ദുബായ്: ‘മറ്റൊരു ജീവന് തുണയാകുക’ എന്ന സന്ദേശമുയര്ത്തി, യു.എ.ഇയിലെ മുളിയാര് പ്രവാസികളുടെ കൂട്ടായ്മയായ മുളിയാര് കൂട്ടായ്മ യു.എ.ഇ യുടെ ആഭിമുഖ്യത്തില് വാര്ഷിക രക്തദാന ക്യാമ്പ് സംഘടിപ്പിച്ചു.
ഓഗസ്റ്റ് 30, ഞായറാഴ്ച രാവിലെ ദുബായ് ദെയ്റയിലെ അല് കുവൈറ്റ് ഹോസ്പിറ്റലില് (അല് ബര്ഹ) വെച്ച് നടന്ന ക്യാമ്പില് കൂട്ടായ്മ അംഗങ്ങളും യു.എ.ഇയുടെ വിവിധ ഭാഗങ്ങളില് നിന്നുള്ള നിരവധി സുമനസ്സുകളും പങ്കെടുത്ത് രക്തദാനം നിര്വഹിച്ചു.
കുവൈറ്റ് ഹോസ്പിറ്റല് ബ്ലഡ് ബാങ്കുമായി സഹകരിച്ചാണ് ക്യാമ്പ് സംഘടിപ്പിച്ചത്. ആശുപത്രി അധികൃതര് മുളിയാര് കൂട്ടായ്മയുടെ സാമൂഹിക പ്രതിബദ്ധതയെ അഭിനന്ദിച്ചു.
കഴിഞ്ഞ 11 വര്ഷമായി യു.എ.ഇയില് സാമൂഹിക, സാംസ്കാരിക, ജീവകാരുണ്യ മേഖലകളില് സജീവമായി പ്രവര്ത്തിച്ചുവരുന്ന പ്രവാസി സന്നദ്ധ സംഘടനയാണ് മുളിയാര് കൂട്ടായ്മ യു.എ.ഇ.
