ജഡ്ജിയുടെ മകന്‍ അല്ല ആരായാലും നിയമം എല്ലാവര്‍ക്കും ഒന്ന്; തെറ്റ് ചെയ്ത പൊലീസുകാര്‍ക്കെതിരെ ഇന്ന് തന്നെ നടപടി ഉണ്ടാകും, ആഭ്യന്തരമന്ത്രി

തിരുവനന്തപുരം: ചേരാനല്ലൂര്‍ വാഹനാപകടം നിയമസഭയില്‍ ഉന്നയിച്ച് ആഭ്യന്തര മന്ത്രി രമേശ് ചെന്നിത്തല. സംഭവത്തില്‍ സര്‍ക്കാരിന് ഒന്നും ഒളിപ്പിക്കാനില്ല ശക്തമായ നടപടി ഇക്കാര്യത്തില്‍ സ്വീകരിച്ചിട്ടുള്ളതാണ്. സംഭവം നടന്നയുടന്‍ സ്ഥലം എംഎല്‍എ തന്നെ ഫോണില്‍ വിളിച്ചാണ് കാര്യം പറയുന്നത്. അപ്പോള്‍ തന്നെ മനസ്സിലായിരുന്നു പൊലീസിന്റെ ഭാഗത്ത് നിന്ന് വീഴ്ചയുണ്ടായിട്ടുണ്ടെന്ന്. ഡിജിപിയുമായി ബന്ധപ്പെടുയുകയും ജാമ്യം ലഭിക്കുന്ന വകുപ്പ് ചുമത്തിയത് എന്ത് അടിസ്ഥാനത്തിലായിരുന്നുവെന്നും ചോദിച്ചു. അത് തന്റെ ഉത്തരവാദിത്വമാണ്. പൊലീസ് തെറ്റുചെയ്താല്‍ അതിനെയെല്ലാം കണ്ണടച്ച് ന്യായീകരിക്കേണ്ട ഒരു ബാധ്യതയും ഈ സര്‍ക്കാരിനില്ല രമേശ് ചെന്നിത്തല സഭയില്‍ വ്യക്തമാക്കി.

ജഡ്ജിയുടെ മകന്‍ അല്ല ആരായാലും നിയമം എല്ലാവര്‍ക്കും ഒന്നാണ്. ഒരു പാവപ്പെട്ട മനുഷ്യന്‍ സ്‌കൂട്ടറില്‍ പോകുകയായിരുന്നു. അയാള്‍ ഭക്ഷണം കൊണ്ടുപോയിട്ടുവേണം കുടുംബത്തിന് കഴിക്കാന്‍. മൂന്ന് ആവശ്യങ്ങളാണ് കുടുംബത്തിന് ഉള്ളത്.അതെല്ലാം അംഗീകരിച്ചത് കൊണ്ടാണ് ഇന്നലെ നടന്ന സമരം അവസാനിപ്പിച്ചത്. ജുവനൈല്‍ മജിസ്ട്രേറ്റ് ഒരു കാരണവശാലും വാഹനമോടിച്ച 17 കാരന് ജാമ്യം അനുവദിക്കരുത്. ജഡ്ജിയുടെ പേരില്‍ നടപടിയെടുക്കാന്‍ സര്‍ക്കാരിന് സാധ്യമല്ല. ചെയ്യാന്‍ കഴിയുന്നത് വാഹനത്തിന്റെ ഉടമയ്ക്കെതിരെ കേസ് എടുക്കാം എന്നുള്ളതാണ്. അത് ചെയ്തിട്ടുണ്ട്. ഈ വിവരം ഹൈക്കോടതി രജിസ്ട്രാറെ രേഖാമൂലം അറിയിച്ചിട്ടുണ്ട്.

ചേരാനല്ലൂര്‍ വിഷയത്തില്‍ തെറ്റ് ചെയ്ത പൊലീസുകാര്‍ക്കെതിരെ ഇന്ന് തന്നെ നടപടി ഉണ്ടാകും. ഒരു പണക്കാരനും സ്വാധീനം ചെലുത്താന്‍ ഈ ഗവണ്‍മെന്റ് സമ്മതിക്കുകയില്ല. ജഡ്ജി അല്ല ആരായാലും ശരി. ജഡ്ജി ഒരു വലിയ കാര്യം ചെയ്തു. പൊലീസ് സ്റ്റേഷനില്‍ പോയി. ഔദ്യോഗിക കാര്യത്തിനല്ലാതെ ജഡ്ജി പൊലീസ് സ്റ്റേഷനില്‍ പോകരുത്. സ്റ്റേഷനില്‍ ചെന്ന് ജഡ്ജി പൊട്ടിത്തെറിക്കുകയായിരുന്നു. ‘ഹിസ് ബിഹേവിയര്‍ വാസ് വെരി റൂഡ്’, പാവപ്പെട്ട മനുഷ്യനെയും കുടുംബത്തെയും സംരക്ഷിക്കാന്‍ സാധ്യമായതെല്ലാം ചെയ്യും രമേശ് ചെന്നിത്തല പറഞ്ഞു.

നെടുമ്പാശേരിയില്‍ വാഹനാപകടം ഉണ്ടായപ്പോള്‍ എത്ര വേഗത്തിലാണ് പൊലീസ് ഇടപെട്ടത്. ഗൗരവത്തോടെയാണ് അറസ്റ്റ് ഉണ്ടായത്. 4 ബാറില്‍ കയറിയാണ് പ്രതി മദ്യപിച്ചത്. അമിതവേഗതയില്‍ വാഹനമോടിക്കുന്ന ദൃശ്യങ്ങളടക്കം ലഭിച്ചു. നിശാന്തിനി ഐപിഎസിനെയാണ് അതിനായി ചുമതലപ്പെടുത്തിയിരിക്കുന്നത്. പൊലീസ് സേനയില്‍ ചെയ്യാവുന്ന മുഴുവന്‍ കാര്യങ്ങളും ചെയ്തു. ഇപ്പോള്‍ അയാള്‍ക്ക് ജാമ്യം പോലും ലഭിച്ചിട്ടില്ല. ഇതില്‍ കൂടുതല്‍ പൊലീസിന് എന്താണ് ചെയ്യാന്‍ കഴിയുന്നത്. ഒരു എംഎല്‍എയും ഈ കേസില്‍ ഇടപെട്ടിട്ടില്ല.

ഇന്ന് ഒരു അതിക്രമവും പൊലീസിന്റെ ഭാഗത്ത് നിന്ന് ഉണ്ടായിട്ടില്ല. ഇനി അഥവാ ഉണ്ടായാല്‍ അവരെ സംരക്ഷിക്കുന്ന സര്‍ക്കാരല്ല ഇത് അവര്‍ക്കെതിരെ നടപടി സ്വീകരിക്കും. എന്തായാലും വെറും 5 മാസം കൊണ്ട് കേരളപൊലീസിലെ കുഴപ്പക്കാരുടെ സേനയാക്കി മാറ്റാനാകില്ല. 5 മാസം കൊണ്ട് കേരളത്തിലെ പൊലീസ് സേനയുടെ മുഴുവന്‍ കുറ്റകൃത്യങ്ങള്‍ക്കും നേത്യത്വം കൊടുക്കാന്‍ പ്രോത്സാഹിപ്പിക്കുന്നയാളാണ് താനെന്ന് എ സി മൊയ്തീനെ പോലെ ഒരാള്‍ പറഞ്ഞത് തനിക്ക് വിഷമമുണ്ട്, അദ്ദേഹം അങ്ങിനെ പറയാന്‍ പാടിലായിരുന്നുവെന്നും ആഭ്യന്തര മന്ത്രി സഭയില്‍ വ്യക്തമാക്കി.