കാസര്കോട്, ജൂലൈ 2, 2026: മെഡിക്കല് പ്രവര്ത്തകര്ക്കും യുവപ്രതിഭകളെയും ആദരിച്ച് ഐഎംഎ (IMA) കാസര്കോട് ബ്രാഞ്ച് ദേശീയ ഡോക്ടേഴ്സ് ഡേ ആഘോഷിച്ചു. ഐഎംഎ പ്രസിഡന്റ് ഡോ. രേഖാ റായ് അധ്യക്ഷത വഹിച്ച ചടങ്ങ് കണ്ണൂര് സര്വകലാശാല മുന് വൈസ് ചാന്സലര് ഡോ. എം. കെ. അബ്ദുള് ഖാദര് ഉദ്ഘാടനം ചെയ്തു.
ഡോക്ടര്മാര് സമൂഹത്തിന് നല്കുന്ന സേവനങ്ങളെ പ്രശംസിച്ച അദ്ദേഹം, ഈ വര്ഷത്തെ ഡോക്ടേഴ്സ് ഡേ സന്ദേശമായ ‘Behind the Mask – Who Heals the Healers?’ എന്ന ആശയം പരാമര്ശിച്ചു. മറ്റുള്ളവരുടെ ആരോഗ്യം സംരക്ഷിക്കുന്ന ഡോക്ടര്മാര് സ്വന്തം ആരോഗ്യത്തിനും കുടുംബത്തിനുമായി സമയം കണ്ടെത്തേണ്ടതിന്റെ ആവശ്യകതയും ചൂണ്ടിക്കാട്ടി.
ചടങ്ങിന്റെ ഭാഗമായി ആരോഗ്യരംഗത്ത് ദീര്ഘകാലം സേവനമനുഷ്ഠിച്ച രണ്ട് മുതിര്ന്ന ഡോക്ടര്മാരെ ആദരിച്ചു:വിരമിച്ച സിവില് സര്ജന് ഡോ. ഈശ്വര നായിക്, മുതിര്ന്ന ശിശുരോഗ വിദഗ്ധന് ഡോ. മഹമൂദ് തെരുവത്ത്
പാരാമെഡിക്കല് രംഗത്ത് മികച്ച സേവനം അനുഷ്ഠിച്ചവര്ക്ക് എന്ഡോവ്മെന്റ് പുരസ്കാരങ്ങളും വിതരണം ചെയ്തു. ഡോ. ബി. എസ്. റാവു എന്ഡോവ്മെന്റ് അവാര്ഡ് സഹകരണ ആശുപത്രി മുള്ളേരിയയിലെ വിരമിച്ച നഴ്സിംഗ് സൂപ്രണ്ട് ശ്രീമതി സാലി ബാബുവിന് സമ്മാനിച്ചു.
ക്യാപ്റ്റന് കെ. എ. ഷെട്ടി എന്ഡോവ്മെന്റ് അവാര്ഡ് ആരോഗ്യവകുപ്പിലെ വിരമിച്ച നഴ്സിംഗ് സൂപ്രണ്ട് ശ്രീമതി മിനി ജോസഫിന് നല്കി.
മികച്ച നേട്ടങ്ങള്: ഡോ. ചേതന സി. എസ്. (MRCS അന്താരാഷ്ട്ര തലത്തില് ഒന്നാം റാങ്ക്), ശ്രീ. രഞ്ജിത്ത് ഭൂഷണ് (വിശിഷ്ട റെയില് സേവാ പുരസ്കാരം 2026), ഡോ. ദേവാന്ഷ് റായ് (ദേശീയ മഹാസ്വിം ഗോള്ഡ് മെഡല്) എന്നിവരെ അനുമോദിച്ചു.
ഐ.എം.എ അംഗങ്ങളുടെ മക്കളില് വിവിധ മേഖലകളില് മികവ് തെളിയിച്ച മാസ്റ്റര് മിഫ്സല്, മാസ്റ്റര് ഈഷാന്, മാസ്റ്റര് ജ്യേഷ്ഠ കെ., മാസ്റ്റര് മുഹമ്മദ് അമീന്, ഡോ. സൗരഭ പി. എന്. എന്നിവരെയും ചടങ്ങില് ആദരിച്ച് പുരസ്കാരങ്ങള് വിതരണം ചെയ്തു.
വൈസ് പ്രസിഡന്റ് ഡോ. നബീസ പി. കെ. സ്വാഗതം പറഞ്ഞ ചടങ്ങില് ഐഎംഎ കാസര്കോട് ബ്രാഞ്ച് സെക്രട്ടറി ഡോ. അണ്ണാപ്പ കാമത്ത് കെ. നന്ദി രേഖപ്പെടുത്തി. ചടങ്ങില് ഡോ. ബി. നാരായണ നായിക് (നോര്ത്ത് സോണ് ഇ.എല്.എസ്. കോ-ഓര്ഡിനേറ്റര്), ഡോ. ജനാര്ദ്ദന നായിക് സി. എച്ച്. (ജില്ലാ ചെയര്പേഴ്സണ്), ഡോ. ഖാസിം ടി. (ജില്ലാ കണ്വീനര്) എന്നിവരും ആശംസകള് നേര്ന്നു. ആരോഗ്യരംഗത്തെ മികവിനെയും സമര്പ്പിത സേവനത്തെയും ആദരിക്കുന്നതോടൊപ്പം, പുതുതലമുറ മെഡിക്കല് പ്രൊഫഷണലുകളെ പ്രചോദിപ്പിക്കാനുള്ള ഐ.എം.എ കാസര്കോട് ശാഖയുടെ പ്രതിബദ്ധത ഈ ആഘോഷത്തിലൂടെ വീണ്ടും തെളിയിക്കപ്പെട്ടു.
