ഹൈദരാബാദ്: തെലുങ്ക് താരം നാനി നായകനായി എത്തിയ സരിപോത ശനിവാരം ബോക്‌സോഫീസില്‍ മികച്ച പ്രകടനം സൃഷ്ടിച്ച ചിത്രമാണ്. ചിത്രം 100 കോടി ക്ലബില്‍ എത്തിയിരുന്നു.റിലീസ് ചെയ്ത് 18-ാം ദിവസമായ ഞായറാഴ്ചയാണ് നാനി നായകനായ ചിത്രം ഒടുവില്‍ 100 ??കോടി ക്ലബ്ബില്‍ പ്രവേശിച്ചത്. 16 വര്‍ഷത്തെ കരിയറിലെ മൂന്നാമത്തെ 100 കോടി ഗ്രോസറും നാനി ഇതോടെ സ്വന്തമാക്കി.
സിനിമയുടെ തിയറ്ററുകളിലെ പ്രദര്‍ശനം അവസാന ഘട്ടത്തിലാണ്. നേരത്തെ ഒടിടി അവകാശം വിറ്റുപോയ ചിത്രത്തിന്റെ തീയറ്റര്‍ വിന്റെ 4 ആഴ്ചയാണ്. അതിന് ശേഷം ഈ ആക്ഷന്‍ ഡ്രാമ അതിന്റെ ഒടിടി റിലീസിന് ഒരുങ്ങുകയാണ്. സെപ്തംബര്‍ 26 മുതല്‍ നെറ്റ്ഫ്‌ലിക്‌സില്‍ സരിപോത ശനിവാരം സ്ട്രീമിംഗിനായി ലഭ്യമാകും. ചിത്രത്തിന്റെ തെലുങ്ക്, തമിഴ്, ഹിന്ദി, മലയാളം, കന്നഡ ഭാഷ പതിപ്പുകള്‍ നെറ്റ്ഫ്‌ലിക്‌സില്‍ എത്തും.
നാനിയുടെ 16 വര്‍ഷത്തെ കരിയറിലെ മൂന്നാമത്തെ 100 കോടി ഗ്രോസറാണ് സരിപോത ശനിവാരം. ഇന്ത്യയിലെ ഒന്നാം നമ്പര്‍ സംവിധായകന്‍ എസ് എസ് രാജമൗലിയുടെ ഐക്കണിക് പരീക്ഷണ നാടകമായ ഈഗയാണ് നാനിയുടെ ആദ്യ 100 കോടി ചിത്രം. 2012ല്‍ റിലീസ് ചെയ്ത ചിത്രം ലോകമെമ്പാടുമായി 107 കോടി രൂപയാണ് കളക്ഷന്‍ നേടിയിരുന്നു. 2023-ല്‍ പുറത്തിറങ്ങിയ ആക്ഷന്‍ ഡ്രാമയായ ദസറ 121 കോടി രൂപ കളക്ഷന്‍ നേടി നാനിയുടെ രണ്ടാമത്തെ 100 കോടി ഗ്രോസറായി.
സൂര്യാസ് സാറ്റര്‍ഡേ എന്ന പേരില്‍ മലയാളത്തിലും ഈ ചിത്രം റിലീസായിരുന്നു. വിവേക് ആത്രേയ രചിച്ച് സംവിധാനം ചെയ്ത ഓഗസ്റ്റ് 29നാണ് റിലീസ് ചെയ്തത്. പ്രിയങ്ക മോഹന്‍ നായികയായെത്തുന്ന ചിത്രത്തില്‍ വില്ലനായി അഭിനയിച്ചിരിക്കുന്നത് എസ് ജെ സൂര്യ ആണ്.
സൂപ്പര്‍ ഹിറ്റായ ഗ്യാങ് ലീഡറിന് ശേഷം വീണ്ടും നാനി- പ്രിയങ്ക മോഹന്‍ ടീമൊന്നിക്കുന്ന ചിത്രം കൂടിയാണിത്. ത്രില്ലടിപ്പിക്കുന്ന ഒരു ആക്ഷന്‍- അഡ്വെഞ്ചര്‍ ചിത്രമായാണ് വിവേക് ആത്രേയ സൂര്യാസ് സാറ്റര്‍ഡേ ഒരുക്കിയിരിക്കുന്നത്.
ഡിവിവി ദാനയ്യ, കല്യാണ്‍ ദസരി എന്നിവര്‍ ചേര്‍ന്ന് ഡിവിവി എന്റര്‍ടെയ്ന്‍മെന്റിന്റെ ബാനറില്‍ നിര്‍മ്മിക്കുന്ന ഈ ബിഗ് ബഡ്ജറ്റ് ചിത്രത്തിലെ മറ്റൊരു നിര്‍ണ്ണായക കഥാപാത്രത്തെ അവതരിപ്പിച്ചിരിക്കുന്നത് സായ് കുമാര്‍ ആണ്
ഛായാഗ്രഹണം- മുരളി ജി, സംഗീതം- ജേക്സ് ബിജോയ്, എഡിറ്റിംഗ്- കാര്‍ത്തിക ശ്രീനിവാസ് ആര്‍, സംഘട്ടനം- റിയല്‍ സതീഷ്, റാം- ലക്ഷ്മണ്‍, കലാ സംവിധായകന്‍- ജി. എം. ശേഖര്‍, വസ്ത്രാലങ്കാരം- നാനി കാമാര്‍സു, എക്‌സിക്കൂട്ടീവ് പ്രൊഡ്യൂസര്‍- എസ്. വെങ്കടരത്‌നം, പ്രൊഡക്ഷന്‍ കണ്‍ട്രോളര്‍- കെ. ശ്രീനിവാസ രാജു, മണികണ്ഠ റോംഗള, കളറിസ്റ്റ്- വിവേക് ആനന്ദ്, വിഎഫ്എക്‌സ്- നാക്ക് സ്റ്റുഡിയോസ്, ഡിസ്ട്രിബൂഷന്‍ പാര്‍ട്ണര്‍- ഡ്രീം ബിഗ് ഫിലിംസ്. പിആര്‍ഒ ശബരി എന്നിവരാണ് മറ്റ് അണിയറ പ്രവര്‍ത്തകര്‍.
