത് തയ്യാറാക്കിയിട്ടുള്ള ലിസ്റ്റും തമ്മില്‍ യോജിപ്പിച്ചപ്പോള്‍ ചില പേരുകളില്‍ ഇരട്ടിപ്പുണ്ടായി മറ്റുചിലരുടെ ഫോണ്‍ നമ്പര്‍ തന്നെ വ്യത്യസ്തമായി രേഖകളില്‍ വരുന്ന സാഹചര്യം ഉണ്ടായി. ഇരട്ടിപ്പുണ്ടായത് ഉദ്യോഗസ്ഥന്മാരുടെ ഗൗരവകുറവാണെങ്കില്‍ കര്‍ശനമായിട്ടുള്ള ഇടപെടലുമായി സര്‍ക്കാര്‍ മുന്നോട്ട് പോകും, മന്ത്രി വ്യക്തമാക്കി.
അപകട മേഖലയില്‍ ഉള്‍പ്പെട്ടവര്‍ക്ക് പുനരധിവാസം രണ്ടാംഘട്ടത്തിലായിരിക്കും. സാങ്കേതികമായ ഇരട്ടിപ്പ് ഒറ്റയടിക്ക് DDMA ചേര്‍ന്ന് ഒഴിവാക്കാന്‍ സാധിക്കുന്നതാണ്. ലിസ്റ്റില്‍ വിട്ടുപോയ പേരുകള്‍, അനധികൃതമായി കടന്നുകൂടിയവര്‍ ഇതൊക്കെ പരിഹരിക്കാനായി ജനുവരി 10 വരെ സമയം അനുവദിച്ചിട്ടുണ്ട്. ഈ സമയം കഴിഞ്ഞാല്‍ സബ് കളക്ടര്‍ ഒരു തദ്ദേശ ഉദ്യോഗസ്ഥനെയും റവന്യൂ ഉദ്യോഗസ്ഥനെയും സാന്നിധ്യത്തില്‍ നേരിട്ട് പോയി ഇടങ്ങള്‍ പരിശോധിച്ച് ബോധ്യപ്പെട്ട് DDMA കൂടിയാണ് അന്തിമ ലിസ്റ്റ് തയ്യാറാക്കുന്നത്. അതുകൊണ്ടുതന്നെ യാതൊരു തരത്തിലെ ആശങ്കയും ഇക്കാര്യത്തില്‍ വേണ്ട. ഇക്കാര്യങ്ങളില്‍ പരാതികള്‍ ഉണ്ടെങ്കില്‍ മന്ത്രിയുടെ ഓഫിസുമായോ സര്‍ക്കാരുമായോ ബന്ധപ്പെടേണ്ട സാഹചര്യം ഉണ്ടാകുന്നത്. ലയങ്ങളില്‍ താമസിക്കുന്നവരടക്കമുള്ള ഒരു ദുരന്ത ബാധിതരായ ഒരാളെപ്പോലും ലിസ്റ്റില്‍ വിട്ടുപോകില്ല. കരടെന്ന ലിസ്റ്റ് ഇനി തെളിമയുള്ള ലിസ്റ്റായി തന്നെ വീണ്ടും എത്തുമെന്ന് മന്ത്രി ഉറപ്പു നല്‍കി.
