കളമശേരി ഗവ. പോളിടെക്‌നിക്ക് കോളജിലെ ലഹരിക്കേസിലെ പ്രധാനി കൊല്ലം സ്വദേശിയായ മൂന്നാം വര്‍ഷ വിദ്യാര്‍ത്ഥിയെന്ന് പൊലീസ്. ഇയാള്‍ ഒളിവിലാണ്. കഞ്ചാവ് എത്തിച്ചത് ഇയാള്‍ക്ക് വേണ്ടി എന്ന് പ്രതികളായ ആഷിഖും, ഷാലിഖും മൊഴി നല്‍കി. മൂന്നാം വര്‍ഷ വിദ്യാര്‍ഥിക്കായി അന്വേഷണം ഊര്‍ജിതമാക്കി.
പൂര്‍വ വിദ്യാര്‍ത്ഥികളായ ആഷിഖിനും ,ഷീലിഖിനും കഞ്ചാവ് കൊടുത്തിരുന്നത് ഇതരസംസ്ഥാനക്കാരെന്നാണ് മൊഴി. ഇവരില്‍ ചിലര്‍ക്കായി പൊലീസ് തിരച്ചില്‍ തുടരുകയാണ്. ആവശ്യത്തിന് അനുസരിച്ച് ആഷിഖും, ഷാലിഖും ഹോസ്റ്റലില്‍ കഞ്ചാവ് എത്തിക്കുന്നതായിരുന്നു രീതി. ഇതിന് മുന്‍പും ഹോസ്റ്റലില്‍ ഇവര്‍ കഞ്ചാവ് എത്തിച്ചിട്ടുണ്ടെന്ന് തൃക്കാക്കര എസിപി പി വി ബെന്നി പറഞ്ഞു. ഹോസ്റ്റലില്‍ നിന്ന് പിടികൂടിയ രണ്ട് കിലോ കഞ്ചാവ് ആകാശിന് നല്‍കിയത് ആഷിഖ് എന്നായിരുന്നു മൊഴി.
ആരോപണ വിധേയരായ കെഎസ്യു പ്രവര്‍ത്തകരുടെ മൊഴി രേഖപ്പെടുത്തിയ ശേഷം പോലീസ് വിട്ടയച്ചു. ഓഫര്‍ നല്‍കിയാണ് കളമശ്ശേരി പോളിടെക്നിക് ഹോസ്റ്റലില്‍ കഞ്ചാവ് വില്‍പ്പന നടക്കുന്നത് എന്ന് വിദ്യാര്‍ത്ഥികള്‍ മൊഴി നല്‍കിയിട്ടുണ്ട്. 500 രൂപയുടെ കഞ്ചാവ് മുന്‍കൂറായി പണം നല്‍കിയാല്‍ 300 രൂപയ്ക്ക് ലഭിക്കുന്നതാണ് ഓഫര്‍. ഹോളി ആഘോഷത്തിന് വേണ്ടി കോളേജിലേക്ക് ലഹരി എത്താന്‍ സാധ്യതയുണ്ട് പോളിടെക്നിക് പ്രിന്‍സിപ്പല്‍ ഐജു തോമസ് ഡിസിപിക്ക് പരാതി നല്‍കിയിരുന്നു. ഇതുകൂടി പരിഗണിച്ചായിരുന്നു പോലീസ് പരിശോധന.
പതിനാലാം തീയതി കോളേജ് നടത്തുന്ന ഹോളി ആഘോഷത്തിലേക്ക് മദ്യവും മയക്കുമരുന്ന് എത്തിക്കാന്‍ വിദ്യാര്‍ത്ഥികള്‍ ശ്രമിക്കുന്നുണ്ടെന്ന് പ്രിന്‍സിപ്പള്‍ ഡിസിപിക്ക് നല്‍കിയ പരാതിയില്‍ പറയുന്നു. പോലീസ് പരിശോധനയും പ്രിന്‍സിപ്പല്‍ ആവശ്യപ്പെട്ടിരുന്നു. ഇതിന് പിന്നാലെയായിരുന്നു പോലീസിന്റെ പരിശോധന. പോളിടെക്നിക് ഹോസ്റ്റലില്‍ മുന്‍പും വ്യാപകമായി മയക്കുമരുന്ന് എത്തിയിട്ടുണ്ടെന്നാണ് പോലീസ് കണ്ടെത്തല്‍.
