സംസ്ഥാനത്തെ പൊലീസ് സ്റ്റേഷന് ഭരണത്തില് സമഗ്രമായ മാറ്റം വരുന്നു. ഭൂരിഭാഗം സ്റ്റേഷനുകളുടെയും ഭരണം ഇനി സബ് ഇന്സ്പെക്ടര്മാര്ക്ക് (എസ്ഐ) ആയിരിക്കും. ‘എന്റെ പൊലീസ് സ്റ്റേഷന്’ എന്ന പുതിയ പദ്ധതിയിലൂടെ പൊലീസിനെ കൂടുതല് ജനകീയമാക്കാനും ശാസ്ത്രീയ അന്വേഷണ രീതികള് നടപ്പിലാക്കാനും സര്ക്കാര് ലക്ഷ്യമിടുന്നു.
തിരുവനന്തപുരം: സംസ്ഥാനത്ത് ഇന്ന് മുതല് പൊലീസ് സ്റ്റേഷന് ഭരണത്തില് സമഗ്ര മാറ്റം. സ്റ്റേഷന് ഭരണം ഇന്നു മുതല് എസ്ഐമാര് ഏറ്റെടുക്കും. വളരെ പ്രധാനപ്പെട്ട 64 പൊലീസ് സ്റ്റേഷനുകളില് മാത്രമായിരിക്കും ഇന്സ്പെക്ടര്മാര് എസ്എച്ച്ഒമാരായി തുടരുക. പൊലീസിനെ ജനകീയമാക്കാനുള്ള എന്റെ പൊലീസ് സ്റ്റേഷന് പദ്ധതി മുഖ്യമന്ത്രി വി ഡി സതീശന് ഇന്ന് തലസ്ഥാനത്ത് ഉദ്ഘാടനം ചെയ്യും.
കേരള പൊലീസ് സംവിധാനത്തില് പൊലീസ് സ്റ്റേഷനുകളുടെ മുഖച്ഛായ മാറ്റുന്ന കര്മ്മ പദ്ധതിക്ക് നേതൃത്വം നല്കുകയാണ് സര്ക്കാറെന്നും കേരള പൊലീസിനെ സംബന്ധിച്ച് ചരിത്രപരമായ തീരുമാനമാണിതെന്നും ആഭ്യന്തര മന്ത്രി രമേശ് ചെന്നിത്തല പറഞ്ഞിരുന്നു. ഇന്ത്യയില് ആദ്യമായിട്ടായിരിക്കും പൊലീസ് സ്റ്റേഷന് കേന്ദ്രീകരിച്ചുള്ള പൊലീസ് പരിഷ്കരണത്തിന് ഇത്തരത്തില് നേതൃത്വം കൊടുക്കുന്നതെന്നും ജനങ്ങള്ക്ക് കൂടുതല് മെച്ചപ്പെട്ട സേവനങ്ങള് നല്കുകയാണ് ലക്ഷ്യമെന്നും മന്ത്രി പറഞ്ഞിരുന്നു.
കസ്റ്റഡി മര്ദ്ദനങ്ങളും അനധികൃത തടവുകളും പൂര്ണ്ണമായി ഒഴിവാക്കി ശാസ്ത്രീയമായ അന്വേഷണ രീതികള് നടപ്പിലാക്കുന്നതിനാണ് സര്ക്കാറിന്റെ പ്രഥമ പരി?ഗണന. ഉയര്ന്ന ഉദ്യോഗസ്ഥരടക്കം പൊതുജനങ്ങളോട് മാന്യമായി പെരുമാറുന്നതിനുള്ള പ്രത്യേക പരിശീലനം നല്കും. 20 വര്ഷം പിന്നിട്ട ജനമൈത്രി സുരക്ഷാ പദ്ധതി കൂടുതല് ആധുനികവല്ക്കരിക്കാനും തീരുമാനമായി. പൊതുജനങ്ങളില് നിന്ന് പ്രതിമാസ അഭിപ്രായങ്ങള് സ്വീകരിക്കുന്നതിനായി ഡി.ഐ.ജിമാരുടെ നേതൃത്വത്തില് സ്വതന്ത്ര സംവിധാനം വരും. പരാതികളുടെ എണ്ണം, എഫ്.ഐ.ആര് രജിസ്റ്റര് ചെയ്യല് എന്നിവ ഡി.ജി.പിയുടെ നേതൃത്വത്തില് ഡിജിറ്റലായി നിരീക്ഷിക്കുക തുടങ്ങിയവയാണ് നടപ്പാക്കുന്ന പ്രധാന മാറ്റങ്ങള്.
