കൊച്ചി: എറണാകുളം കാക്കനാട് ബസ്സും ടോറസ് ലോറിയും കൂട്ടിയിടിച്ചുണ്ടായ അപകടത്തില്‍ ബസ് യാത്രക്കാരി മരിച്ചു. കുട്ടമശ്ശേരി സ്വദേശി നസീറയാണ് മരിച്ചത്. രാവിലെ 7.30നായിരുന്നു കാക്കനാട് ജഡ്ജിമുക്കിലെ അപകടം. 22 പേര്‍ക്ക് അപകടത്തില്‍ പരിക്കേറ്റു.
പൂക്കാട്ടുപടിയില്‍ നിന്ന് ഫോര്‍ട്ട് കൊച്ചിയിലേക്ക് പോവുകയായിരുന്ന സുല്‍ത്താന്‍ ബസ്സാണ് ടോറസ് ലോറിയുമായി കൂട്ടിയിടിച്ചത്. ബസിലേക്ക് ഇടിച്ച ടോറസിന് പുറകില്‍ മറ്റൊരു ടോറസ് ലോറിയും വന്നിടിച്ചു. ബസ്സില്‍ സ്‌കൂള്‍ വിദ്യാര്‍ത്ഥികള്‍ അടക്കം 30 ല്‍ അധികം യാത്രക്കാരുണ്ടായിരുന്നു. തൊട്ടടുത്ത ബിആന്‍ഡ്ബി ആശുപത്രിയില്‍ പ്രവേശിപ്പിച്ച 14 പേരില്‍ ഒരാളായ നസീറയാണ് മരിച്ചത്. മോഡല്‍ എഞ്ചിനീയറിംഗ് കോളേജിലെ ജീവനക്കാരിയായ നസീറ ജോലി സ്ഥലത്തേക്ക് പോവുകയായിരുന്നു. ഇവിടെ ചികിത്സയിലുള്ള യാത്രക്കാരിയായ സ്ത്രീക്ക് തലയ്ക്ക് പരിക്കുണ്ട്. സണ്‍റൈസ് ആശുപത്രിയില്‍ ഏഴും മെഡിക്കല്‍ കോളേജില്‍ രണ്ട് പേരുമാണ് ചികിത്സയിലിലുള്ളത്. ഇതില്‍ ആരുടേയും പരിക്ക് ഗുരുതരമല്ല.
