‘സഞ്ജുവിന്റെ 10 വര്‍ഷം മൂന്ന് ക്യാപ്റ്റന്മാര്‍ ചേര്‍ന്ന് നശിപ്പിച്ചു; പിതാവ് സാംസണ്‍ വിശ്വനാഥ്
ഇന്ത്യന്‍ ക്രിക്കറ്റ് ടീമിലെ മൂന്ന് മുന്‍ക്യാപ്റ്റന്‍മാര്‍ക്കെതിരെ ആഞ്ഞടിച്ച് സഞ്ജു സാംസണിന്റെ പിതാവ്. മഹേന്ദ്രസിംഗ് ധോണി, വിരാട് കോഹ്ലി, രോഹിത്ത് ശര്‍മ, രാഹുല്‍ ദ്രാവിഡ് എന്നിവര്‍ ചേര്‍ന്ന് സഞ്ജുവിന്റെ പത്ത് വര്‍ഷം നശിപ്പിച്ചെന്ന് സാംസണ്‍ വിശ്വനാഥ് കുറ്റപ്പെടുത്തി. ഗൗതം ഗംഭീറിനും സൂര്യകുമാര്‍ യാദവിനും നന്ദിയെന്ന് സാംസണ്‍ വിശ്വനാഥ് പറഞ്ഞു. രണ്ടു സെഞ്ച്വറികളും അവര്‍ക്ക് സമര്‍പ്പിക്കുന്നെന്നും സഞ്ജുവിന്റെ പിതാവ് ട്വന്റിഫോറിനോട് പറഞ്ഞു.
10 വര്‍ഷം ഇല്ലാതാക്കിയവര്‍ യഥാര്‍ത്ഥ സ്പോര്‍ട്‌സ്മാന്‍മാരായി തോന്നുന്നില്ലെന്ന് അദ്ദേഹം പറയുന്നു. അവര്‍ എത്രത്തോളം ഉപദ്രവിച്ചോ അത്രയും സഞ്ജു ഉയര്‍ന്ന് വന്നൂ. നഷ്ടമായ പത്ത് വര്‍ഷം ഇനി തിരിച്ചുപിടിക്കുമെന്ന് സഞ്ജുവിന്റെ പിതാവ് സാംസണ്‍ വിശ്വനാഥ് പറയുന്നു. സെഞ്ചുറി നേട്ടത്തില്‍ അതിയായ സന്തോഷം എന്നും പിതാവ് പറഞ്ഞു. സഞ്ജുവിന്റെ ബാറ്റിംഗ് ക്ലാസിക്ക് ആണ്. സച്ചിനും, ദ്രാവിഡും കളിച്ച ശൈലിയാണ് സഞ്ജുവിനെന്ന് സാംസണ്‍ വിശ്വനാഥ് പറഞ്ഞു.
