മാനവീയം വീഥിയിലെ ഗ്യാനേഷ് വിരുദ്ധ പ്രതിഷേധം; പൊലീസ് മൈക്ക് സെറ്റ് ബലമായി പിടിച്ചെടുക്കാന്‍ ശ്രമിച്ചെന്ന് പരാതി, വിശദീകരണം തേടുമെന്ന് മേയര്‍

തിരുവനന്തപുരം: മാനവീയം വീഥിയിലെ ഗ്യാനേഷ് കുമാര്‍ വിരുദ്ധ പ്രതിഷേധ പരിപാടിയിലെ പൊലീസ് നടപടിയെ ചൊല്ലി വിവാദം. നടന്‍ പ്രകാശ് രാജ് പങ്കെടുത്ത പരിപാടിക്ക് മുന്‍പ് പൊലീസെത്തി മൈക്ക് സെറ്റ് ബലമായി പിടിച്ചെടുക്കാന്‍ ശ്രമിച്ചെന്നാണ് പ്രതിഷേധക്കാരുടെ പരാതി. കോര്‍പ്പറേഷന്റെ അനുമതിയില്ലെന്ന് പറഞ്ഞായിരുന്നു പൊലീസിന്റെ നടപടി. പ്രതിഷേധക്കാര്‍ പൊലീസിനെ തടഞ്ഞത്തോടെ വാക്കേറ്റമായി. പ്രതിഷേധത്തെ തുടര്‍ന്ന് പൊലീസ് മൈക്ക് പിടിച്ചെടുക്കാനുള്ള ശ്രമം ഉപേക്ഷിച്ചു. പരിപാടി നടത്താന്‍ അനുവദിക്കരുതെന്ന് ആവശ്യപ്പെട്ട് കോര്‍പ്പറേഷന്‍ പൊലീസിന് കത്ത് നല്‍കിയിരുന്നു.

പൊലീസിനോട് വിശദീകരണം തേടുമെന്ന് മേയര്‍

സംഭവത്തില്‍ പൊലീസിനോട് വിശദീകരണം തേടുമെന്ന് തിരുവനന്തപുരം മേയര്‍ വി വി രാജേഷ് പ്രതികരിച്ചു. സംഘാടകര്‍ കോര്‍പറേഷന്റെ അനുമതി വാങ്ങിയിരുന്നില്ല. പൊലീസിനോട് നടപടി ആവശ്യപ്പെട്ട് കത്ത് നല്‍കിയിരുന്നതാണ്. പിന്നെ എന്താണ് സംഭവിച്ചത് എന്ന കാര്യത്തില്‍ പൊലീസിനോട് വ്യക്തത തേടുമെന്നും തുടര്‍നടപടി ഉണ്ടാകുമെന്നും വി വി രാജേഷ് അറിയിച്ചു.