വാഹനങ്ങളുടെ നിറം മാറ്റം, എഞ്ചിന്‍ സ്വാപ്പിംഗ്; മുന്‍കൂര്‍ അനുമതിയോടെ വാഹനങ്ങളില്‍ 7 മോഡിഫിക്കേഷന്‍ വരുത്താം; പുതിയ ഉത്തരവിറക്കി എംവിഡി

തിരുവനന്തപുരം: യുഡിഎഫിന്റെ തെരഞ്ഞെടുപ്പ് വാഗ്ദാനങ്ങളില്‍ യുവതലമുറയെക്കൊണ്ട് കയ്യടിപ്പിച്ചതാണ് വാഹനമോഡിഫിക്കേഷന്‍ നടത്താന്‍ അനുവദിക്കുമെന്നത്. വണ്ടിപ്രാന്തന്മാര്‍ വലിയ കയ്യടിയോടെയാണ് വിഡി സതീശന്റെ പ്രഖ്യാപനത്തെ സ്വീകരിച്ചത്. ഇപ്പോഴിതാ സംസ്ഥാനത്ത് മോട്ടോര്‍ വാഹന വകുപ്പിന്റെ മുന്‍കൂര്‍ അനുമതിയോടെ വാഹനങ്ങളുടെ നിറവും രൂപവും ഉള്‍പ്പെടെ മാറ്റുന്നടക്കം ഏഴ് തരത്തിലുള്ള രൂപമാറ്റങ്ങള്‍ വരുത്താന്‍ അനുമതി നല്‍കി സര്‍ക്കാര്‍ ഉത്തരവിറക്കി. ഗതാഗത കമ്മീഷണറുടെ ശുപാര്‍ശ പ്രകാരമാണ് നിശ്ചിത വ്യവസ്ഥകളോടെ ഏഴ് തരം മോഡിഫിക്കേഷനുകള്‍ക്ക് അനുമതി നല്‍കാന്‍ തീരുമാനമായത്. രേഖാമൂലം അനുമതി വാങ്ങിയ ശേഷം മാത്രമേ ഇത്തരം മാറ്റങ്ങള്‍ വരുത്താന്‍ പാടുള്ളൂവെന്ന് അധികൃതര്‍ വ്യക്തമാക്കിയിട്ടുണ്ട്.

ഗതാഗത കമ്മിഷണര്‍ ജി.സ്പര്‍ജന്‍ കുമാറാണ് ഇതു സംബന്ധിച്ച് ഉത്തരവിറക്കിയത്. എഞ്ചിനും ഷാസിയും ഉള്‍പ്പെടെ ഏഴ് മാറ്റങ്ങള്‍ക്കാണ് അനുമതി. പ്രൊപ്പല്‍ഷന്‍ സിസ്റ്റം പരിഷ്‌കരിക്കുന്നതിനും വാഹനം ഭിന്നശേഷി സൗഹൃദമാക്കുന്നതിനും അനുമതിയുണ്ട്. എല്ലാ മാറ്റങ്ങളും ഗതാഗതവകുപ്പിന്റെ അനുമതിയോടെ മാത്രമേ പാടുള്ളു എന്ന് ഉത്തരവില്‍ പറയുന്നു. 1988 ലെ മോട്ടോര്‍ വാഹന നിയമത്തിലെയും ചട്ടങ്ങളിലെയും വ്യവസ്ഥകള്‍ പ്രകാരമാണ് അനുമതി വാങ്ങേണ്ടത്. വാഹനങ്ങളില്‍ വരുത്തുന്ന മാറ്റങ്ങള്‍ റജിസ്ട്രേഷന്‍ സര്‍ട്ടിഫിക്കറ്റില്‍ (ആസി) രേഖപ്പെടുത്തുകയും വേണം. നിറം മാറ്റുന്നത് റജിസ്റ്ററിങ് അതോറിറ്റിയുടെ അനുമതിയോടെ, ആര്‍സിയില്‍ രേഖപ്പെടുത്തിക്കൊണ്ടു മാത്രമേ പാടുള്ളൂ എന്ന് ഉത്തരവില്‍ പറയുന്നു. കേന്ദ്ര മോട്ടര്‍വാഹന ചട്ടം (സിഎംവിആര്‍) 121 പ്രകാരമോ സ്റ്റേറ്റ് ട്രാന്‍സ്പോര്‍ട്ട് അതോറിറ്റിയുടെ തീരുമാനങ്ങള്‍ പ്രകാരമോ നിരോധിക്കപ്പെട്ട നിറം ഉപയോഗിക്കാന്‍ പാടില്ലെന്നും ഉത്തരവില്‍ പറയുന്നു.

അതേസമയം ലൈറ്റ്, ഹോണ്‍ എന്നിവമാറ്റാന്‍ അനുമതി നല്‍കിയിട്ടില്ല. സണ്‍ ഫിലിമിന്റെ കാര്യത്തിലും പുതിയ ഉത്തരവില്‍ ഒന്നും പറയുന്നില്ല. വാഹനത്തിന്റെ നിറംമാറ്റം നേരത്തേയും അനുവദീനമായിരുന്നു. നിബന്ധനകളില്‍ മാത്രമാണ് മാറ്റം വന്നതെന്നാണ് ഉയരുന്ന വിമര്‍ശനം. യുഡിഎഫ് സര്‍ക്കാര്‍ അധികാരത്തില്‍ വന്ന ശേഷം മോഡിഫിക്കേഷന്‍ സംബന്ധിച്ച മാറ്റങ്ങള്‍ക്കായി ഗൂഗിള്‍ ഫോര്‍മാറ്റ് വഴി മോട്ടോര്‍ വാഹന വകുപ്പ് അഭിപ്രായം ചോദിച്ചിരുന്നു. ഈ അഭിപ്രായങ്ങള്‍ പരിശോധിക്കാന്‍ കമ്മിറ്റിയെയും നിയോഗിച്ചിരുന്നു. ഇതിന് പിന്നാലെയാണ് മോഡിഫിക്കേഷന്‍ സംബന്ധിച്ച പുകിയ ഉത്തരവ് പുറത്തിറക്കിയത്.

ഉത്തരവിലെ പ്രധാന നിര്‍ദ്ദേശങ്ങള്‍

നിറം മാറ്റല്‍

റജിസ്റ്ററിങ് അതോറിറ്റിയുടെ അനുമതിയോടെ മാത്രമേ വാഹനത്തിന്റെ നിറം മാറ്റാന്‍ പാടുള്ളൂ. മാറ്റിയ നിറം ആര്‍സിയില്‍ രേഖപ്പെടുത്തണം. CMVR Rule 121 പ്രകാരമോ STA-യുടെ നിലവിലുള്ള തീരുമാനങ്ങള്‍ പ്രകാരമോ നിരോധിച്ചിട്ടുള്ള നിറം ഉപയോഗിക്കാന്‍ പാടില്ല.

എഞ്ചിന്‍ മാറ്റിസ്ഥാപിക്കല്‍

അതേ നിര്‍മ്മാതാവിന്റെയും (manufacturer) അതേ type/specification-ന്റെയും പുതിയ എഞ്ചിന്‍ ഉപയോഗിച്ച് മാറ്റിസ്ഥാപിക്കല്‍ അനുവദനീയമാണ്. അതായത്, അതേ model, capacity, power തുടങ്ങിയ സവിശേഷതകള്‍ ഉണ്ടായിരിക്കണം. ഇതിന് റജിസ്റ്ററിങ് അതോറിറ്റിയുടെ മുന്‍കൂര്‍ അനുമതി ആവശ്യമാണ്. CMVR Rule 112 പാലിച്ചിരിക്കണം, കൂടാതെ എഞ്ചിന്‍ മാറ്റം ആര്‍.സി യില്‍ രേഖപ്പെടുത്തണം. അതേസമയം എഞ്ചിന്‍ സ്വാപ്പിംഗ് കര്‍ശനമായി നിരോധിച്ചിരിക്കുന്നു.

ചേസിസ് ഫ്രയിം മാറ്റിസ്ഥാപിക്കല്‍

അതേ നിര്‍മ്മാതാവിന്റെയും അതേ ടൈപ്പിന്റേയും പുതിയ ചേസിസ് ഉപയോഗിച്ച് മാറ്റിസ്ഥാപിക്കല്‍, റജിസ്റ്ററിങ് അതോറിറ്റിയുടെ മുന്‍കൂര്‍ അനുമതിയോടെ അനുവദനീയമാണ്. CMVR Rule 112 പാലിച്ചിരിക്കണം, കൂടാതെ മാറ്റം ആര്‍.സിയില്‍ രേഖപ്പെടുത്തണം. ഒരു തരത്തിലുള്ള വാഹനത്തിനായി നിര്‍മ്മിച്ച ചേസിസ് മറ്റൊരു തരത്തിലുള്ള വാഹനമാക്കി മാറ്റാന്‍ പാടില്ല.

ബോഡി സ്ട്രക്ചറില്‍ മാറ്റം വരുത്തല്‍

റജിസ്റ്ററിങ് അതോറിറ്റിയുടെ മുന്‍കൂര്‍ അനുമതിയോടെ, CMVR Rule 112 കര്‍ശനമായി പാലിച്ചുകൊണ്ട് ബോഡി സ്ട്രക്ചറില്‍ മാറ്റം വരുത്താം. ഈ മാറ്റം ആര്‍സിയില്‍ രേഖപ്പെടുത്തണം.

ഫ്യുവല്‍ മാറ്റം

അംഗീകൃത റെട്രോഫിറ്‌മെന്റ് കിറ്റ് ഉപയോഗിച്ച് ഇന്ധന മാറ്റം വരുത്താം. ഇതിന് മോട്ടോര്‍ വെഹിക്കിള്‍ ആക്ടിലെ സെക്ഷന്‍ 52-നും CMVR Rule 112-നും അനുസൃതമായി, റജിസ്റ്ററിങ് അതോറിറ്റിയുടെ മുന്‍കൂര്‍ അനുമതിയോടെ ഇന്ധന മാറ്റം അനുവദനീയമാണ്. മാറ്റം ആര്‍സിയില്‍ രേഖപ്പെടുത്തണം.