മറുപടി ബാറ്റിംഗില് ബംഗ്ലാദേശിന് 109 റണ്സെടുക്കാനേ കഴിഞ്ഞുള്ളൂ. ദീപ്തി ശര്മ്മ ഇന്ത്യക്കായി മൂന്ന് വിക്കറ്റ് വീഴ്ത്തി. ഇത് ഇന്ത്യയുടെ തുടര്ച്ചയായ ആറാം ഫൈനല് പ്രവേശനമാണ്.
ദുബായ്: വനിതാ ഏഷ്യാ കപ്പ് ക്രിക്കറ്റ് ടൂര്ണമെന്റിന്റെ ഒന്നാം സെമി ഫൈനലില് ബംഗ്ലാദേശിനെ 40 റണ്സിന് പരാജയപ്പെടുത്തി ഇന്ത്യന് വനിതാ ടീം ഫൈനലില്. ദുബായ് അന്താരാഷ്ട്ര ക്രിക്കറ്റ് സ്റ്റേഡിയത്തില് നടന്ന ആവേശകരമായ ഒന്നാം സെമി ഫൈനല് പോരാട്ടത്തില് ടോസ് നേടി ആദ്യം ബാറ്റ് ചെയ്ത ഇന്ത്യ 20 ഓവറില് 6 വിക്കറ്റ് നഷ്ടത്തില് 149 റണ്സെന്ന ശക്തമായ സ്കോര് പടുത്തുയര്ത്തി. തുടക്കത്തില് ബംഗ്ലാദേശ് ബൗളര്മാര് സമ്മര്ദ്ദം ചെലുത്താന് ശ്രമിച്ചെങ്കിലും ഓപ്പണര് ഷഫാലി വര്മ്മയുടെ തകര്പ്പന് അര്ദ്ധസെഞ്ചുറിയാണ് ഇന്ത്യന് ഇന്നിംഗ്സിന് കരുത്തായത്. 40 പന്തുകളില് നിന്ന് 7 ഫോറുകളും 3 സിക്സറുകളും അടക്കം 64 റണ്സ് നേടിയാണ് ഷഫാലിയുടെ മിന്നുന്ന പ്രകടനം. റിച്ച ഘോഷ് 16 പന്തില് 21 റണ്സ് നേടി മികച്ച പിന്തുണ നല്കിയപ്പോള് ക്യാപ്റ്റന് ഹര്മന്പ്രീത് കൗറും ദീപ്തി ശര്മ്മയും ഇന്നിംഗ്സിന്റെ അവസാന ഘട്ടത്തില് വേഗത്തില് റണ്സ് ഉയര്ത്തി ടീമിനെ 149 എന്ന സുരക്ഷിതമായ സ്കോറിലേക്ക് എത്തിച്ചു.
150 റണ്സ് വിജയലക്ഷ്യവുമായി മറുപടി ബാറ്റിംഗിനിറങ്ങിയ ബംഗ്ലാദേശിന് ഇന്ത്യന് സ്പിന് പടയുടെ കൃത്യതയാര്ന്ന ബൗളിംഗിന് മുന്നില് കൃത്യമായ ഇടവേളകളില് വിക്കറ്റുകള് നഷ്ടമായി. ബംഗ്ലാദേശ് നിരയില് 22 റണ്സ് നേടിയ ഷൊര്ണ അക്തറാണ് ഉയര്ന്ന സ്കോറര്. ഇന്ത്യക്കായി ബോളിംഗില് മിന്നുന്ന പ്രകടനം കാഴ്ചവെച്ച ദീപ്തി ശര്മ്മ 4 ഓവറില് 26 റണ്സ് വഴങ്ങി 3 വിക്കറ്റുകള് വീഴ്ത്തി ബംഗ്ലാദേശ് മധ്യനിര തകര്ത്തു. ഒടുവില് 20 ഓവറില് 7 വിക്കറ്റ് നഷ്ടത്തില് 109 റണ്സെടുക്കാനേ ബംഗ്ലാദേശിന് സാധിച്ചുള്ളൂ. 40 റണ്സിന്റെ ആധികാരിക ജയം സ്വന്തമാക്കിയ ഇന്ത്യ വനിതാ ഏഷ്യാ കപ്പിന്റെ ചരിത്രത്തില് തുടര്ച്ചയായ ആറാം തവണയും ഫൈനലിലേക്ക് മുന്നേറുന്ന അപൂര്വ്വ നേട്ടവും കൈവരിച്ചു.
