ദില്ലി: ഭീകരതക്കെതിരായ ഇന്ത്യയുടെ പോരാട്ടത്തിനും പഹല്‍ഗാം ഭീകരാക്രമണത്തിലെ കുറ്റവാളികളെ നീതിപീഠത്തിലേക്ക് കൊണ്ടുവരുന്നതിനുള്ള എല്ലാ നടപടികള്‍ക്കും പൂര്‍ണ പിന്തുണ പ്രഖ്യാപിച്ച് ഖത്തര്‍. പ്രധാനമന്ത്രി നരേന്ദ്ര മോദിയുമായി നടത്തിയ ഫോണ്‍ സംഭാഷണത്തില്‍ ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍-താനി അനുശോചനവും ഇന്ത്യയോടുള്ള ഐക്യദാര്‍ഢ്യവും അറിയിച്ചു.
ഭീകരതയ്ക്കെതിരായ ഇന്ത്യയുടെ പോരാട്ടത്തിലും കുറ്റവാളികളെ നീതിപീഠത്തിലേക്ക് കൊണ്ടുവരുന്നതിനുള്ള എല്ലാ നടപടികളിലും അദ്ദേഹം പൂര്‍ണ്ണ പിന്തുണ അറിയിച്ചുവെന്ന് വിദേശകാര്യ മന്ത്രാലയ വക്താവ് രണ്‍ധീര്‍ ജയ്സ്വാള്‍ പറഞ്ഞു.
പിന്തുണയുടെയും ഐക്യദാര്‍ഢ്യത്തിന്റെയും വ്യക്തമായ സന്ദേശത്തിന് പ്രധാനമന്ത്രി മോദി അമീറിനോട് നന്ദി പറഞ്ഞതായി ജയ്സ്വാള്‍ പറഞ്ഞു. ഇന്ത്യ-ഖത്തര്‍ തന്ത്രപരമായ പങ്കാളിത്തം ശക്തിപ്പെടുത്തുന്നതിനും ഈ വര്‍ഷം ആദ്യം അമീറിന്റെ സംസ്ഥാന സന്ദര്‍ശന വേളയില്‍ എടുത്ത തീരുമാനങ്ങള്‍ നടപ്പിലാക്കുന്നതിനുമുള്ള പ്രതിബദ്ധത ഇരു നേതാക്കളും ആവര്‍ത്തിച്ചു.
അതേസമയം, അതിര്‍ത്തി കടന്നുള്ള ആക്രമണത്തെ എതിര്‍ത്ത ഓര്‍ഗനൈസേഷന്‍ ഓഫ് ഇസ്ലാമിക് കോ-ഓപ്പറേഷന്‍ (ഒഐസി)യെ ഇന്ത്യ ശക്തമായി വിമര്‍ശിച്ചു. ഒഐസിയുടെ പരാമര്‍ശങ്ങള്‍ അസംബന്ധമാണെന്നും പാകിസ്ഥാന്റെ നിര്‍ദ്ദേശപ്രകാരം സംഘടന പ്രവര്‍ത്തിക്കുകയാണെന്നും വിദേശകാര്യ മന്ത്രാലയം (എംഇഎ) ആരോപിച്ചു. പഹല്‍ഗാം ഭീകരാക്രമണത്തിന്റെയും അതിര്‍ത്തി കടന്നുള്ള ആക്രമണങ്ങളുടെയും വസ്തുതകള്‍ അംഗീകരിക്കാന്‍ വിസമ്മതിക്കുന്ന, പാകിസ്ഥാന്റെ നിര്‍ദ്ദേശപ്രകാരം പുറപ്പെടുവിച്ച ഒഐസി പ്രസ്താവന അസംബന്ധമാണെന്ന് വിദേശകാര്യ മന്ത്രാലയ വക്താവ് രണ്‍ധീര്‍ ജയ്സ്വാള്‍ പറഞ്ഞു.
വളരെക്കാലമായി അതിര്‍ത്തി കടന്നുള്ള ഭീകരതയില്‍ ഏര്‍പ്പെട്ടിരിക്കുന്ന രാജ്യമായ പാകിസ്ഥാന്‍, ഒഐസി ഗ്രൂപ്പിനെ വഴിതിരിച്ചുവിടാനാണ് ശ്രമിക്കുന്നത്. ഇന്ത്യയുടെ ആഭ്യന്തര കാര്യങ്ങളില്‍ ഒഐസിയുടെ ഇടപെടല്‍ ഞങ്ങള്‍ നിരസിക്കുന്നുവെന്നും അദ്ദേഹം പറഞ്ഞു.
ഇന്ത്യക്ക് പൂര്‍ണ പിന്തുണ പ്രഖ്യാപിച്ച് ഖത്തര്‍, തിരിച്ചടിയെ അപലപിച്ച് ഇസ്ലാമിക് കോ ഓപ്പറേഷന്‍
47
