ഗൗതം ഗംഭീര് പരിശീലകനായി ചുമതലയേറ്റതോടെ നടത്തിയ നിര്ണായക നീക്കങ്ങള്ക്കൊടുവിലാണ് ഹാര്ദ്ദിക് വീണ്ടും റെഡ് ബോള് ക്രിക്കറ്റിലേക്ക് മടങ്ങിവരാനുള്ള തയാറെടുപ്പ് നടത്തുന്നത് എന്നാണ് കരുതുന്നത്
ഓസ്ട്രേലിയന് പരമ്പരക്ക് മുമ്പ് നിര്ണായക നീക്കവുമായി ഗംഭീര്;ഹാര്ദ്ദിക് ടെസ്റ്റ് ക്രിക്കറ്റില് തിരച്ചെത്തിയേക്കും
ഗൗതം ഗംഭീര് പരിശീലകനായി ചുമതലയേറ്റതോടെ നടത്തിയ നിര്ണായക നീക്കങ്ങള്ക്കൊടുവിലാണ് ഹാര്ദ്ദിക് വീണ്ടും റെഡ് ബോള് ക്രിക്കറ്റിലേക്ക് മടങ്ങിവരാനുള്ള തയാറെടുപ്പ് നടത്തുന്നത് എന്നാണ് കരുതുന്നത്.
മുംബൈ: നവംബറില് തുടങ്ങാനിരിക്കുന്ന ഓസ്ട്രേലിയന് പരമ്പരക്ക് മുമ്പ് നിര്ണായക നീക്കവുമായി കോച്ച് ഗൗതം ഗംഭീര്. ഓള് റൗണ്ടര് ഹാര്ദ്ദിക് പാണ്ഡ്യയെ ടെസ്റ്റ് ക്രിക്കറ്റിലേക്ക് തിരിച്ചുകൊണ്ടുവരാനുള്ള നിര്ണായക നീക്കം ഗംഭീറിന്റെ നേതൃത്വത്തില് തുടങ്ങിയെന്നാണ് സൂചന.റെഡ് ബോള് ഉപയോഗിച്ച് ഹാര്ദ്ദിക് പാണ്ഡ്യ ബൗളിംഗ് പരിശീലനം നടത്തുന്ന വീഡിയോ പുറത്തുവന്നതാണ് ഇത്തരമൊരു സൂചന നല്കുന്നത്. ഇന്സ്റ്റഗ്രാമിലാണ് ഹാര്ദ്ദിക് വീഡിയോ പോസ്റ്റ് ചെയ്തത്.
2018 സെപ്റ്റംബറിലാണ് 30കാരനായ ഹാര്ദ്ദിക് അവസാനമായി ടെസ്റ്റ് ക്രിക്കറ്റ് കളിച്ചത്. അതിനുശേഷം 2019ല് നടുവിനേറ്റ പരിക്കിന് ശസ്ത്രക്രിയക്ക് വിധേയനായ ഹാര്ദ്ദിക് പിന്നീട് ടെസ്റ്റ് ക്രിക്കറ്റില് കളിച്ചിട്ടില്ല. ടെസ്റ്റ് ക്രിക്കറ്റ് കളിക്കാനുള്ള ശരീരികക്ഷമത തനിക്കില്ലെന്നായിരുന്നു ഹാര്ദ്ദിക് ഇത്രയും കാലം പറഞ്ഞിരുന്നത്. അതുകൊണ്ട് തന്നെ ടെസ്റ്റ് ടീമിലേക്ക് പരിഗണിക്കരുതെന്നും അത് ടീമിലെ മറ്റ് താരങ്ങളോട് ചെയ്യുന്ന അനീതിയാകുമെന്നുമായിരുന്നു ഹാര്ദ്ദിക്കിന്റെ നിലപാട്.