മുഖ്യതെരഞ്ഞെടുപ്പ് കമ്മീഷണര് ഗ്യാനേഷ് കുമാറിന്റെ രാജി ആവശ്യപ്പെട്ട് യൂത്ത് കോണ്ഗ്രസ് രാജ്യവ്യാപകമായി പ്രതിഷേധം സംഘടിപ്പിച്ചു. ദില്ലി, ജയ്പൂര്, ലഖ്നൗ എന്നിവിടങ്ങളില് നടന്ന മാര്ച്ചുകളില് വലിയ സംഘര്ഷമുണ്ടാവുകയും നേതാക്കളെ പോലീസ് കസ്റ്റഡിയിലെടുക്കുകയും ചെയ്തു
ദില്ലി: മുഖ്യതെരഞ്ഞെടുപ്പ് കമ്മീഷണര് ഗ്യാനേഷ് കുമാര് രാജിവെക്കണമെന്ന് ആവശ്യപ്പെട്ട് രാജ്യവ്യാപക പ്രതിഷേധം ശക്തമാക്കി കോണ്ഗ്രസും യൂത്ത് കോണ്ഗ്രസും. ദില്ലി, ജയ്പൂര്, ലഖ്നൗ തുടങ്ങിയ പ്രധാന നഗരങ്ങളില് യൂത്ത് കോണ്ഗ്രസ് പ്രവര്ത്തകര് സംഘടിപ്പിച്ച മാര്ച്ചുകളില് വലിയ സംഘര്ഷമാണ് ഉടലെടുത്തത്. ജയ്പൂരില് ബാരിക്കേഡുകള് മറികടക്കാന് ശ്രമിച്ച പ്രതിഷേധക്കാര്ക്ക് നേരെ പോലീസ് ജലപീരങ്കി പ്രയോഗിച്ചു. ദില്ലിയില് തെരഞ്ഞെടുപ്പ് കമ്മീഷന് ആസ്ഥാനത്തേക്ക് നടത്തിയ മാര്ച്ചില് നരേന്ദ്ര മോദിയുടെയും ഗ്യാനേഷ് കുമാറിന്റെയും മുഖമൂടികള് ധരിച്ചാണ് പ്രവര്ത്തകര് പ്രതിഷേധത്തില് പങ്കെടുത്തത്.
യൂത്ത് കോണ്ഗ്രസ് ദേശീയ അധ്യക്ഷന് ഉദയ് ഭാനു ചിബിന്റെ നേതൃത്വത്തിലായിരുന്നു ദില്ലിയിലെ റോഡ് ഉപരോധവും മാര്ച്ചും. സാധാരണക്കാരന്റെ വോട്ടവകാശം സംരക്ഷിക്കുന്നത് വരെ പോരാട്ടം തുടരുമെന്നും ഗ്യാനേഷ് കുമാര് അടിയന്തരമായി രാജിവെക്കണമെന്നും അദ്ദേഹം ആവശ്യപ്പെട്ടു. ബാരിക്കേഡുകള്ക്ക് മുകളില് കയറി പ്രതിഷേധിച്ച ഉദയ് ഭാനു ചിബ് അടക്കമുള്ള പ്രമുഖ നേതാക്കളെ പോലീസ് കസ്റ്റഡിയിലെടുത്തു നീക്കി. തെരഞ്ഞെടുപ്പ് കമ്മീഷന് ആസ്ഥാനത്തേക്കുള്ള റോഡുകള് അടയ്ക്കുകയും യൂത്ത് കോണ്ഗ്രസ് ആസ്ഥാനത്തിന് മുന്നില് വന് പൊലീസ് സന്നാഹത്തെ വിന്യസിക്കുകയും ചെയ്തിട്ടുണ്ട്. ഗ്യാനേഷ് രാജിവയ്ക്കും വരെ അതിശക്തമായ പ്രതിഷേധവുമായി മുന്നോട്ട് പോകുമെന്നാണ് നേതാക്കള് പ്രതികരിച്ചത്.
പ്രതിഷേധം ശക്തമാക്കി സിപിഎം
അതേസമയം ദില്ലിയിലെ സി പി എം ആസ്ഥാനമായ എ കെ ജി ഭവന് മുന്നില് നിന്ന് ഭഗത് സിങ് സ്മാരകത്തിലേക്ക് ഇടത് നേതാക്കളും പ്രതിഷേധ മാര്ച്ച് നടത്തി. സി പി എം ജനറല് സെക്രട്ടറി എം എ ബേബിയുടെ നേതൃത്വത്തിലാണ് മാര്ച്ച് സംഘടിപ്പിച്ചത്. മാര്ച്ച് ഉദ്ഘാടനം ചെയ്ത് സംസാരിച്ച എം എ ബേബി, ചീഫ് ഇലക്ഷന് കമ്മീഷണര് ഗ്യാനേഷ് കുമാറിന് പദവിയില് തുടരാന് ഇനി ഒരു നിമിഷം പോലും അവകാശമില്ലെന്ന് ആഞ്ഞടിച്ചു. ജനാധിപത്യ സംവിധാനത്തില് കുറ്റക്കാരനാണെന്ന് വ്യക്തമായിട്ടും സ്ഥാനത്ത് കടിച്ചുതൂങ്ങിനില്ക്കുന്ന അല്പത്വമാണ് അദ്ദേഹം കാണിക്കുന്നതെന്നും പ്രധാനമന്ത്രി നരേന്ദ്ര മോദി ഇയാളെ സംരക്ഷിക്കുകയാണെന്നും ബേബി ആരോപിച്ചു. എസ് ഐ ആര് എന്ന ആഭാസ പ്രവൃത്തി അവസാനിപ്പിക്കണമെന്നും രാഷ്ട്രീയ പാര്ട്ടികള്ക്ക് പുറമേ പ്രമുഖ വ്യക്തികളെയും ബുദ്ധിജീവികളെയും പൊതുജനങ്ങളെയും അണിനിരത്തി പ്രക്ഷോഭം ശക്തമാക്കുമെന്നും അദ്ദേഹം കൂട്ടിച്ചേര്ത്തു. വരും ദിവസങ്ങളില് വിഷയം ഇന്ത്യ സഖ്യ യോഗത്തില് പ്രതിഷേധം ശക്തമാക്കണമെന്ന വികാരം ഉന്നയിക്കാനാണ് സി പി എം തീരുമാനം. നാളെ മറ്റ് ഇടത് പാര്ട്ടികളെയും അണിനിരത്തി കൂട്ടായ പ്രതിഷേധ പരിപാടികള് സംഘടിപ്പിക്കാനും സി പി എം തീരുമാനിച്ചിട്ടുണ്ട്.
