വിഴിഞ്ഞം ഭൂഗര്‍ഭ റെയില്‍പ്പാതയ്ക്ക് മന്ത്രിസഭയുടെ പച്ചക്കൊടി

; 1482.92 കോടി രൂപയുടെ പദ്ധതിക്ക് ഭരണാനുമതി
വിഴിഞ്ഞം തുറമുഖവുമായി ബന്ധപ്പെട്ട ഭൂഗര്‍ഭ റെയില്‍പ്പാതയ്ക്ക് 1483 കോടി രൂപയുടെ വിശദമായ പദ്ധതി രേഖയ്ക്ക് മന്ത്രിസഭാ യോഗം അനുമതി നല്‍കി
തിരുവനന്തപുരം: വിഴിഞ്ഞം ഭൂഗര്‍ഭ റെയില്‍പാതയുടെ വിശദമായ പദ്ധതി റിപ്പോര്‍ട്ടിന് സംസ്ഥാന മന്ത്രിസഭാ യോഗം അംഗീകാരം നല്‍കി. കൊങ്കണ്‍ റെയില്‍ കോര്‍പറേഷന്‍ തയ്യാറാക്കിയ ഡിപിആറാണ് അംഗീകരിച്ചത്. 1482.92 കോടി രൂപയുടെ പദ്ധതിക്ക് ഭരണാനുമതി നല്‍കി. വിഴിഞ്ഞം തുറമുഖത്തെ ബാലരാമപുരം സ്റ്റേഷനുമായി ബന്ധിപ്പിക്കുന്നതാണ് പദ്ധതി. 2028 ഡിസംബറിന് മുന്‍പ് റെയില്‍ പാത ഗതാഗത യോഗ്യമാക്കാനാണ് തീരുമാനം. വിഴിഞ്ഞം അന്താരാഷ്ട്ര തുറമുഖ പദ്ധതിയുടെ വികസനത്തില്‍ പ്രധാനമായ അനുബന്ധ പദ്ധതിയാണിത്. വിഴിഞ്ഞം തുറമുഖവുമായി ബന്ധപ്പെട്ട പദ്ധതികള്‍ക്കൊന്നും പണം തടസമാകില്ലെന്ന് സംസ്ഥാന ബജറ്റില്‍ തന്നെ സര്‍ക്കാര്‍ വ്യക്തമാക്കിയതാണ്.