രാജ്യത്തെ വിഭജിക്കാന്‍ ചിലര്‍ ശ്രമിക്കുന്നു; രാജ്യത്തിന്റെ ശത്രുക്കളെ നാം ഒരുമിച്ച് നേരിടണം: പ്രധാനമന്ത്രി നരേന്ദ്ര മോദി

ഡല്‍ഹി: രാജ്യത്തെ വിഭജിക്കാന്‍ ചിലര്‍ ശ്രമിക്കുന്നു എന്ന് പ്രധാനമന്ത്രി നരേന്ദ്ര മോദി. രാജ്യത്തിന്റെ ശത്രുക്കളെ നാം ഒരുമിച്ച് നേരിടണം. രാമന്റെ ആദര്‍ശങ്ങളെ ഓര്‍ക്കാനുള്ള സമയമാണ് ഇതെന്നും ദസറ ആഘോഷത്തില്‍ പങ്കെടുത്ത് നരേന്ദ്ര മോദി പറഞ്ഞു. രാജ്യത്തിന്റെ പുരോഗതിക്ക് വേണ്ടി ഒറ്റക്കെട്ടായി നില്‍ക്കണം. ‘അടിച്ചമര്‍ത്തലിന്റെയും ഭീകരതയുടെയും അന്ത്യം’ കുറിക്കുന്നതാണ് ദസറ ആഘോഷമെന്ന് അദ്ദേഹം പറഞ്ഞു. അസത്യത്തിന് മേല്‍ സത്യം വിജയിക്കുമെന്ന വിശ്വാസത്തിന്റെ സാക്ഷ്യപത്രമാണ് ദസറയെന്നും അദ്ദേഹം വിശേഷിപ്പിച്ചു.

‘രാമരാജ്യം’, സ്വയംപര്യാപ്തത, ദേശീയ ഐക്യം എന്നിവയ്ക്ക് ഊന്നല്‍ നല്‍കിയ പ്രധാനമന്ത്രി, സമൂഹത്തെ ഭിന്നിപ്പിക്കാന്‍ ശ്രമിക്കുന്ന ശക്തികള്‍ക്കെതിരെ ഒറ്റക്കെട്ടായി നിലകൊള്ളാന്‍ ആഹ്വാനം ചെയ്തു. സത്യം, സേവനം, കൂട്ടായ ദൃഢനിശ്ചയം എന്നീ മൂല്യങ്ങളില്‍ അധിഷ്ഠിതമായ, വികസിതവും സ്വയംപര്യാപ്തവുമായ ഒരു ഇന്ത്യ എന്ന കാഴ്ചപ്പാടാണ് വലുതെന്ന് അദേഹം പറഞ്ഞു.

‘വിവേചനമില്ലാത്ത ഒരു ഭരണസംവിധാനത്തെയാണ് രാമരാജ്യം സൂചിപ്പിക്കുന്നത്. നീതി പുലരുന്നതും എല്ലാവര്‍ക്കും തുല്യ അവസരങ്ങള്‍ ലഭിക്കുന്നതുമായ ഒരു രാജ്യം. ഇത്തരമൊരു സംവിധാനത്തില്‍, അധികാരത്തിന്റെ ലക്ഷ്യം കേവലം ഭരിക്കല്‍ മാത്രമല്ല, ജനക്ഷേമം ഉറപ്പാക്കുക കൂടിയാണ്. പാവപ്പെട്ടവരെയും പാര്‍ശ്വവല്‍ക്കരിക്കപ്പെട്ടവരെയും സേവിക്കുക എന്നതായിരിക്കണം നമ്മുടെ പരമോന്നത മുന്‍ഗണന. പ്രതിസന്ധി എത്ര വലുതാണെങ്കിലും വെല്ലുവിളി എത്ര കഠിനമാണെങ്കിലും നമ്മള്‍ മറ്റുള്ളവരെ ആശ്രയിക്കരുത്. നമ്മള്‍ നമ്മുടെ സ്വന്തം കഴിവ് തിരിച്ചറിയണം, സ്വന്തം വിഭവങ്ങളില്‍ വിശ്വസിക്കണം, നമ്മുടെ നിശ്ചയദാര്‍ഢ്യത്തെ ശക്തിയാക്കി മാറ്റണം, സ്വന്തം കഠിനാധ്വാനത്തിലൂടെ പരിഹാരങ്ങള്‍ കണ്ടെത്തണം. വികസിത ഭാരതത്തിന്റെയും ആത്മനിര്‍ഭര്‍ ഭാരതത്തിന്റെയും ലക്ഷ്യങ്ങളാണ് നമ്മള്‍ നമുക്ക് മുന്നില്‍ വച്ചിരിക്കുന്നത്” പ്രധാനമന്ത്രി മോദി പറഞ്ഞു.