മീന്‍കാരനായി മമ്മൂട്ടി

അമരം എന്ന ചിത്രത്തില്‍ മമ്മൂട്ടി അവതരിപ്പിച്ച അച്ചൂട്ടി എന്ന കഥാപാത്രത്തെ മലയാളികള്‍ മറക്കാന്‍ ഇടയില്ല.

കടലിനെ പശ്ചാത്തലമാക്കി ഭരതന്‍ ഒരുക്കിയ എക്കാലത്തേയും ഹിറ്റുകളില്‍ ഒന്നായി അമരം മാറുകയും ചെയ്തു.

മമ്മൂട്ടി വീണ്ടും ഒരു തനി കടപ്പുറംകാരനായി എത്തുന്ന പുതിയ ചിത്രമാണ് മംഗ്ലീഷ്. സലാം ബാപ്പുവാണ് ചിത്രം സംവിധാനം ചെയ്യുന്നത്.

കടപ്പുറം തന്നെയാണ് ചിത്രത്തിന്റെ പ്രധാനലൊക്കേഷന്‍. കടപ്പുറത്ത് കാണുന്ന എല്ലാ സാധാരണ കാഴ്ചയും ദൃശ്യവത്ക്കരിക്കാനാണ് സംവിധായകന്‍ ഒരുങ്ങുന്നത്.

കടപ്പുറത്ത് വെച്ച് തന്നെ മീന്‍ ലേലത്തില്‍ വില്‍ക്കുന്ന ആളായിട്ടാണ് മമ്മൂട്ടി ചിത്രത്തിലെത്തുന്നത്.

ചിത്രത്തിലെ നായിക ഇംഗ്ലീഷുകാരിയാണ്. കരോളിന്‍ ബെച്ച്. നിരവധി വിദേശ ചിത്രങ്ങളില്‍ വേഷമിട്ട താരമാണ് കരോളിന്‍. ഒരു ടൂറിസ്റ്റിന്റെ വേഷമാണ് കരോളിന്‍ അവതരിപ്പിക്കുന്നത്. ഇംഗ്ലീഷ് മാത്രം വശമുള്ള ഒരാള്‍.

വെക്കേഷന്‍ ആഘോഷിക്കാനായി അവര്‍ ഈ ബീച്ചില്‍ എത്തുന്നതും തുടര്‍ന്നുണ്ടാകുന്ന പ്രത്യേക സംഭവങ്ങളുമാണ് ചിത്രത്തിന്റെ പ്രമേയം.

ചിത്രത്തില്‍ ഫഹദ് ഫാസിലും ഉണ്ടെന്ന് നേരത്തെ വാര്‍ത്തയുണ്ടായിരുന്നെങ്കിലും അത് സംവിധായകന്‍ തന്നെ നിഷേധിച്ചു.

ഫോര്‍ട്ട് കൊച്ചിയില്‍ വെച്ച് ചിത്രത്തിന്റെ ഷൂട്ടിങ് നടക്കും. ഗോപി സുന്ദറാണ് ചിത്രത്തിന് ഈണമിടുന്നത്.