ബാനം: അന്താരാഷ്ട്ര ലഹരിവിരുദ്ധ ദിനാചരണത്തിന്റെ ഭാഗമായി ഗവ. ഹൈസ്കൂള് ബാനവും ജനമൈത്രി പോലീസ് സ്റ്റേഷന് വെള്ളരിക്കുണ്ടും സംയുക്തമായി ലഹരിവിരുദ്ധ റാലിയും ഫ്ലാഷ് മോബും സംഘടിപ്പിച്ചു.
വിദ്യാര്ത്ഥികള് ലഹരിവിരുദ്ധ സന്ദേശങ്ങള് ഉയര്ത്തിപ്പിടിച്ച പ്ലക്കാര്ഡുകളും മുദ്രാവാക്യങ്ങളുമായി നടത്തിയ റാലി പ്രദേശവാസികളുടെ ശ്രദ്ധ നേടി. തുടര്ന്ന് അവതരിപ്പിച്ച ഫ്ലാഷ് മോബ് ലഹരിയുടെ ദൂഷ്യഫലങ്ങളും ലഹരിയില് നിന്ന് അകന്നുനില്ക്കേണ്ടതിന്റെ പ്രാധാന്യവും ഉള്ക്കൊള്ളുന്നതായിരുന്നു.
പരിപാടിയില് അധ്യാപകരും ജനമൈത്രി പോലീസും രക്ഷിതാക്കളും നാട്ടുകാരും പങ്കെടുത്തു. ദിനാചരണം കോടോം ബേളൂര് ഗ്രാമപഞ്ചായത്ത് സ്ഥിരം സമിതി അധ്യക്ഷന് കെ.ഭൂപേശ് ഉദ്ഘാടനം ചെയ്തു. പി.ടി.എ പ്രസിഡന്റ് പി.രാജീവന് അധ്യക്ഷത വഹിച്ചു . എസ്.ഐ സി.വി രാമചന്ദ്രന് റാലി ഫ്ലാഗ് ഓഫ് ചെയ്തു. കോടോം ബേളൂര് ഗ്രാമപഞ്ചായത്ത് അംഗം ബി.അജിത, എസ്.എം.സി ചെയര്മാന് പി.ദിവാകരന്, പി.കെ ബാലചന്ദ്രന്, എ.എസ്.ഐ കെ.പ്രേമരാജന്, അനൂപ് പെരിയല്, സീനിയര് സി.പി.ഒ എം.സുരേഷ്, ഡ്രൈവര് സീനിയര് സി.പി.ഒ രഞ്ജിത്ത് രാജീവ് എന്നിവര് സംസാരിച്ചു. പ്രധാനധ്യാപിക സി.കോമളവല്ലി സ്വാഗതവും സ്റ്റാഫ് സെക്രട്ടറി അനിത മേലത്ത് നന്ദിയും പറഞ്ഞു.
ലഹരിവിരുദ്ധ റാലിയും ഫ്ലാഷ് മോബും സംഘടിപ്പിച്ചു
