കാസറഗോഡ് നഗരത്തിലെ ഗതാഗതക്കുരുക്ക് പരിഹരിച്ചില്ലെങ്കില്‍ ഒക്ടോബര്‍ 10 മുതല്‍ സ്വകാര്യ ബസുകള്‍ പഴയ ബസ് സ്റ്റാന്റ് ബഹിഷ്‌കരിക്കും
കാസറഗോഡ്: നഗരത്തിലെ അശാസ്ത്രീയവും നിയമവിരുദ്ധവുമായ പാര്‍ക്കിംഗും വഴിയോരക്കച്ചവടവും മൂലം ഉണ്ടാകുന്ന ഗതാഗതക്കുരുക്കില്‍ സ്വകാര്യ ബസ്സുകള്‍ക്ക് കൃത്യസമയത്ത് സര്‍വ്വീസ് നടത്താന്‍ സാധിക്കാത്ത സാഹചര്യത്തില്‍, ഒക്ടോബര്‍ 10 നകം ശാശ്വത പരിഹാരം ഉണ്ടായില്ലെങ്കില്‍ സ്വകാര്യബസ്സുകളുടെ സര്‍വ്വീസ് പുതിയ ബസ്സ്റ്റാന്റില്‍ വെച്ച് അവസാനിപ്പിക്കാനും പഴയ ബസ്സ്റ്റാന്റ് ബഹിഷ്‌കരിക്കാനും കേരള സ്റ്റേറ്റ് പ്രൈവറ്റ് ബസ് ഓപ്പറേറ്റര്‍സ് ഫെഡറേഷന്‍ കാസറഗോഡ് താലൂക്ക് ജനറല്‍ബോഡി യോഗം തീരുമാനിച്ചു.
പുതിയ ബസ്സ്റ്റാന്റ് സര്‍ക്കിളില്‍ നിന്നും ആരംഭിച്ച ഗതാഗതക്കുരുക്ക് സുല്‍ത്താന്‍ ഗോള്‍ഡ്, ശോഭിക വെഡ്ഡിംഗ്സ്, പുലിക്കുന്ന് റോഡിലുള്ള മെഡിക്കല്‍ ഷോപ്പ് സമുച്ചയം വരെ. (ഇവിടെ വാഹനങ്ങളുടെ സ്ഥിരം പാര്‍ക്കിംഗും മരുന്നു വാങ്ങാന്‍ വരുന്നവരുടെ വാഹനങ്ങളും നിര്‍ത്തിയിടുന്നു) അവിടം മുതല്‍ ഫൂട്പാത്തിലെ വ്യാപാരം ആരംഭിക്കുകയായി. ശേഷം പള്ളിയുടെ മുന്‍വശം മുതല്‍ ഉന്തുവണ്ടികള്‍, വസ്ത്ര വ്യാപാരികള്‍, ഫ്രൂട്സ് വ്യാപാരികള്‍ എന്നിങ്ങനെ ബദരിയ ഹോട്ടലിന്റെ മുന്‍വശം വരെ റോഡില്‍ നിരനിരയായി വഴിയോരക്കച്ചവടക്കാരാണ്.
തെരുവ് കച്ചവടത്തിന് പുറത്തായി പള്ളിയുടെ മുന്‍വശം മുതല്‍ സുല്‍സണ്‍ വരെ ഇരുചക്ര വാഹനങ്ങള്‍ക്ക് പാര്‍ക്ക് ചെയ്യാനായി മുനിസിപ്പാലിറ്റി തന്നെ റോഡില്‍ പ്രത്യേകം മാര്‍ക്ക് ചെയ്ത് നല്‍കിയിട്ടുമുണ്ട്.
തലപ്പാടി, മധൂര്‍ ബസ് ബേകളില്‍ ഓട്ടോറിക്ഷകള്‍ കൊണ്ടു വന്ന് നിര്‍ത്തി യാത്രക്കാരെ വിളിച്ചു കയറ്റി സര്‍വ്വീസ് നടത്തുന്നുണ്ട്. ഇത് കര്‍ശനമായി തടയേണ്ടതാണ്. താലൂക്ക് ഓഫീസ് പരിസരം മുതല്‍ കറന്തക്കാട് ജംഗ്ഷന്‍ വരെ റോഡരികില്‍ തന്നെയാണ് വാഹനങ്ങളുടെ പാര്‍ക്കിംഗ്. ബീച്ച് റോഡ് , വിനയ മെഡിക്കല്‍സ് എന്നിവയുടെ മുന്‍വശം രൂക്ഷമായ ഗതാഗതക്കുരുക്കാണ് ഉണ്ടാകുന്നത്.
വഴിയോരക്കച്ചവടക്കാര്‍ക്കായി പുതിയ ബസ്സ്റ്റാന്റ് പരിസരത്ത് 28 കടമുറികള്‍ നഗരസഭ നിര്‍മ്മിച്ചു നല്‍കിയിട്ടും പഴയ ബസ്സ്റ്റാന്റ് പരിസരത്തെ കൈയ്യേറ്റങ്ങള്‍ക്ക് യാതൊരു കുറവും വന്നിട്ടില്ല. ജനത്തിരക്കേറിയ ഫിര്‍ദൗസ് ബസാര്‍ റോഡ് മുതല്‍ പ്ലാവിന്റെ അടി വരെയുള്ള ഭാഗത്തേക്ക് വരുന്ന യാത്രക്കാരുടെ സൗകര്യാര്‍ത്ഥം ബദരിയ ഹോട്ടലിന് മുന്‍വശത്തായി ഒരു ബസ് സ്റ്റോപ്പ് അനുവദിക്കേണ്ടതാണ്.
റോഡിലെ തടസ്സങ്ങള്‍ നീക്കി ഗതാഗതം സുഗമമാക്കാന്‍ അധികാരികള്‍ അടിയന്തിരമായി ഇടപെടണമെന്നും, 2026 ഒക്ടോബര്‍ 10 നകം പ്രശ്നങ്ങള്‍ക്ക് പരിഹാരം കണ്ടില്ലെങ്കില്‍ പുതിയ ബസ് സ്റ്റാന്റില്‍ വെച്ച് തന്നെ സ്വകാര്യ ബസുകളുടെ സര്‍വ്വീസുകള്‍ അവസാനിപ്പിക്കാന്‍ നിര്‍ബന്ധിതരാകുമെന്നും ഭാരവാഹികള്‍ വ്യക്തമാക്കി. വാര്‍ത്താ സമ്മേളനത്തില്‍ ജില്ലാ പ്രസിഡണ്ട് കെ. ഗിരിഷ്, താലൂക്ക് പ്രസിഡണ്ട് കെ.എന്‍. ബാലകൃഷ്ണന്‍, സെക്രട്ടറി സി.എ. മുഹമ്മദ് കുഞ്ഞി, ജില്ലാ കമ്മിറ്റി അംഗം രാധാകൃഷ്ണ. എസ് എന്നിവര്‍ സംബന്ധിച്ചു.
Related Posts
ശൈഖാനി അനുസ്മരണവും സമസ്ത ജനറല്‍ സെക്രട്ടറി കൊയ്യോട് ഉസ്താദിന് സ്വീകരണവും സംഘടിപ്പിച്ചു
KCN CHANNEL
സ്പെഷ്യല്‍ സമ്മറി റിവിഷന്‍: രാഷ്ട്രീയ പാര്‍ട്ടി പ്രതിനിധികളുടെ യോഗം ചേര്‍ന്നു
KCN CHANNEL
ജൈവവൈവിധ്യ സംരക്ഷണത്തിന് അംഗീകാരം; ‘ബയോം 2026’ സംഘടിപ്പിച്ചു
KCN CHANNEL