പെരിയ: രക്ഷാ പ്രവര്‍ത്തനവും ദുരന്ത നിവാരണവും പോലുള്ള സേവന സന്നദ്ധതയിലൂന്നിയ സൈന്യത്തിന്റെ പ്രവര്‍ത്തനങ്ങള്‍ രാജ്യസുരക്ഷക്ക് അനിവാര്യമാണെന്ന് ഗോവ നേവല്‍ ബേസ് നേവല്‍ ഹിസ്റ്ററി ഡിവിഷന്‍ ഡപ്യൂട്ടി ഇന്‍ ചാര്‍ജ്ജ് ലഫ്റ്റനന്റ് കമാന്‍ഡര്‍ അനുപമ തപ്ലിയാല്‍ പറഞ്ഞു. ഇത്തരം പ്രവര്‍ത്തനങ്ങള്‍ സൈനികവും നയതന്ത്രപരവുമായ ലക്ഷ്യങ്ങള്‍ ശക്തിപ്പെടുത്തും. കേരള കേന്ദ്ര സര്‍വകലാശാലയിലെ സെന്റര്‍ ഫോര്‍ ഡിഫന്‍സ് ആന്റ് സെക്യൂരിറ്റി സ്റ്റഡീസിന്റെ നേതൃത്വത്തില്‍ ഇന്ത്യയുടെ ദേശസുരക്ഷയും ദുരന്ത നിവാരണവും എന്ന വിഷയത്തില്‍ സംഘടിപ്പിക്കുന്ന അഞ്ച് ദിവസത്തെ ദേശീയ ശില്പശാലയുടെ രണ്ടാം ദിവസത്തില്‍ സംസാരിക്കുകയായിരുന്നു അവര്‍. അയല്‍രാജ്യങ്ങളില്‍ സ്ഥിരതയും സമാധാനവും ഉറപ്പാക്കുന്നതിനും മികച്ച ബന്ധം നിലനിര്‍ത്തുന്നതിനും ഇന്ത്യ നല്‍കുന്ന പിന്തുണയും സഹായവും അവര്‍ ചൂണ്ടിക്കാട്ടി. ദുരന്ത നിവാരണത്തില്‍ പൊതുജന പങ്കാളിത്തം എന്ന വിഷയത്തില്‍ എന്‍വിയോണ്‍മെന്റര്‍ സയന്‍സ് അസിസ്റ്റന്റ് പ്രൊഫസര്‍ ഡോ. എസ്. അന്‍ബഴഗിയും 2004ലെ സുനാമിയും ദുരന്ത നിവാരണ പാഠങ്ങളും എന്ന വിഷയത്തില്‍ എയര്‍ കൊമഡോര്‍ നിതിന്‍ സാത്തെയും സംസാരിച്ചു. സെന്റര്‍ ഫോര്‍ ഡിഫന്‍സ് ആന്റ് സെക്യൂരിറ്റി സ്റ്റഡീസ് ഡയറക്ടര്‍ പ്രൊഫ. ആര്‍. സുരേഷ് സ്വാഗതവും പ്രോഗ്രാം കോര്‍ഡിനേറ്റര്‍ ഡോ. റെയിന്‍ഹാര്‍ട്ട് ഫിലിപ്പ് നന്ദിയും പറഞ്ഞു.
സേവന സന്നദ്ധതയിലൂന്നിയ സൈനിക ശക്തി രാജ്യസുരക്ഷക്ക് അനിവാര്യം: ലഫ്റ്റനന്റ് കമാന്‍ഡര്‍ അനുപമ തപ്ലിയാല്‍
75
