അമേരിക്കന് മുന് പ്രസിഡന്റ് ഡൊണാള്ഡ് ട്രംപ്, ഇറാനിലെ പ്രധാന എണ്ണ സങ്കേതമായ ഖാര്ഗ് ദ്വീപ് ആക്രമണത്തില് തകരുന്നതിന്റെ എഐ നിര്മ്മിത വീഡിയോ ദൃശ്യങ്ങള് സോഷ്യല് മീഡിയയില് പങ്കുവെച്ചു. പശ്ചിമേഷ്യയില് സംഘര്ഷം രൂക്ഷമായിരിക്കെ, ഇറാന്റെ സാമ്പത്തിക നട്ടെല്ല് തകര്ക്കുമെന്ന ഭീഷണിയായാണ് ഈ നീക്കം വിലയിരുത്തപ്പെടുന്നത്.
ടെഹ്റാന്: പശ്ചിമേഷ്യയിലെ സംഘര്ഷങ്ങള്ക്കിടെ ഇറാനെതിരെ വീണ്ടും പ്രകോപനപരമായ സന്ദേശവുമായി അമേരിക്കന് പ്രസിഡന്റ് ഡൊണാള്ഡ് ട്രംപ്. ഇറാനിലെ പ്രധാന എണ്ണ സങ്കേതമായ ‘ഖാര്ഗ് ദ്വീപ്’ ആക്രമണത്തില് തകര്ന്നടിയുന്ന തരത്തില് കൃത്രിമമായി നിര്മ്മിച്ച എഐ വീഡിയോ ദൃശ്യങ്ങളാണ് ട്രംപ് തന്റെ സോഷ്യല് മീഡിയ പ്ലാറ്റ്ഫോമായ ‘ട്രൂത്ത് സോഷ്യലില്’ പങ്കുവെച്ചത്. ലാരക് ദ്വീപിലെ ഇറാനിയന് സൈനിക കേന്ദ്രങ്ങള്ക്ക് നേരെ അമേരിക്ക വന് വ്യോമാക്രമണം നടത്തിയതിന് തൊട്ടുപിന്നാലെയാണ് ട്രംപിന്റെ ഈ ഭീഷണി.
ഹോര്മുസ് കടലിടുക്കിന് സമീപമുള്ള ലാരക് ദ്വീപില് ഇറാനിയന് റെവല്യൂഷണറി ഗാര്ഡ് നിര്മ്മിച്ച റോക്കറ്റ് ലോഞ്ചറുകള്ക്ക് നേരെ യുഎസ് സേന കഴിഞ്ഞ ദിവസം ശക്തമായ ആക്രമണം നടത്തിയിരുന്നു. അന്താരാഷ്ട്ര കപ്പല്പ്പാതയില് ബോംബുകള് സ്ഥാപിക്കാന് ഇറാന് നീക്കം നടത്തുന്നു എന്ന് ആരോപിച്ചായിരുന്നു അമേരിക്കയുടെ വ്യോമാക്രമണം. മറുപടിയായി ജോര്ദാനിലെ യുഎസ് സൈനിക താവളങ്ങള്ക്ക് നേരെ ബാല്ലിസ്റ്റിക് മിസൈലുകള് അയച്ച് ഇറാന് പ്രത്യാക്രമണം ആരംഭിച്ചു.
അമേരിക്കന് നീക്കം ചരിത്രപരമായ തെറ്റാണെന്നും വലിയ സാമ്പത്തിക, സൈനിക തിരിച്ചടി യുഎസ് നേരിടേണ്ടി വരുമെന്നും ഇസ്ലാമിക് റെവല്യൂഷണറി ഗാര്ഡ് മുന്നറിയിപ്പ് നല്കി. ഇറാന്റെ ഏറ്റവും വലിയ എണ്ണ കയറ്റുമതി കേന്ദ്രങ്ങളില് ഒന്നാണ് ഖാര്ഗ് ദ്വീപ്. ഇറാന്റെ ക്രൂഡ് ഓയില് കയറ്റുമതിയുടെ വലിയൊരു പങ്കും നടക്കുന്നത് ഈ ദ്വീപ് വഴിയാണ്. ഈ കേന്ദ്രം തകര്ക്കുന്നതായി എഐ ദൃശ്യങ്ങളിലൂടെ ചിത്രീകരിച്ച് ട്രംപ് പോസ്റ്റ് ചെയ്തത് ഇറാന്റെ സാമ്പത്തിക നട്ടെല്ലിനെ തകര്ക്കുമെന്ന പരസ്യമായ ഭീഷണിയായാണ് ആഗോള തലത്തില് വിലയിരുത്തപ്പെടുന്നത്.
