മേപ്പാടി: വയനാട് ഉരുള്‍പൊട്ടല്‍ ദേശീയ ദുരന്തമായി കേന്ദ്ര സര്‍ക്കാര്‍ പ്രഖ്യാപിക്കണമെന്ന ആവശ്യം ശക്തമാക്കി ഗവര്‍ണര്‍ ആരിഫ് മുഹമ്മദ് ഖാന്‍ രംഗത്ത്. ദേശീയ ദുരന്തം ആയി പ്രഖ്യാപിക്കാന്‍ കേന്ദ്ര സര്‍ക്കാരിനോട് ആവശ്യപ്പെടുമെന്നും ഗവര്‍ണര്‍ വ്യക്തമാക്കി. ഇന്ന് ചേര്‍ന്ന ഗവര്‍ണര്‍മാരുടെ അനൗദ്യോഗിക യോഗത്തില്‍ ഇക്കാര്യം ആവശ്യപ്പെട്ടിരുന്നുവെന്ന് വിവരിച്ച ആരിഫ് ഖാന്‍, നാളെ ചേരുന്ന യോഗത്തില്‍ ഇത് ആവശ്യപ്പെടുമെന്നും കൂട്ടിച്ചേര്‍ത്തു.
വയനാടിന്റെ വിഷയം രാജ്യത്തിന്റേതായി കണ്ട് നടപടി ഉണ്ടാകണം. ഇന്നത്തെ യോഗത്തില്‍ എല്ലാ ഗവര്‍ണര്‍മാരും അവരവരുടെ മുഖ്യമന്ത്രിമാരോട് സംസാരിക്കാം എന്ന് പറഞ്ഞെന്നും ആരിഫ് ഖാന്‍ വ്യക്തമാക്കി. ഉരുള്‍പൊട്ടലിന്റെ ആദ്യ വാര്‍ത്ത പുറത്ത് വന്നപ്പോള്‍ തന്നെ പ്രധാനമന്ത്രി പ്രതികരിച്ചതാണല്ലോയെന്ന് ചൂണ്ടികാട്ടിയ അദ്ദേഹം, പിന്നെ എന്തുകൊണ്ട് നമ്മള്‍ക്ക് നടപടികള്‍ പ്രതീക്ഷിച്ചുകൂടെന്നും ചോദിച്ചു. ഈ അവസ്ഥയില്‍ രാജ്യം എന്തായാലും വയനാടിന് ഒപ്പം നില്‍ക്കും എന്നാണ് പ്രതീക്ഷയെന്നും ഗവര്‍ണര്‍ പറഞ്ഞു.
