ലക്ഷ്യബോധമുള്ള മാതൃകാ വ്യക്തികളായി വിദ്യാര്‍ത്ഥികള്‍ മാറണമെന്ന് ജില്ലാ പോലീസ് മേധാവി ഡി ശില്പ ഐ പി എസ് അഭിപ്രായപ്പെട്ടു. ജില്ലാ പോലീസ് മേധാവിയുടെ ചേമ്പറില്‍ സന്ദര്‍ശനം നടത്തിയ ടി.ഐ എച്ച് എസ് എസ് നായന്മാര്‍മൂല സ്‌കൂളിലെ സീനിയര്‍ എസ് പി.സി കാഡെറ്റുകളുമായി സംവദിക്കുകയായിരുന്നു ജില്ലാ പോലീസ് മേധാവി. സമൂഹത്തില്‍ നന്മയും തിന്മയുമുണ്ടെന്നും എസ് പി സി കാഡെറ്റുകള്‍ എം. ഡി എം എ , കഞ്ചാവ് പോലെയുള്ള മാരക ലഹരിക്കെതിരെ പ്രതികരിക്കുന്ന യോദ്ധാക്കളായി മാറണമെന്നും അതോടൊപ്പം ഓരോ വിദ്യാര്‍ത്ഥിയും ഭാവിയെ സംബന്ധിച്ച് വ്യക്തമായ ലക്ഷ്യമിട്ട് അത് നേടിയെടുക്കുന്നതിനുള്ള നിരന്തര പരിശ്രമം നടത്തണമെന്നും പറഞ്ഞു. കേഡറ്റുകളോട് താന്‍ ഐ പി എസ് നേടാന്‍ എടുത്ത പരിശ്രമങ്ങളെക്കുറിച്ച് പറഞ്ഞ് കൊടുക്കുകയും കേഡറ്റുകളുടെ സംശയങ്ങള്‍ക്ക് മറുപടി നല്‍കുകയും ചെയ്തു. എസ് പി. സി ജില്ലാ നോഡല്‍ ഓഫീസറും അഡീഷണന്‍ എസ് പി യുമായ പി ബാലകൃഷ്ണന്‍ നായര്‍, സ്‌പെഷ്യല്‍ ബ്രാഞ്ച് ഡി വൈ എസ് എം സുനില്‍കുമാര്‍, എസ് പി സി ജില്ലാ അസിസ്റ്റന്റ് നോഡല്‍ ഓഫീസര്‍ ടി തമ്പാന്‍, കമ്മ്യൂണിറ്റി പോലീസ് ഓഫീസര്‍ ഇല്യാസ് മാസ്റ്റര്‍, ഡ്രില്‍ ഇന്‍സ്ട്രക്റ്റര്‍മാരായ പ്രശാന്ത് എന്‍ ആര്‍ ,പ്രസീത ടി, പ്രോജക്ട് അസിസ്റ്റന്റ് ശ്യാം കൃഷ്ണന്‍ എന്നിവര്‍ സംബന്ധിച്ചു. ശേഷം കേഡറ്റുകള്‍ ജില്ലാ ആസ്ഥാനത്തുള്ള പോലീസ് ഡോഗ് സ്‌ക്വാഡിനെ സന്ദര്‍ശിച്ചു. ട്രെയിനേഴ്‌സായ ശ്രീജിത്ത് കുമാര്‍, സുജിത്ത് എന്നിവര്‍ പോലീസ് ഡോഗ് മണം പിടിച്ച് ബോംബ്, ലഹരി വസ്തുക്കള്‍ തുടങ്ങിയവ എങ്ങിനെയാണ് കണ്ടെത്തുന്നതെന്നും മറ്റും വിവരിച്ച് കൊടുത്തു. സീനിയര്‍ പോലീസ് ഓഫീസര്‍ ബിജുമോന്‍ പി ജില്ലാ സായുധ സേനാ ക്യാമ്പിലുള്ള ആയുധങ്ങളും, തിരകളും, വിവിധയിനത്തിലുള്ള ഗ്രനേഡുകളും ഷെല്ലുകളും കേഡറ്റുകള്‍ക്ക് പരിചയപ്പെടുത്തിക്കൊടുത്തു.
എസ് പി സി കാഡെറ്റുകള്‍ക്ക് മധുരം നല്‍കി സ്വീകരിച്ച് ജില്ലാ പോലീസ് മേധാവി
21
previous post