സ്ഥാനം ഏറ്റെടുക്കാതെ ഐജി എ അക്ബര്‍; ഗതാഗത കമ്മീഷണറുടെ പൂര്‍ണ ചുമതല പ്രമോജ് ശങ്കറിന് നല്‍കി സര്‍ക്കാര്‍
ഗതാഗത കമ്മീഷണറായി നിയമിച്ച ഐജി എ അക്ബര്‍ സ്ഥാനം ഏറ്റെടുക്കാത്ത സാഹചര്യത്തിലാണ് സര്‍ക്കാര്‍ തീരുമാനം.
തിരുവനന്തപുരം: ഗതാഗത കമ്മീഷണറുടെ പൂര്‍ണ ചുമതല അഡീഷണല്‍ ട്രാന്‍സ്‌പോര്‍ട്ട് കമ്മീഷണര്‍ പ്രമോജ് ശങ്കറിന് നല്‍കി സംസ്ഥാന സര്‍ക്കാര്‍ ഉത്തരവിട്ടു. ഗതാഗത കമ്മീഷണറായി നിയമിച്ച ഐജി എ അക്ബര്‍ സ്ഥാനം ഏറ്റെടുക്കാത്ത സാഹചര്യത്തിലാണ് സര്‍ക്കാര്‍ തീരുമാനം.
മന്ത്രിയുമായുള്ള അഭിപ്രായ വ്യത്യാസത്തെ തുടര്‍ന്നാണ് എഡിജിപി എസ് ശ്രീജിത്ത് ഗതാഗത കമ്മീഷണര്‍ സ്ഥാനം ഒഴിഞ്ഞത്. പകരം എറണാകുളം റെയ്ഞ്ച് ക്രൈംബ്രാഞ്ച് ഐജിയായ എ അക്ബറിനെ ഗതാഗത കമ്മീഷണറായി നിയമിച്ചിരുന്നു. എന്നാല്‍, ഉത്തരവിറങ്ങി ഒരു മാസം കഴിഞ്ഞിട്ടും അക്ബര്‍ സ്ഥാനമേറ്റെടുത്തില്ല. വ്യക്തിപരമായ കാരണങ്ങളാല്‍ കൊച്ചിയില്‍ നിന്നും മാറാന്‍ കഴിയില്ലെന്നാണ് അക്ബര്‍ ഡിജിപിയെ അറിയിച്ചത്. ക്രൈംബ്രാഞ്ചില്‍ നിന്നും സ്ഥാനം ഒഴിഞ്ഞിട്ടുമില്ല. ഈ സാഹചര്യത്തിലാണ് ഗതാഗത കമ്മീഷണറുടെ ചുമതല നിര്വഹിച്ചിരുന്ന അഡീഷണല്‍ ട്രാന്‍സ്‌പോര്‍ട്ട് കമ്മീഷണര്‍ പ്രമോജ് ശങ്കറിന് പൂര്‍ണ ചുമതല നല്‍കിയത്. കെഎസ്ആര്‍ടിസി എംഡിയുടെ ചുമതലയും പ്രമോജ് ശങ്കറിനാണ്.
