നരേന്ദ്ര മോദി സ്റ്റേഡിയത്തിന് ബോംബ് ഭീഷണി; ഇന്ത്യ, ഓസ്ട്രേലിയ അണ്ടര്‍-19 ടീമുകള്‍ സ്റ്റേഡിയത്തിലിരിക്കെ ഇമെയില്‍ സന്ദേശം

അഹമ്മദാബാദ്: ലോകത്തിലെ ഏറ്റവും വലിയ ക്രിക്കറ്റ് സ്റ്റേഡിയമായ അഹമ്മദാബാദിലെ നരേന്ദ്ര മോദി സ്റ്റേഡിയത്തിനും നഗരത്തിലെ പത്തോളം പ്രമുഖ സ്‌കൂളുകള്‍ക്കും ബോംബ് ഭീഷണി. ഇന്ത്യ അണ്ടര്‍-19, ഓസ്ട്രേലിയ അണ്ടര്‍-19 ടീമുകള്‍ യൂത്ത് ടെസ്റ്റ് മത്സരത്തിന്റെ ഭാഗമായി സ്റ്റേഡിയത്തില്‍ കളിക്കാര്‍ പരിശീലനം നടത്തുന്ന സമയത്താണ് ഇമെയിലിലൂടെ ബോംബ് ഭീഷണി ലഭിച്ചത്.

സംഭവത്തെ തുടര്‍ന്ന് പൊലീസും ബോംബ് ഡിസ്പോസല്‍ സ്‌ക്വാഡും ഫയര്‍ഫോഴ്സും സ്റ്റേഡിയത്തിലും സ്‌കൂളുകളിലും ഉടനടി പരിശോധന നടത്തി. ഭീഷണിയെ തുടര്‍ന്ന് സ്‌കൂളുകളില്‍ നിന്ന് വിദ്യാര്‍ത്ഥികളെ സുരക്ഷിതമായി വീടുകളിലേക്ക് മാറ്റി. ഇമെയില്‍ ലഭിച്ച ഉടന്‍ തന്നെ പൊലീസിനെയും സൈബര്‍ ക്രൈം സെല്ലിനെയും വിവരമറിയിച്ചിരുന്നു. ഒക്ടോബര്‍ 4 മുതല്‍ നരേന്ദ്ര മോദി സ്റ്റേഡിയത്തിലെ ‘ഗ്രൗണ്ട് എ’യില്‍ ഇന്ത്യ-ഓസ്ട്രേലിയ അണ്ടര്‍-19 ചതുര്‍ദിന മത്സരം നടക്കുന്നുണ്ടായിരുന്നു. രാവിലെ 11:15-ഓടെ അഞ്ചാം ദിന മത്സരം പൂര്‍ത്തിയായ ശേഷമാണ് ഇമെയില്‍ സന്ദേശം ശ്രദ്ധയില്‍പ്പെടുന്നത്.

ഉച്ചയ്ക്ക് 1 മണിയോടെ ഇരു ടീമുകളും സ്റ്റേഡിയത്തില്‍ നിന്നും സുരക്ഷിതമായി മടങ്ങി. സ്റ്റേഡിയത്തിന് പുറമേ പ്രശസ്ത പഞ്ചാബി ഗായകന്‍ ദില്‍ജിത് ദോസാഞ്ചിന്റെ വരാനിരിക്കുന്ന സംഗീത പരിപാടിക്കും ഇ മെയിലില്‍ ഭീഷണിയുണ്ട്. നവംബര്‍ 21-നാണ് സ്റ്റേഡിയത്തില്‍ ദില്‍ജിതിന്റെ മ്യൂസിക് കണ്‍സേര്‍ട്ട് നിശ്ചയിച്ചിരിക്കുന്നത്. പരിപാടിയില്‍ പങ്കെടുക്കാന്‍ എത്തുന്നവര്‍ സുരക്ഷിതരായിരിക്കില്ലെന്നാണ് സന്ദേശത്തിലെ മുന്നറിയിപ്പ്. സൈഡസ് സ്‌കൂള്‍, ബോഡക്‌ദേവ് സ്‌കൂള്‍ ഫോര്‍ ചില്‍ഡ്രന്‍, എസ്ജിവിപി സ്‌കൂള്‍, സെന്റ് കബീര്‍ സ്‌കൂള്‍, ഏഷ്യ സ്‌കൂള്‍ തുടങ്ങിയ നഗരത്തിലെ പത്തോളം പ്രമുഖ വിദ്യാലയങ്ങള്‍ക്കാണ് ഭീഷണി സന്ദേശം ലഭിച്ചത്.വ്യാജ സന്ദേശത്തിന്റെ ഉറവിടം കണ്ടെത്താന്‍ ഗുജറാത്ത് പൊലീസും സൈബര്‍ സെല്ലും അന്വേഷണം ഊര്‍ജ്ജിതമാക്കിയിട്ടുണ്ട്.