ഇത് എന്റെ തീരുമാനമാണ്”; പോര്‍ച്ചുഗല്‍ ക്യാമ്പ് വിട്ട് ക്രിസ്റ്റ്യാനോ റൊണാള്‍ഡോ, കാരണം പരിശീലകനുമായുള്ള ഭിന്നത
ക്യാമ്പ് വിടാനുണ്ടായ യഥാര്‍ത്ഥ കാരണം ഉടന്‍ തന്നെ ആരാധകരെയും രാജ്യത്തെയും അറിയിക്കുമെന്നും റൊണാള്‍ഡോ കൂട്ടിച്ചേര്‍ത്തു.
കോപ്പന്‍ഹേഗന്‍: പരിശീലകന്‍ ജോര്‍ജ്ജ് ജീസസുമായുള്ള കടുത്ത ഭിന്നതയെ തുടര്‍ന്ന് പോര്‍ച്ചുഗല്‍ ദേശീയ ടീമിന്റെ പരിശീലന ക്യാമ്പ് വിട്ട് ക്യാപ്റ്റന്‍ ക്രിസ്റ്റ്യാനോ റൊണാള്‍ഡോ. ഡെന്‍മാര്‍ക്കിനെതിരായ മത്സരത്തിന് മുന്നോടിയായി ഡെന്മാര്‍ക്കിലെ കോപ്പന്‍ഹേഗനില്‍ പരിശീലനം നടക്കവേയാണ് അപ്രതീക്ഷിത സംഭവവികാസങ്ങള്‍ അരങ്ങേറിയത്. പോര്‍ച്ചുഗീസ് ഫുട്‌ബോള്‍ ഫെഡറേഷന്‍ പ്രസിഡന്റ് പെഡ്രോ പ്രോന്‍സയുമായി സംസാരിച്ച ശേഷമാണ് ക്യാമ്പ് വിടാന്‍ തീരുമാനിച്ചതെന്ന് റൊണാള്‍ഡോ സോഷ്യല്‍ മീഡിയയിലൂടെ വ്യക്തമാക്കി.
ക്യാമ്പ് വിടാനുണ്ടായ യഥാര്‍ത്ഥ കാരണം ഉടന്‍ തന്നെ ആരാധകരെയും രാജ്യത്തെയും അറിയിക്കുമെന്നും റൊണാള്‍ഡോ കൂട്ടിച്ചേര്‍ത്തു. ദേശീയ ടീമിനോടുള്ള സ്‌നേഹവും സമര്‍പ്പണവും എപ്പോഴും ഒപ്പമുണ്ടാകുമെന്നും, സഹതാരങ്ങള്‍ക്ക് വരും മത്സരങ്ങളില്‍ വിജയാശംസകള്‍ നേരുന്നതായും റൊണാള്‍ഡോ എക്‌സ് പോസ്റ്റില്‍ കുറിച്ചു. ഈ സംഭവത്തോടെ മുപ്പത്തൊന്‍പതുകാരനായ റൊണാള്‍ഡോ അന്താരാഷ്ട്ര ഫുട്‌ബോളില്‍ നിന്ന് വിരമിച്ചേക്കുമെന്ന അഭ്യൂഹങ്ങളും ശക്തമായിട്ടുണ്ട്.
നേഷന്‍സ് ലീഗില്‍ നോര്‍വേയ്ക്കെതിരായ മത്സരത്തില്‍ റൊണാള്‍ഡോയെ ആദ്യ ഇലവനില്‍ ഉള്‍പ്പെടുത്താതെ പൂര്‍ണ്ണമായും ബെഞ്ചിലിരുത്തിയതാണ് പ്രശ്‌നങ്ങളുടെ തുടക്കം. മത്സരത്തില്‍ ഗൊണ്‍സാലോ റാമോസിന്റെ ഗോളില്‍ പോര്‍ച്ചുഗല്‍ 2-1 ന് ജയിച്ചെങ്കിലും, മത്സരശേഷം സഹതാരങ്ങള്‍ക്കൊപ്പം കാണികളെ അഭിവാദ്യം ചെയ്യാതെ റൊണാള്‍ഡോ ഡ്രസ്സിങ് റൂമിലേക്ക് മടങ്ങിയിരുന്നു.
കളിക്കാരുടെ ഭൂതകാലവും പ്രശസ്തിയും നോക്കിയല്ല, നിലവിലെ പ്രകടനം മാത്രം വിലയിരുത്തിയാണ് ടീമില്‍ അവസരം നല്‍കുന്നതെന്ന് പരിശീലകന്‍ ജോര്‍ജ്ജ് ജീസസ് മാധ്യമങ്ങളോട് പറഞ്ഞിരുന്നു. റൊണാള്‍ഡോയെപ്പോലുള്ള ഒരു താരത്തിന് 30 മിനിറ്റ് വാം-അപ്പ് ചെയ്ത ശേഷം കളത്തിലിറങ്ങാന്‍ കഴിയാത്തതില്‍ നിരാശയുണ്ടാകാം എന്നാല്‍ ടീമിന്റെ തന്ത്രങ്ങളും ആദ്യ ഇലവനും തീരുമാനിക്കുന്നത് താനാണെന്നും ഒരു താരത്തിനും പ്രസിഡന്റിനും അതില്‍ മാറ്റം വരുത്താനാകില്ലെന്നും ജീസസ് തുറന്നടിച്ചു.
പരിശീലകന്റെ ഈ പരസ്യ നിലപാടില്‍ പ്രകോപിതനായാണ് റൊണാള്‍ഡോ ക്യാമ്പ് വിടാന്‍ തീരുമാനിച്ചതെന്നാണ് യൂറോപ്യന്‍ മാധ്യമങ്ങള്‍ റിപ്പോര്‍ട്ട് ചെയ്യുന്നത്. ഫെഡറേഷന്‍ പ്രസിഡന്റ് നേരിട്ടെത്തി പ്രശ്‌നങ്ങള്‍ പരിഹരിക്കാന്‍ ശ്രമിച്ചെങ്കിലും ചര്‍ച്ചകള്‍ പരാജയപ്പെടുകയായിരുന്നു. രാജ്യത്തിനായി ഏറ്റവും കൂടുതല്‍ ഗോളുകള്‍ നേടിയ ഇതിഹാസ താരം ഇത്തരമൊരു വിവാദപരമായ സാഹചര്യത്തില്‍ ടീം വിട്ടത് പോര്‍ച്ചുഗീസ് ഫുട്‌ബോളില്‍ വലിയ ചര്‍ച്ചകള്‍ക്കാണ് വഴിതുറന്നിരിക്കുന്നത്.
Related Posts
പൂജാരയുടെ ലോക ഏകദിന ഇലവനെ രോഹിത് നയിക്കും, ഗില്‍ ഓപ്പണര്‍; ന്യൂസിലന്‍ഡ് ടെസ്റ്റിനുള്ള ടീമിലും സര്‍പ്രൈസുകള്‍
KCN CHANNEL
വനിതാ പ്രീമിയര്‍ ലീഗ് താരലേലം ബുധനാഴ്ച്ച കൊച്ചിയില്‍; കേരളത്തില്‍ നിന്ന് മൂന്ന് താരങ്ങള്‍ പട്ടികയില്‍
KCN CHANNEL
ബ്ലാസ്റ്റേഴ്‌സിന്റെ ഹോം മാച്ച് പ്രതിസന്ധി ഒഴിഞ്ഞു; മത്സരം കൊച്ചിയില്‍ തന്നെ
KCN CHANNEL