150 ഗ്രാം മെതാംഫെറ്റമിന്‍ കടത്ത്: രണ്ട് നൈജീരിയന്‍ സ്വദേശികള്‍ അടക്കം അഞ്ച് പേര്‍ കുറ്റക്കാര്‍; വിധി ഒക്ടോബര്‍ 17-ന്

കാസര്‍ഗോഡ്: അന്താരാഷ്ട്ര ലഹരി നിര്‍മാണ-വിതരണ ശൃംഖലയുമായി ബന്ധപ്പെട്ട് 150 ഗ്രാം മെതാംഫെറ്റമിന്‍ കടത്തിയ കേസില്‍ രണ്ട് നൈജീരിയന്‍ പൗരന്മാര്‍ ഉള്‍പ്പെടെ അഞ്ച് പ്രതികള്‍ കുറ്റക്കാരാണെന്ന് കോടതി കണ്ടെത്തി. കാസര്‍ഗോഡ് അഡീഷണല്‍ ജില്ലാ കോടതി ഒന്ന് ജഡ്ജി ടി. എച്ച്. രജിതയാണ് പ്രതികള്‍ കുറ്റക്കാരാണെന്ന് വിധിച്ചത്. അതേസമയം, കേസില്‍ നാലാം പ്രതിയായിരുന്ന സൂരജിനെ കോടതി വെറുതെവിട്ടു. കുറ്റക്കാര്‍ക്കുള്ള ശിക്ഷ ഒക്ടോബര്‍ 17-ന് പ്രഖ്യാപിക്കും.

കുറ്റക്കാരെന്ന് കണ്ടെത്തിയ പ്രതികള്‍:

• അബൂബക്കര്‍ (38) – ചട്ടഞ്ചല്‍ തൈര, കാസര്‍ഗോഡ് (ഒന്നാം പ്രതി)
• അമീന അശ്ര (35) – അബൂബക്കറിന്റെ ഭാര്യ (രണ്ടാം പ്രതി)
• വസീം അക്രം (35) – ബാംഗ്ലൂര്‍ സ്വദേശി (മൂന്നാം പ്രതി)
• ഹഫ്‌സ റിഹാനത്ത് ഉസ്മാന്‍ എന്ന ബ്ലസിങ് ജോയ് (25) – നൈജീരിയന്‍ സ്വദേശിനി (അഞ്ചാം പ്രതി)
• ഉക്ക മോസസ് (41) – നൈജീരിയന്‍ സ്വദേശി (ആറാം പ്രതി)

വിധി പറയുന്ന വേളയില്‍ കോടതിയില്‍ ഹാജരാകാതിരുന്ന ഒന്നും രണ്ടും പ്രതികളായ അബൂബക്കര്‍, ഭാര്യ അമീന അശ്ര എന്നിവര്‍ക്കെതിരെ കോടതി വാറന്റ് പുറപ്പെടുവിച്ചിട്ടുണ്ട്.

കേസിന്റെ പശ്ചാത്തലവും അറസ്റ്റും:

2023 ഏപ്രില്‍ 21-നാണ് കേസിനാസ്പദമായ സംഭവം. വില്‍പ്പനയ്ക്കായി കടത്തുകയായിരുന്ന 150 ഗ്രാം മെതാംഫെറ്റമിനുമായി KA 03 MZ 2866 നമ്പര്‍ സ്വിഫ്റ്റ് കാറില്‍ സഞ്ചരിക്കവെ ഉദുമ പള്ളത്തുവെച്ച് ബേക്കല്‍ പോലീസാണ് ഒന്നു മുതല്‍ നാലു വരെയുള്ള പ്രതികളെ പിടികൂടിയത്. അന്നത്തെ ബേക്കല്‍ എസ്.ഐ പ്രദീപ് പി.കെയുടെ നേതൃത്വത്തിലായിരുന്നു പരിശോധന. ഒന്നാം പ്രതി അബൂബക്കറിന്റെ അടിവസ്ത്രത്തിനുള്ളിലും കാറിന്റെ ഡാഷ് ബോര്‍ഡിലുമായി ഒളിപ്പിച്ച നിലയിലായിരുന്നു ലഹരിമരുന്ന്.

തുടര്‍ന്ന് പ്രതികളുടെ മൊബൈല്‍ ഫോണുകള്‍ കേന്ദ്രീകരിച്ച് നടത്തിയ ശാസ്ത്രീയ അന്വേഷണമാണ് ബാംഗ്ലൂര്‍ കേന്ദ്രീകരിച്ച് പ്രവര്‍ത്തിച്ചിരുന്ന നൈജീരിയന്‍ പൗരന്മാരിലേക്ക് എത്തിയത്. തുടര്‍ന്ന് ഇവരെ ബാംഗ്ലൂരില്‍ വെച്ച് പ്രത്യേക അന്വേഷണ സംഘം അറസ്റ്റ് ചെയ്യുകയായിരുന്നു. 2023 മുതല്‍ ഇവര്‍ ജയിലില്‍ റിമാന്‍ഡില്‍ കഴിഞ്ഞുവരികയാണ്.

അന്താരാഷ്ട്ര ലഹരി മാഫിയയുടെ പ്രവര്‍ത്തനരീതി:

ഡല്‍ഹി, ബാംഗ്ലൂര്‍ തുടങ്ങിയ നഗരങ്ങള്‍ കേന്ദ്രീകരിച്ച് ലഹരിമരുന്ന് നിര്‍മാണവും വിതരണവും നടത്തിവന്ന അന്താരാഷ്ട്ര സംഘത്തിലെ കണ്ണികളാണ് അറസ്റ്റിലായ നൈജീരിയന്‍ സ്വദേശികള്‍. വിദ്യാഭ്യാസ വിസയില്‍ ഇന്ത്യയിലെത്തിയ ഇവര്‍ വിസ കാലാവധി കഴിഞ്ഞിട്ടും രേഖകളോ യാത്രാ പാസ്‌പോര്‍ട്ട് രേഖകളോ ഇല്ലാതെ രാജ്യത്ത് അനധികൃതമായി തങ്ങി വരികയായിരുന്നു.
ഇന്ത്യന്‍ പൗരന്മാരുടെ തിരിച്ചറിയല്‍ രേഖകള്‍ ഉപയോഗിച്ച് വ്യാജമായി സംഘടിപ്പിച്ച സിം കാര്‍ഡുകള്‍ വഴിയാണ് ഇവര്‍ ഇടപാടുകള്‍ നടത്തിയിരുന്നത്. വാട്‌സ്ആപ്പ് വഴി ആവശ്യക്കാരുമായി ബന്ധപ്പെടുകയും, ലഹരിമരുന്ന് ഒളിപ്പിച്ചുവെച്ച സ്ഥലത്തിന്റെ ലൊക്കേഷന്‍ അയച്ചുകൊടുത്ത് നിര്‍ദ്ദിഷ്ട ബാങ്ക് അക്കൗണ്ടുകളിലേക്ക് പണം സ്വീകരിക്കുകയുമായിരുന്നു ഇവരുടെ പ്രവര്‍ത്തനരീതി.

അന്വേഷണവും വിചാരണയും:

സംഭവത്തിന്റെ ഗൗരവം കണക്കിലെടുത്ത് അന്നത്തെ ജില്ലാ പോലീസ് മേധാവി ഡിവൈ.എസ്.പി സി.കെ. സുനില്‍കുമാറിന്റെ നേതൃത്വത്തില്‍ പ്രത്യേക അന്വേഷണ സംഘം രൂപീകരിച്ചിരുന്നു. പ്രതികളുടെ ഫോണുകളിലെ വാട്‌സ്ആപ്പ് ചാറ്റുകളും കോള്‍ ഡീറ്റെയില്‍സ് റെക്കോര്‍ഡുകളും (CDR) പ്രോസിക്യൂഷന് നിര്‍ണായക തെളിവുകളായി. ഒന്നാം പ്രതി അബൂബക്കറും ആറാം പ്രതി ഉക്ക മോസസും ബാംഗ്ലൂരിലെ മറ്റ് എന്‍.ഡി.പി.എസ് (NDPS) കേസുകളിലും പ്രതികളാണ്.

കേസില്‍ അന്വേഷണം പൂര്‍ത്തിയാക്കി കുറ്റപത്രം സമര്‍പ്പിച്ചത് മുന്‍ ബേക്കല്‍ സര്‍ക്കിള്‍ ഇന്‍സ്‌പെക്ടര്‍ യു. വിപിനാണ്. വിചാരണ വേളയില്‍ പ്രോസിക്യൂഷന്‍ 22 സാക്ഷികളെ വിസ്തരിക്കുകയും 149 രേഖകളും എട്ടോളം തൊണ്ടിമുതലുകളും കോടതിയില്‍ ഹാജരാക്കുകയും ചെയ്തു. പ്രോസിക്യൂഷന് വേണ്ടി അഡീഷണല്‍ പബ്ലിക് പ്രോസിക്യൂട്ടര്‍ ലോഹിതാക്ഷന്‍ ഇടയില്ലം, അഡ്വ. ആതിര ബാലന്‍ എന്നിവര്‍ ഹാജരായി.